Գլուխ 15

   
1. Եւ իբրեւ լուան որք ի վրանսն էին, յիմարեցան վասն իրացն որ եղեն:

2. եւ անկաւ ի վերայ նոցա ահ եւ դողումն յոյժ. եւ ապա ոչ մնացին ամենեւին այր ընկերի իւրում:

3. եւ հեղեալք զբաղեալք առ հասարակ ի փախուստ դարձան ի դաշտակողմանն եւ ի լեռնակողմանն

4. շուրջ զԲետիղուա. եւ դարձեալ անտի փախստեայք լինէին: եւ ապա ամենայն այր պատերազմաւղ որդւոցն Իսրայէլի յարձակեցան ի վերայ նոցա:

5. Եւ առաքեաց Ոզիա ի Բետմեսթեմ, եւ ի Քոբա, եւ ի Կովլա, եւ յամենայն սահմանս Իսրայէլի աւետաւորս վասն իրացն որ եղեն. զի ամենեքին առ հասարակ ժողովեսցին եւ մտցեն զհետ նոցա սատակել զնոսա:

6. Եւ իբրեւ լուան որդիքն Իսրայէլի, ամենեքեան առ հասարակ յարձակէին անկանէին ի վերայ նոցա, եւ կոտորէին հարկանէին զնոսա մինչչեւ ի Քոբա. սոյնպէս եւ երուսաղէմացիքն առնէին: եւ ամենեքեան որք ի լեռնակողմանցն եկեալ էին` պատմեցին նոցա որ եղեւ ի բանակին. եւ որք ի Գաղաադն էին, եւ որք ի Գալիլեայ, հասանէին հարկանէին վանէին զնոսա, մինչչեւ անցուցանէին զնոսա ընդ Դամասկոս եւ ընդ սահմանս նորա:

7. Եւ այլ բնակիչքն Բետիղուայ ելանէին անկանէին ի վերայ բնակչացն բնադրացն Ասուրայ, աւար հարկանել ժողովել զառ եւ զապուռ բանակացն, յորս յղփացան լցան մեծացան յոյժ բնակիչքն Բետիղուայ:

8. Եւ որդիքն Իսրայէլի դարձան ի կոտորածէ անտի. եւ սկսանէին ժողովել զկապուտ կողոպուտ զանկելոցն: եւ գեաւղքն եւ ագարակքն լեռնակողմանցն եւ դաշտականացն եկեալ առնուին զմնացորդս յոյժ աւարացն:

9. Եւ Յովակիմ քահանայ մեծ` եւ ծերակոյտ որդւոցն Իսրայէլի որք բնակեալ էին յԵրուսաղէմ, եկին տեսանել զբարութիւնսն զոր արար տէր Աստուած Իսրայէլի, եւ տեսանել զՅուդիթ` եւ խաւսել ընդ նմա զխաղաղութիւն:

10. Եւ իբրեւ մտեալ տեսին զնա` աւրհնեցին զնա ամենեքեան միաբան` եւ ասեն ցնա. Դու բարձրութիւն Երուսաղէմի. դու ցնծութիւն Իսրայէլի. դու պարծանք ազգիս մերոյ.

11. զի արարեր զայս ամենայն բարութիւնս ձեռաւք քովք Իսրայէլի. եւ հաճեցաւ ընդ նոսա Աստուած. եւ աւրհնեալ եղիջիր դու յամենակալէն Աստուծոյ մինչչեւ յաւիտեան.

12. եւ ասէ ամենայն ժողովուրդն. Եղիցի:

13. Եւ ժողովուրդն կրէին զաւար բանակին զաւուրս երեսուն: եւ ետուն Յուդթայ զխորանն Հողոփեռնեայ, եւ զամենայն արծաթ խորանին` եւ զգահոյսն. եւ զամենայն զսպասսն ոսկւոյ եւ զարծաթոյ նորա: եւ նորա առեալ կուտէր զայն ի սայլս իւր, եւ ի վերայ գրաստուց իւրոց եւ բերէր ի ներքս ի քաղաքն:

14. Եւ եկին առ նա ամենայն կանայք որդւոցն Իսրայէլի տեսանել զնա. եւ աւրհնեցին զնա. եւ նուագէին նմա երգս պարուք: եւ առեալ նորա ոստս արմաւենեաց եւ ձիթենեաց ծաղկաւք հանդերձ, եւ տայր նոցա:

15. Եւ այլ եւս կանայք մեծամեծք տեղեացն գային գունդագունդք` գովել զնա: եւ ամենայն Իսրայէլ զկնի երթային նոցա վառեալք եւ կազմեալք` պսակս գունակս գունակս ի գլուխս իւրեանց. եւ աւրհնութիւնք ամենեցուն ի բերանս իւրեանց փառաւորել զԱստուած: