1. Եւ իբրեւ դադարեաց Յուդիթ յաղաւթից իւրոց, եւ կատարեաց զբանս զայս. եւ յոտն եկաց յերեսացն խոնարհելոց.
2. եւ կոչեաց զնաժիշտն իւր, եւ էջ ի տուն իւր նա ուր կատարէր զաւուրս շաբաթուց, եւ զաւուրս տաւնիցն:
3. Մերկացաւ յիւրմէ զքուրձն զոր զգեցեալն էր, եւ ի բաց եհան զհանդերձն այրութեան իւրոյ, եւ լուաց զմարմինս իւր ջրով, եւ աւծաւ իւղով անուշիւ. եւ եհիւս զհեր գլխոյ իւրոյ, եւ կապեաց զապարաւշն ի ճակատ իւր. եւ զգեցաւ զհանդերձ ուրախութեան իւրոյ, զոր զգենոյր առ կենդանութեամբ առն իւրոյ Մանասէի.
4. եւ ագանէր կաւշիկս ոսկեզաւծս. եւ արկանէր ապարանջանս ի ձեռս իւր, եւ արկանէր քայռս յականց պատուականաց ընդելուզեալս մարգարտով ի պարանոց իւր, եւ մատանիս ի մատունս իւր, եւ զգորշապահանգս ի գլուխ իւր. եւ յաւրինէր կազմէր ամենայն զարդու իւրով, եւ պայծառանայր առաւել յոյժ առ ի խաբել եւ պատրել զամենեսին ի գեղ երեսաց իւրոց` որ տեսանիցեննզնա:
5. Եւ ետ ցաղախինն իւր զմախաղն. եւ ելից զնա փոխնդով եւ պաղատակաւք եւ հացիւք սրբովք. եւ զհադաղակն գինւոյ, եւ զսրուակն իւղոյ. եւ սրբէր կազմէր զամենայն ըստ աւրինին իւրեանց, եւ տայր ցաղախինն իւր:
6. Եւ ելին նոքա ընդ դուռն քաղաքին Բետիղուայ. եւ տեսին անդ զՈզիա զի կայր առ դրանն` եւ զայլ քահանայս քաղաքին ընդ նմա, եւ զՔարբին, եւ զՔարմին:
7. Եւ իբրեւ տեսին նոքա զՅուդիթ` զի էր փոխեալ նորա զգեղ երեսաց իւրոց` եւ զգեստ հանդերձին իւրոյ, զարմացան նոքա ընդ գեղ նորա յոյժ:
8. եւ ասեն ցնա. Աստուած Աստուած հարցն մերոց տացէ քեզ շնորհս, եւ կատարեսցէ զկամս սրտի քոյ ի ցնծութիւն եւ յուրախութիւն որդւոցն Իսրայէլի, եւ ի բարութիւն Երուսաղէմի: եւ երկիր պագին Աստուծոյ:
9. Եւ ասէ ցնոսա Յուդիթ. Հրամայեցէք ինձ բանալ զդրունս քաղաքիս, զի ելից ես` կատարել զբանս զոր խաւսեցայք ընդ իս: եւ հրամայեցին դռնապանացն բանալ, որպէս եւ խաւսեցանն` եւ արարին
այնպէս:
10. Եւ ել Յուդիթ ինքն եւ աղախինն իւր ընդ նմա: եւ միտ դնէին նմա արք քաղաքին յերթալն նորա, մինչչեւ եղեւ նա ընդ լերամբն, մինչչեւ անց նա ընդ ծործոր հովտին. եւ ապա ոչ եւս տեսին զնա:
11. Եւ երթային նոքա ընդ ծործոր հովտին ուղիղ ընդ ճանապարհն: եւ պատահեցին նոցա պահապանքն
ասորեստանեայցն,
12. եւ կալան զնոսա. հարցին եւ ասեն. Ո՞յր ես դու` եւ ուստի գաս, կամ յո՞ երթաս: Եւ ասէ ցնոսա Յուդիթ. Դուստր եմ ես եբրայեցւոց, եւ փախուցեալ եմ ես յերեսաց նոցա, զի մատնելոց են նոքա ի կերակուր ձեզ.
13. եւ ես եկի կալ առաջի Հողոփեռնեայ իշխանի զաւրաց ձերոց` պատմել նմա զբանս ճշմարտութեան, եւ ցուցանել նմա զճանապարհն ընդ որ երթայցէ, եւ տիրեսցէ ամենայն լեռնային կողմանցն. եւ ոչ միում ումեք լիցի վնաս ի զաւրաց դորա:
14. Եւ իբրեւ լուան արքն զբանսս Յուդթայ, եւ նայեցան նոքա յերեսս նորա, եւ էր առաջի նոցա գեղեցկութիւն յոյժ. եւ ասեն ցնա.
15. Ապրեցուցեր դու զանձն քո այսաւր. արդ փութա դու իջանել տեսանել զերեսս տեառն մերոյ, եւ մատիցես դու առ խորան նորա մեւք հանդերձ, եւ տացուք զքեզ ի ձեռս նորա:
16. եւ յորժամ կացցես առաջի նորա, մի երկնչիցիս ի սրտի քում, այլ պատմեսցես դու նմա ըստ բանիցդ այդոցիկ. եւ բարի արասցէ քեզ: Եւ ընտրեցին յիւրեանց արս հարիւր` եւ յղեցին ընդ նմա: եւ ածին զնոսա ի խորանն Հողոփեռնեայ. եւ պատմեցին զգեղեցկութիւն նորա, եւ զգալն` յամենայն բանակին. եւ գային ի տեսանել զնա մինչդեռ կայր արտաքոյ խորանին Հողոփեռնեայ, մինչդեռ պատմէին Հողոփեռնեայ.
17. եւ զարմանային յոյժ ընդ գեղեցկութիւն նորա, եւ ընդ ամենայն որդւոցն Իսրայէլի:
18. Եւ ասեն այր ցընկեր իւր. Իսկ արդ ո՞ կարէ չար ինչ խորհել ի վերայ ազգիս այսորիկ որք ունին զայդպիսի գեղեցկութիւն կանայք նոցա: արդ` ոչ պարտին ապրել արք նոցա, զի եղիցին դստերք նոցա մեզ կնութեան. զի թէ ապրեն` վնաս են նոքա ամենայն երկրի: Եւ ելին սպասաւորքն Հողոփեռնեայ եւ ամենայն ծառայք նորա, եւ տարան զնա ի խորանն:
19. եւ Հողոփեռն նստէր ի գահոյսն իւր. եւ էր փակեալ զնա վարագուրաւք շուրջանակի. զորս էր ընդելուզեալ ոսկւով եւ մարգարտով` եւ ակամբք պատուականաւք: Եւ իբրեւ լուաւ նա զՅուդթայ, ել նա արտաքս ի սրահ խորանին ջահիւք եւ լապտերաւք արծաթեաւք, քանզի գիշեր էր:
20. եւ իբրեւ ետես զնա Հողոփեռնէս, զարմացաւ ընդ տեսիլ գեղոյ նորա: Եւ անկեալ ի խոնարհ երկիր պագանէր Յուդիթ Հողոփեռնեայ. եւ կանգնեցին զնա ծառայք նորա:
Հաղորդում կայքում սխալի վերաբերյալ
Տվյալ հատվածում առկա է սխալ: