Գլուխ 5

1 Եւ եկին ամենայն ցեղքն Իսրայէլի առ Դաւիթ ի Քեբրոն. խաւսեցան եւ ասեն. Ահաւասիկ ոսկերք քո եւ մարմինք քո եմք:

2   եւ յերէկն եւ յեռանտ մինչ էր Սաւուղ թագաւոր ի վերայ մեր, դու էիր որ մուծանէիր եւ  հանէիր զԻսրայէլ. եւ ասաց քեզ Տէր. Դու հովուեսցես ժողովրդեան իմոյ Իսրայէլի, եւ դու լիցիս յառաջնորդ ի վերայ Իսրայէլի:

3   եւ եկին ամենայն ծերքն Իսրայէլի առ արքայ ի Քեբրոն. եւ ուխտեաց ընդ նոսա ուխտ արքայ Դաւիթ ի Քեբրոն առաջի Տեառն: Եւ աւծին զԴաւիթ թագաւոր ի վերայ ամենայն Իսրայէլի:

4   Որդի ամաց երեսնից Դաւիթ ի թագաւորել իւրում. եւ քառասուն ամ թագաւորեաց:

5   եւթն ամ եւ վեց ամիս թագաւորեաց ի Քեբրոն ի վերայ Յուդայ. եւ երեսուն եւ երիս ամս թագաւորեաց ի վերայ ամենայն Իսրայէլի եւ Յուդայ յԵրուսաղէմ:

6   Եւ չոգաւ Դաւիթ եւ արք նորա յԵրուսաղէմ առ Յեբուսացին բնակեալ յերկրին. եւ ասացաւ Դաւթի. թէ Ոչ մտցես դու այսր. քանզի ընդ դէմ դարձան կոյրք եւ կաղք` եւ ասեն. Մի մտցէ այսր Դաւիթ:

7   Եւ առ Դաւիթ զՍիոն եւ զամրոց նորա. այն է քաղաք Դաւթի:

8   Եւ ասէ Դաւիթ յաւուր յայնմիկ. Ամենայն որ հարկանիցէ սրով զՅեբուսացին. եւ մատիցէ սրով եւ ի կաղս եւ ի կոյրս եւ յատելիս անձին Դաւթի: վասն այնորիկ ասեն. Կոյրք եւ կաղք մի մտցեն ի տուն Տեառն:

9   Եւ նստաւ Դաւիթ յամրոցին. եւ կոչեցաւ այն քաղաք Դաւթի. եւ շինեաց զնա քաղաք Դաւիթ, շուրջանակի ծագէ ի ծագ, եւ զտունն իւր:

10   եւ երթալով երթայր Դաւիթ եւ մեծանայր. եւ Տէր ամենակալ էր ընդ նմա:

11   Եւ առաքեաց Քիրամ արքայ Տիւրոսի հրեշտակս առ Դաւիթ, եւ փայտս եղեւնեայ, եւ հիւսունս փայտից, եւ ճարտարապետս քարանց. եւ շինեցին տուն Դաւթի:

12   Եւ գիտաց Դաւիթ եթէ հաստատեաց զնա Տէր թագաւոր ի վերայ Իսրայէլի. եւ թէ բարձրացաւ թագաւորութիւն նորա վասն ժողովրդեան նորա Իսրայէլի:

13   Եւ առ եւս Դաւիթ կանայս եւ հարճս յԵրուսաղէմէ` յետ գնալոյ նորա ի Քեբրոնէ. եւ եղեն Դաւթի եւ այլեւս ուստերք եւ դստերք:

14   Եւ այս են անուանք ծնելոց որդւոց նորա յԵրուսաղէմ: Սամաաթ, Յեսիբաթ, Նաթան, Գաղամաան,

15   Յեբաար, Թեմեսուս, Էլփալատ, Նագեդ, Նափեկ,

16   Յեննաթա, Էղիսամիս, Բաղիգադ, Էղիփալէտ:

17   Եւ լուան այլազգիքն եթէ աւծեալ է Դաւիթ թագաւոր ի վերայ Իսրայէլի, եւ ելին ամենայն այլազգիքն խնդրել զԴաւիթ: Եւ լուաւ Դաւիթ` եւ էջ յամրոցն:

18   եւ այլազգիքն եկին հասին, եւ խառնեցան ի հովիտս Տիտանացն:

19   Եւ եհարց Դաւիթ ի Տեառնէ եւ ասէ. Եթէ ելի՞ց ի վերայ այլազգեացն, եւ մատնեսցե՞ս զնոսա ի ձեռս իմ: եւ ասէ Տէր ցԴաւիթ. Ել. զի մատնելով մատնեցից զայլազգիսն ի ձեռս քո:

20   Եւ եկն Դաւիթ ի վերուստ խրամատիցն, եւ կոտորեաց անդ զայլազգիսն: եւ ասէ Դաւիթ. Տէր խրամատեաց զթշնամիս իմ առաջի իմ, որպէս խրամատիցին ջուրք. վասն այնորիկ կոչեցաւ անուն տեղւոյն այնորիկ ի վերայ խրամատից:

21   եւ թողին անդ զաստուածս իւրեանց, եւ առ զնոսա Դաւիթ եւ արքն որ ընդ նմա, եւ այրեցին զնոսա հրով:

22   Եւ յաւելին այլազգիքն միւս անգամ ելանել, եւ գումարեցան ի հովիտս Տիտանացւոց:

23   Եւ եհարց Դաւիթ ի Տեառնէ եւ ասէ. Եթէ ելի՞ց ի վերայ այլազգեացն, եւ մատնեսցե՞ս զնոսա ի ձեռս իմ: եւ ասէ Տէր. Մի ելաներ ընդ դէմ նոցա, դարձիր ի նոցանէն, եւ եկեսցես ի թեւէ նոցա մաւտ ի Լալաւնսն:

24   եւ եղիցի յորժամ լսիցես զձայն շարժման անտառին Լալաւնից` յայնժամ իջցես առ նոսա. քանզի յայնժամ ելցէ Տէր առաջի քո կոտորել ի պատերազմի այլազգեացն:

25   Եւ արար Դաւիթ որպէս հրաման ետ նմա Տէր. եւ եհար զայլազգիսն ի Գաբաւոնէ մինչչեւ ցԳազերա: