1. Եւ իբրեւ երեկոյ եղեւ փութացոյց զծառայսն իւր գնալ արտաքս. եւ Բագու փակեաց զդուրս խորանին: եւ գնացին նոքա յիւրաքանչիւր անկողինս իւրեանց արտաքոյ քան զխորանն.
2. քանզի էին ամենեքեան խոնջք եւ վաստակք ի բազում գիներբուաց անտի:
3. եւ մնացին Յուդիթ եւ Հողոփեռնէս միայն ի խորանին:
4. Եւ Հողոփեռնէս մտեալ ի գահոյս իւր ի քուն եղեւ, եւ էր թմբրեալ յոյժ ի գինւոյ անտի:
5. Եւ ասէ Յուդիթ ցաղախինն իւր. Զի կացցէ արտաքոյ խորանին եւ սպասեսցէ նմա` յորժամ ելանիցէ արտաքս որպէս եւ յայլ աւուրսն. զի ասաց նմա թէ երթամ կալ յաղաւթս ըստ սովորութեանն. եւ ընդ Բագուայ խաւսեցաւ ըստ բանիցս այսոցիկ:
6. եւ գնացին ամենեքեան ի սենեկէ անտի, եւ ոչ ոք մնաց ամենեւին անդ: Եւ եկաց Յուդիթ առ գահոյս նորա` եւ ասէ. Տէր Աստուած զաւրութեանց` նայեաց ի ժամուս յայսմիկ ի գործս ձեռաց իմոց` եւ ի բարձրութիւն Երուսաղէմի.
7. զի այժմ է ժամանակ այց առնել քեզ ժառանգութեան քում, եւ առնել զգործս զայս ի ձեռս իմ, ի սատակումն թշնամեաց մերոց որք յարուցեալ են ի վերայ մեր:
8. Եւ մատեաւ առ քանուն գահոյիցն, որ էր ընդ սնարսն Հողոփեռնեայ, եւ եհան զդաշոյն նորա յազդերէ նորա.
9. եւ կալաւ զհերաց նորա` եւ ասէ. Զաւրացո զիս Աստուած Իսրայէլի յաւուրս յայսմիկ:
10. Եւ եհար ի պարանոցի նորա երկիցս զաւրութեամբ իւրով: եւ հատեալ եբարձ զգլուխ նորա.
11. եւ թաւալեցոյց ընկէց զմարմին նորա ի գահոյից անտի: եւ յետ ժամու միոջ` ել եւ ետ նաժշտին իւրում զգլուխն Հողոփեռնեայ.
12. եւ ընկէց ի մախաղ կերակրոյն իւրոյ: Եւ ելին երկոքին ի միասին ըստ սովորութեանն իւրեանց, եւ անցին նոքա ըստ բանակն, եւ շրջեցան եկին ընդ ձորն. եւ ելին նոքա ի լեառնն Բետիղուայ.
13. եւ եկին նոքա ի դրունս քաղաքին: Եւ ասէ Յուդիթ ի հեռաստանէ ցպահապանս դրանցն. Բացէք բացէք արդ զդրունսդ, զի ընդ մեզ է տէր Աստուած մեր, արասցէ եւս զաւրութիւն յԻսրայէլի, եւ ի բեկումն թշնամեաց մերոց. որպէս եւ արար այսաւր:
14. Եւ եղեւ իբրեւ լուան արք քաղաքին նորա զձայն նորա, փութացան իջանել ի դրունս քաղաքին իւրեանց. եւ կարդացին նոքա զքահանայսն եւ զծերս ժողովրդեանն:
15. եւ ժողովեցան ի փոքուէ մինչչեւ ցմեծամեծս, քանզի զարմացեալ էին նոքա յոյժ ընդ գնալն նորա: Եւ բացին զդուռն քաղաքին, եւ առին զնոսա ի ներքս.
16. եւ լուցին զլապտերս իւրեանց, եւ կացին շուրջ զնոքաւք:
17. Եւ ասէ Յուդիթ բարձրաձայն բարբառով. Որդիք Իսրայէլի աւրհնեցէք զԱստուած,
18. որ ոչ մերժեաց զողորմութիւն իւր ի տանէս Իսրայէլի. այլ եհար վանեաց զթշնամիս մեր ի ձեռն իմ ի գիշերիս յայսմիկ:
19. Եւ եհան զգլուխն ի մախաղէն եւ եցոյց նոցա. եւ ասէ ցնոսա. Ահաւասիկ գլուխն Հողոփեռնեայ զաւրագլխի զաւրացն Ասուրայ. եւ ահա վարագոյրքն պատուականք ընդ որով անկեալ դնէր յարբեցութեան իւրում` եւ սատակեաց զնա տէր Աստուած ի ձեռն կնոջս:
20. Կենդանի է Տէր որ պահեաց զիս ի ճանապարհին յայնմիկ յորում գնացին. զի խաբեաց զնա տեսիլ երեսաց իմոց ի կորուստ նմին, եւ ոչ արար նա ընդ իս պղծութիւն ի նախատինս անձին իմոյ:
22. Եւ գոհացան ամենայն ժողովուրդքն, եւ խոնարհեալ երկիր պագին Աստուծոյ. եւ ասեն միաձայն ամենեքին. Աւրհնեալ ես դու տէր Աստուած մեր, որ յամաւթ արարեր այսաւր զթշնամիս ժողովրդեան քոյ:
23. Եւ ասէ Ոզիա ցՅուդիթ. Աւրհնեալ ես դու դուստր` յԱստուծոյ բարձրելոյ, քան զամենայն կանայս որ ի վերայ երկրի.
24. եւ աւրհնեալ տէր Աստուած որ արար զերկինս եւ զերկիր. որ յաջողեացն քեզ ի վերայ գլխոյ իշխանիդ այդորիկ թշնամւոյ մերոյ:
25. եւ ոչ պակասեսցէ անունդ քո ի մարդկանէ, առ ի յիշելոյ զքեզ առաջի Աստուծոյ մինչչեւ յաւիտեան. եւ արասցէ զքեզ տէր Աստուած իմ ի բարձրութիւն անձին քո. եւ այցելու լիցի քեզ ի բարիս. փոխանակ զի ոչ խնայեցեր դու յանձն քո վասն տառապանաց ազգի մերոյ. այլ խնդրեցեր զվրէժ կործանման հարուածոցս մեր. գնացեալ քո ուղիղ զճանապարհս առաջի Տեառն մերոյ:
26. Եւ ասէ ամենայն ժողովուրդն. Եղիցի եղիցի:
Հաղորդում կայքում սխալի վերաբերյալ
Տվյալ հատվածում առկա է սխալ: