Գլուխ 25

1․ Եւ եղեւ յամին իններորդի թագաւորութեան նորա, յամսեանն տասներորդի որ աւր տասն էր ամսոյն. եկն Նաբուքոդոնոսոր արքայն Բաբելոնի, եւ ամենայն զաւրք իւր ի վերայ Երուսաղէմի, եւ բանակեցաւ զնովաւ, եւ շինեաց շուրջ զնովաւ պարիսպ:

2․ Եւ պաշարեցաւ քաղաքն մինչչեւ ցամն մետասաներորդ Սեդեկիայ արքայի,

3․ եւ ցամիսն իններորդ. եւ սաստկացաւ սով ի քաղաքին, եւ ոչ գոյր հաց ժողովրդեան երկրին:

4․ Եւ խրամատեցաւ քաղաքն. եւ ամենայն արք պատերազմի ելին արտաքս գիշերի ի ճանապարհ դրանն ի մէջ պարսպացն, որ էր առ պարտիզաւն արքունի: եւ քաղդէացիքն պատեալ էին շուրջ զքաղաքաւն. եւ գնաց ընդ ճանապարհն Արաբայ:

5․ Եւ պնտեցաւ զաւրն քաղդեացւոց զհետ թագաւորին, եւ հասին նմա յԱրաբովթ Երիքովայ. եւ ամենայն զաւրք նորա ցրուեցան ի նմանէ:

6․ եւ կալան զթագաւորն, եւ ածին առ արքայն Բաբելոնի ի Դեբղաթայ: եւ խաւսեցաւ ընդ նմա դատաստանաւք:

7․ Եւ զորդիսն Սեդեկիայ սպանին առաջի նորա, եւ զաչսն Սեդեկիայ կուրացոյց. եւ կապեաց զնա կապանաւք եւ տարաւ ի Բաբելոն:

8․ Եւ յամսեանն հինգերորդի, որ աւր եւթն էր ամսոյն. այն ամ իննեւտասներորդ էր Նաբուքոդոնոսորայ արքայի բաբելացւոց. եկն Նաբուզարդան դահճապետ` յանդիմանակաց արքային Բաբելոնի յԵրուսաղէմ:

9․ եւ այրեաց զտունն Տեառն, եւ զտուն թագաւորին. եւ զամենայն տունս Երուսաղէմի, եւ զամենայն տունս այրեաց հրով:

10․ եւ զպարիսպն Երուսաղէմի շուրջանակի քակեցին ամենայն զաւրքն քաղդեացւոց որ ընդ դահճապետին:

11․ Եւ զաւելորդս ժողովրդեանն զմնացեալս ի քաղաքին, եւ զանկեալսն յարքայն բաբելացւոց. եւ զայլ եւս խուժան ժողովրդեանն, խաղացոյց Նաբուզարդան դահճապետ:

12․ եւ յաղքատաց երկրին եթող դահճապետն յայգեգործս եւ յարդիւնարարս:

13․ Եւ զսիւնսն պղնձիս զերկոսին որ ի տան Տեառն, եւ զմենքենովթսն, եւ զծովն պղնձի որ ի տան Տեառն, խորտակեցին քաղդէացիքն, եւ բարձին զպղինձ նոցա ի Բաբելոն:

14․ Եւ զսանսն, եւ զկատսայսն, եւ զտաշտսն, եւ զտուփս, եւ զամենայն անաւթս պղնձիս որովք պաշտէին` առին:

15․ եւ զբուրուառսն, եւ զափսէսն արծաթիս եւ զոսկիս առ դահճապետն:

16․ Եւ զսիւնսն զերկոսին, եւ զծովն զմի. եւ զմեքենովթսն զոր արար Սողոմոն ի տան Տեառն. եւ ոչ գոյր կշիռ պղնձոյ ամենայն անաւթոցն.

17․ յութուտասն կանգնոյ բարձրութիւն միոյ սեանն. եւ քովթար պղնձի ի վերայ նորա. եւ բարձրութիւն միոյ քովթարայ` յերից կանգնոց: եւ սաբակ, եւ նռնաձեւք ի վերայ քովթարայն շուրջանակի ամենայն պղնձի: ըստ նմին աւրինակի եւ սեանն երկրորդի ի վերայ սաբաքին:

18․ Եւ առ դահճապետն զՍարայիա քահանայն զառաջինն, եւ զՍոփոնիա զերկրորդ քահանայ, եւ զերիս պահապանս կշռոյն:

19․ եւ ի քաղաքէ անտի առ ներքինի մի, որ էր ոստիկան արանց պատերազմողաց. եւ հինգ այր ի յանդիմանակացաց արքայի գտելոց ի քաղաքին. եւ զդպրապետ իշխան զաւրուն զկարգիչ ժողովրդեան երկրին, եւ եւթն այլ այր ի ժողովրդենէ երկրին զգտեալս ի քաղաքին.

20․ առ զնոսա Նաբուզարդան դահճապետ, եւ տարաւ զնոսա առ արքայն Բաբելոնի ի Դեբլաթա:

21․ Եւ եհար զնոսա արքայն Բաբելոնի, եւ սպան զնոսա ի Դեբլաթա յերկրին Եմաթայ: եւ գերեցաւ Յուդայ յերկրէ իւրմէ:

22․ Եւ ժողովուրդն որ մնաց ի Յուդայ, եթող Նաբուքոդոնոսոր արքայ Բաբելոնի. եւ կացոյց ի վերայ նոցա զԳոդողիա որդի Աքիկամայ որդւոյ Սափանայ:

23․ Եւ լուան ամենայն իշխանք զաւրուն նորա` եւ արք նոցա` եթէ կացոյց արքայ Բաբելոնի ի վերայ նոցա զԳոդողիա. եւ եկին առ Գոդողիա ի Մասեփա. Իսմայէլ որդի Նաթանայ, եւ Յովնան որդի Կարէի, եւ Սարայիա որդի Թանայեմայ Սովփաթացի, եւ Յեզոնիա որդի Մաքաթու, ինքեանք եւ արք իւրեանց.

24․ եւ երդուան Գոդողիայ` ինքեանք եւ արք իւրեանց: եւ ասէ ցնոսա. Մի երկնչիք յասպատակէ քաղդեացւոցն. նստայք յերկրիս, եւ ծառայեցէք արքային Բաբելոնի, եւ բարի եղիցի ձեզ:

25․ Եւ եղեւ յամսեանն եւթներորդի, եկն Իսմայէլ որդի Նաթանայ որդւոյ Ելիսամայ ի զաւակէ թագաւորաց. եւ տասն այր ընդ նմա, եւ հարին զԳոդողիա եւ մեռաւ, եւ զհրէայսն եւ զքաղդէացիսն որ էին ընդ նմա ի Մասեփա:

26․ Եւ յարեաւ ամենայն ժողովուրդն ի փոքուէ մինչչեւ ցմեծ, եւ իշխանք զաւրուն` մտին յԵգիպտոս. զի երկեան յերեսաց քաղդեացւոցն:

27․ Եւ եղեւ յերեսներորդի եւ յեւթներորդի ամի գերութեանն Յովակիմայ արքայի Յուդայ, յամսեանն երկոտասաներորդի, ի քսան եւ յեւթն ամսոյն, բարձրացոյց Իլմարուդաք արքայ Բաբելոնի յամին յորում թագաւորեաց` զգլուխ Յովակիմայ արքայի Յուդայ. եւ եհան զնա ի տանէ բանտին իւրոյ,

28․ եւ խաւսեցաւ ընդ նմա քաղցրութեամբ. եւ արկ զաթոռ նորա ի վերոյ քան զաթոռս թագաւորացն որ ընդ նմա ի Բաբելոնի:

29․ Եւ փոխեաց զհանդերձ բանտին նորա. եւ ուտէր հանապազ հաց առաջի նորա զամենայն աւուրս կենաց իւրոց:

30․ եւ ռոճիկ նորա ռոճիկ հանապազորդ տուաւ նմա ի տանէ թագաւորին, համարով աւրըստաւրէ զամենայն աւուրս կենաց իւրոց: