Գլուխ 6

   
1․ Յայնժամ Դարեհ թագաւոր այց արար` խնդրեաց եւ եգիտ ի տունս թագաւորաց գրոց յիշատակարանացն ի Բաբելոնի:

2․ եւ գտեալ յԱմաթստի քաղաքի բատանացւոց` գլուխ մի գրոյ տաւմարի. եւ զայս ինչ գրեալ էր ի գիրս յիշատակարանին:

3․ Յամին առաջնում Կիւրոսի. Կիւրոս թագաւոր հրաման ետ վասն տանն Տեառն որ յԵրուսաղէմ. ասէ. Շինեսցի տաճարն Տեառն, եւ տեղին ուր զոհեն զզոհսն Տեառն: եւ ետ զչափ բարձրութեանն կանգունս վաթսուն, եւ լայնութեանն կանգունս վաթսուն.

4․ եւ կարգք երեք ի զաւրաւոր քարանց. եւ կարգ մի փայտեղէն. եւ այսպէս շինեսցի եւ յարկցի ամենայն տաճարն:

5․ Եւ զկահ տանն Տեառն` զարծաթեղէնս եւ զոսկեղէնս զոր եբեր Նաբուքոդոնոսոր ի տանէ Տեառն յԵրուսաղեմէ` եւ եդ ի Բաբելոն. արդ` տացին ի բաց` եւ տարցին ի տաճարն Տեառն յԵրուսաղէմ. եւ երթեալ տարցին ի տեղի իւր ի տունն Աստուծոյ ուր լեալ էր:

6․ Յայնժամ Դարեհ ետ զգիր հրամանիս իշխանաց կողմանց գետոյն. Սաթրաբուզանայ եւ ծառայակցացն նորա ի կողմանս գետոյն, եւ եւս ի հեռագոյն տեղիս:

7․ Եւ արդ` յայսմ հետէ թոյլ տուք շինել զտունն Աստուծոյ, իշխանացն հրէից եւ ծերոցն Իսրայէլի, եւ շինեսցեն զտունն Աստուծոյ ի տեղւոջ իւրում:

8․ եւ իմ հրամայեալ` մի ոք արգելցէ զծերսն Իսրայէլի ի շինել զտուն տեառն Աստուծոյ իւրեանց: եւ յիշխանութենէ թագաւորութեան իմոյ որ են հարկահանք կողմանց գետոյն ամենայն զգուշութեամբ տացեն զծախս արանցն այնոցիկ` եւ մի խափանեսցեն:

9․ եւ զորդիս ցլուց` եւ խոյս, եւ ամիկս յողջակէզս տեառն Աստուծոյ երկնից. ցորեան, եւ աղ, եւ գինի, եւ ձէթ, որպէսմ եւ հրամայեսցեն քահանայապետքն յԵրուսաղէմ. եւ լիցի անխափան տուեալ աւր ըստ աւրէ որպէս եւ խնդրեսցեն:

10․ եւ մատուսցեն պատարագ ի հոտ անուշից տեառն Աստուծոյ երկնից, եւ արասցեն աղաւթս վասն կենաց թագաւորի` եւ որդւոց նորա:

11․ Եւ յինէն ել հրամանս այս. եւ ամենայն մարդ որ կացցէ ընդդէմ հրամանի իմոյ` քակեսցի տուն նորա, եւ առեալ փայտ ի տանէ նորա ուղղեսցեն` եւ բեւեռեսցեն զայրն ի նմա որ եկաց ընդդէմ հրամանի իմոյ. եւ եղիցի նմա ի նախատինս յաւիտենից:

12․ Եւ Աստուած` որոյ բնակեալ է անուն նորա անդ` ելցէ եւ աւերեսցէ զթագաւորութիւնն եւ զժողովուրդն, որ յանդգնեցաւ ձգել զձեռն իւր եւ արգելուլ ապականել զտունն Աստուծոյ որ յԵրուսաղէմ: ես Դարեհ թագաւոր` եդի զհրամանս զայս, եւ մի ոք իշխեսցէ անցանել:

13․ Յայնմ ժամանակի իշխան կողմանց գետոյն` եւ Սաթրաբուզան եւ ծառայակիցք նորա, առ որս առաքեաց Դարեհ թագաւոր, վաղվաղակի կատարէին զհրամանս նորա:

14․ եւ ծերքն հրէից` եւ ղեւտացիքն շինէին. ի ժամանակս մարգարէութեանն Անգեայ` եւ Զաքարիայ որդւոյ Ադդովայ: Եւ շինեցին եւ հաստատեցին ըստ հրամանին տեառն Աստուծոյ Իսրայէլի. եւ որպէս հրամայեցին Կիւրոս թագաւոր` եւ Դարեհ. եւ ի ժամանակս Արտասասայ թագաւորին Պարսից:

15․ Եւ որ աւր երեք էր ամսոյն Ադարայ` յամին վեցերորդի Դարեհի արքայի կատարեցաւ տաճարն:

16․ Եւ արարին որդիքն Իսրայէլի քահանայքն` եւ ղեւտացիքն, եւ որք ելեալ էին ի գերութենէ նաւակատիս տանն Տեառն մեծաւ ուրախութեամբ:

17․ Եւ մատուցանէին ի նաւակատիս տանն Տեառն զուարակս հարիւր, խոյս երկերիւր, գառինս չորեք հարիւր. եւ ամիկս յայծեաց վասն մեղաց ամենայն Իսրայէլի, երկոտասան` ըստ թուոյ ցեղիցն Իսրայէլի:

18․ Եւ կացուցին զքահանայսն ըստ տեղեաց իւրեանց, եւ զղեւտացիսն ըստ վիճակի բաժանմանն իւրեանց ի սպասաւորութիւն տեառն Աստուծոյ յԵրուսաղէմ. երկու հազար երկերիւր որպէս եւ գրեալ է ի գիրս Մովսիսի:

19․ Եւ արարին որդիքն Իսրայէլի ելեալք ի գերութենէն զզատիկն Տեառն ի չորեքտասաներորդ ամսոյն առաջնոյ:

20․ եւ սրբեցան քահանայքն եւ ղեւտացիք. եւ եղեն ամենեքեան սուրբք. եւ զենին զզատիկն Տեառն, ամենայն որք ելեալ էին ի գերութենէն, եւ եղբարք իւրեանց եւ քահանայք:

21․ եւ կերան որդիքն Իսրայէլի զզատիկն ամենեքեան որք որոշեալ էին ի պղծութեանց ազգաց երկրին. եւ որք եկեալ էին առ նոսա խնդրել զտէր Աստուած Իսրայէլի:

22․ Եւ արարին զտաւն բաղարջակերացն զեւթն աւր, եւ ուրախ եղեն յԵրուսաղէմ. վասն զի ուրախ արար զնոսա տէր Աստուած Իսրայէլի: եւ Տէր դարձոյց զսիրտ թագաւորին ասորւոց առ նոսա զի աւգնեսցէ եւ զաւրացուսցէ զձեռս նոցա ի գործ տաճարին տեառն Աստուծոյ Իսրայէլի: