Գլուխ 3

1․ Եւ էր պատերազմ սաստիկ ի մէջ տանն Սաւուղայ` եւ ի մէջ տանն Դաւթի. եւ տունն Դաւթի երթայր եւ զաւրանայր, եւ տունն Սաւուղայ երթայր եւ տկարանայր:

2․ Եւ ծնան Դաւթի որդիք ի Քեբրոն. անդրանիկ նորա` Ամմոն յԱքինոոմայ Յեզրայելացոյ:

3․ եւ երկրորդ նորա` Դաւիա յԱբիգեայ Կարմելացւոյ: եւ երրորդն` Աբեսաղոմ, ի Մաաքեայ դստերէ Թողմեայ արքայի Գեսուրայ:

4 եւ չորրորդն Ադոնիա, որդի Ագգիթայ: եւ հինգերորդն` Սափատիա, որդի Ամիտաղայ:

5․ եւ վեցերորդն` Յեթրամ, յԵգղաթայ կնոջէ Դաւթի: Սոքա ծնունդք Դաւթի ի Քեբրոն:

6․ Եւ եղեւ ի լինել պատերազմին ի մէջ տանն Սաւուղայ եւ ի մէջ տանն Դաւթի, եւ Աբեններ ունէր զտունն Սաւուղայ:

7․ Եւ Սաւուղայ էր հարճ մի, որում անուն էր Ռիսփա, դուստր Յուղայ: Եւ ասէ Յեբուսթէ որդի Սաւուղայ ցԱբեններ.

8․ Ընդէ՞ր մտանես դու առ հարճ հաւր իմոյ: եւ բարկացաւ Աբեններ յոյժ վասն բանին Յեբուսթեայ, եւ ասէ ցնա Աբեններ. Միթէ շա՞ն գլուխ իցեմ ես` որ արարի ողորմութիւն այսաւր ի վերայ տանն Սաւուղայ հաւր քոյ, եւ ի վերայ եղբարց եւ ի վերայ բարեկամաց, եւ ոչ եղէ անձնատուր ի տունն Դաւթի. եւ խնդրես յինէն այսաւր վրէ՞ժ կնոջ միոյ.

9․ աւն եւ աւն արասցէ Աստուած Աբեններայ եւ աւն եւ աւն յաւելցէ նմա, եթէ ոչ որպէս երդուաւ Տէր Դաւթի, այնպէս արարից նմա:

10․ բառնալով զթագաւորութիւնն Սաւուղայ, եւ կանգնել զթագաւորութիւնն Դաւթի ի վերայ Իսրայէլի եւ ի վերայ Յուդայ` ի Դանայ մինչչեւ ցԲերսաբէէ:

11․ Եւ ոչ եւս կարաց Յեբուսթէ տալ պատասխանի Աբեններայ բան մի յերկիւղէն:

12․ Եւ առաքեաց Աբեններ հրեշտակս առ Դաւիթ ի Թեսաղմու երկիր` առ ժամայն, եւ ասէ. Ուխտեա ընդ իս զուխտ քո, եւ ահա ձեռն իմ ընդ քեզ, դարձուցանել առ քեզ զամենայն տունն Իսրայէլի:

13․ Եւ ասէ Դաւիթ. Բարւոք է. ես ուխտեցից ընդ քեզ ուխտ, բայց բան մի ես խնդրեմ ի քէն` մի տեսցես զերեսս իմ, եթէ ոչ ածցես զՄեղքող դուստր Սաւուղայ ի գալն քում տեսանել զերեսս իմ:

14․ Եւ առաքեաց Դաւիթ առ Յեբուսթէ որդի Սաւուղայ հրեշտակս եւ ասէ. Տուր ցիս զկին իմ զՄեղքող, զոր առի ես ընդ հարիւր անթլփատութեանց այլազգեացն:

15․ Եւ առաքեաց Յեբուսթէ` եւ առ զնա յառնէ իւրմէ ի Փաղտիելէ որդւոյ Սելլայ:

16․ եւ երթայր այր նորա զհետ նորա եւ լայր, մինչչեւ ցԲարակիմ: եւ ասէ ցնա Աբեններ. Երթ դարձիր. եւ դարձաւ:

17․ Եւ խաւսեցաւ Աբեններ ընդ ծերս Իսրայէլի եւ ասէ. Երէկ եւ եռանտ խնդրէիք զԴաւիթ թագաւորել ի վերայ ձեր.

18․ եւ արդ` արարէք, զի Տէր խաւսեցաւ վասն Դաւթի եւ ասէ. Ձեռամբ ծառայի իմոյ Դաւթի փրկեցից

զԻսրայէլ ի ձեռաց այլազգեացն եւ ի ձեռաց ամենայն թշնամեաց իւրեանց:

19․ եւ խաւսեցաւ Աբեններ յականջս Բենիամինի: Եւ գնաց Աբեններ խաւսել յականջս Դաւթի ի Քեբրոն, զամենայն ինչ որ հաճոյ թուեցաւ յաչս Իսրայէլի, եւ յաչս ամենայն տանն Բենիամինի:

20․ Եւ եկն Աբեններ առ Դաւիթ ի Քեբրոն, եւ ընդ նմա քսան այր. եւ արար Դաւիթ Աբեներեայ եւ արանցն որ ընդ նմա խրախութիւն:

21․ Եւ ասէ Աբեններ ցԴաւիթ. Յարեայց եւ գնացից եւ ժողովեցից առ տէր իմ արքայ զամենայն Իսրայէլ, եւ ուխտեցից ընդ քեզ ուխտ. եւ թագաւորեսցես ի վերայ ամենեցուն որոց ցանկայ անձն քո: Եւ առաքեաց Դաւիթ զԱբեններ, եւ գնաց խաղաղութեամբ:

22․ Եւ ահա ծառայք Դաւթի եւ Յովաբ եկին յասպատակէ, եւ աւար բազում ածին ընդ իւրեանս: եւ Յովաբ չէր ընդ Դաւթի ի Քեբրոն յորժամ արձակեաց զնա եւ գնաց խաղաղութեամբ:

23․ եւ Յովաբ եւ ամենայն զաւրն նորա եկին. եւ ազդ եղեւ Յովաբայ եւ ասեն. Եկն Աբեններ որդի Ներեայ առ Դաւիթ, եւ արձակեաց զնա` եւ գնաց խաղաղութեամբ:

24․ Եւ եմուտ Յովաբ առ Դաւիթ արքայ եւ ասէ. Զի՞նչ գործեցեր զայդ, զի եկն Աբեններ առ քեզ. եւ ընդէ՞ր արձակեցեր զնա խաղաղութեամբ:

25․ եթէ ո՞չ գիտիցես զչարութիւն Աբեններեայ որդւոյ Ներեայ. զի խաբել զքեզ եկն, եւ իմանալ զմուտ եւ զել քո. եւ տեղեկանալ ամենայնի զինչ եւ գործիցես:

26․ Եւ ել Յովաբ ի Դաւթէ, եւ արձակեաց հրեշտակս զկնի Աբեններեայ, եւ դարձուցին զնա ի ջրհորոյ անտի Սէիրմայ. եւ Դաւիթ ոչ գիտէր:

27․ Եւ դարձոյց զԱբեններ ի Քեբրոն. եւ խոտորեցոյց զնա Յովաբ ի կողմանց դրանն խաւսել ընդ նմա դաւաճանութեամբ. եւ եհար ընդ սնակուշտն` եւ մեռաւ. վասն արեանն Ասայելի եղբաւր Յովաբայ:

28․ Եւ լուաւ Դաւիթ յետ այնորիկ եւ ասէ. Անպարտ եմ ես եւ թագաւորութիւն իմ ի Տեառնէ մինչչեւ ցյաւիտեան` յարենէն Աբեններեայ որդւոյ Ներեայ:

29․ Հասցեն ի գլուխ Յովաբայ եւ ի վերայ ամենայն տան հաւր նորա. եւ մի պակասեսցէ ի տանէն Յովաբայ սերմնակաթ, եւ բորոտ, եւ մուրաւղ` որ շրջիցի ի ցըպոյ, եւ սրամահ, եւ  սովամահ:

30․ Եւ Յովաբ եւ Աբեսսա եղբայր նորա սպասէին Աբեններայ. փոխանակ զի սպան զեղբայր նոցա ի Գաբաւոն ի պատերազմին:

31․ Եւ ասէ Դաւիթ ցՅովաբ, եւ ցամենայն ժողովուրդն որ ընդ նմա. պատառեցէք զհանդերձս ձեր, եւ զգեցարուք քուրձ. եւ կոծեցարուք առաջի Աբեններեայ: եւ արքայ Դաւիթ երթայր զհետ դագաղացն.

32․ եւ թաղեցին զԱբեններ ի Քեբրոն: եւ ամբարձ արքայ զձայն իւր եւ ելաց ի վերայ գերեզմանի նորա. եւ ելաց ամենայն ժողովուրդն ի վերայ Աբեններայ:

33․ Եւ առ ողբս արքայ ի վերայ Աբեններայ, եւ ասէ. Մի թէ որպէս մեռանիցի՞ անզգամ, մեռաւ Աբեններ. եթէ ըստ մահուանն Նաբաղայ մեռաւ Աբեններ.

34․ ձեռք քո ոչ կապեցան, եւ ոտք քո ոչ աղխեցան ի շղթայս. եւ ոչ մատեար իբրեւ զՆաբաղ առաջի որդւոց անիրաւութեան եւ անկար. այլ որպէս անկանիցին առաջի անիրաւաց անկար: եւ ժողովեցան ամենայն ժողովուրդն լալ զնա:

35․ եւ եկն ամենայն ժողովուրդն տալ ընթրիս Դաւթի` մինչդեռ աւուր կայր: Եւ երդուաւ Դաւիթ եւ ասէ. Աւն եւ աւն արասցէ ինձ Աստուած` եւ աւն եւ աւն յաւելցէ, եթէ ոչ մտանիցէ արեգակն եւ ապա ճաշակեցից հաց, եւ կամ զայլ ինչ ամենայն:

36․ Եւ գիտաց ամենայն ժողովուրդն, եւ հաճոյ թուեցաւ առաջի նոցա ամենայն ինչ զոր արար արքայ առաջի ժողովրդեանն զբարութիւն:

37․ Եւ գիտաց ամենայն ժողովուրդն եւ ամենայն Իսրայէլ յաւուր յայնմիկ` եթէ ոչ յարքայէ եղեւ սպանանել զԱբեններ որդի Ներեայ:

38․ Եւ ասէ արքայ ցծառայսն իւր. Ո՞չ գիտէք եթէ առաջնորդ մեծ անկաւ յաւուր յայսմիկ յԻսրայէլէ:

39․ եւ զի սա` ազգական է այսաւր, եւ յարքայէ կացուցեալ է: եւ արքդ այդոքիկ որդիք Շարուհեայ խստագոյնք քան զիս են. հատուսցէ Տէր չարին ըստ չարութեան իւրում: