Գլուխ 3

   
1. Եւ առաքեցին առ նա` խաւսել ընդ նմա բանիւք խաղաղութեան, եւ ասեն.

2. Ահաւասիկ մեք ծառայք Նաբուքոդոնոսորայ եմք, եւ կացեալ եմք առաջի քո, արա ընդ մեզ` որպէս եւ հաճոյ թուի քեզ:

3. զի ահա տունք մեր, եւ ամենայն դաշտք ցորենոյ, եւ հաւտք եւ անդեայք` եւ ամենայն գոմք խաշանց մերոց` առաջի աչաց քոց, արա որպէս եւ բարի թուի քեզ. զի ահա եւ քաղաքք մեր` եւ բնակիչք նոցա ծառայք քո եմք, եկ մուտ ի սոսա, որպէս եւ բարի թուի քեզ:

6. Եւ եկին արք հրեշտակք առ Հողոփեռնէս, եւ պատմեցին նմա ըստ բանիցս ըստ այսոցիկ:

7. եւ էջ ի ծովեզրն ինքն եւ զաւրք իւր, եւ պահապանս կացուցանէր ի քաղաքս բարձունս: Եւ առ նա ի քաղաքաց անտի արս ընտիրս պատերազմակիցս իւր:

9. եւ ելին ընդ առաջ նորա քաղաքքն այնոքիկ

10. երգովք եւ պսակաւք` եւ ծնծղայիւք եւ թմբկաւք:

11. եւ փորեաց նա զսահմանս նոցա. եւ ի բաց ընկէց զամենայն զանտառ նոցա:

12. Եւ էր հրաման տուեալ նմա սատակել զաստուածս երկրին.

13. զի միայն Նաբուքոդոնոսորայ պաշտաւն տարցին ամենայն ազգք եւ ազինք. կարդասցեն զնա Աստուած:

14. Եւ եկն նա դէմ յանդիման Եղրայելոմեայ, որ մերձ էր առ բնակիչսն, որ է դէմ յանդիման սարոյն մեծի Հրէաստանի:

15. եւ բանակեցաւ նա ի մէջ Գայեայ եւ Բիշանու. եւ եղեւ անդ` ամիս մի ժողովել ռոճիկս եւ դարմանս զաւրաց իւրոց: