10. Եւ յիշեսցէ զուխտ կտակարանացն որ ընդ հարսն մեր է, եւ բեկցէ զզաւրս զայս առաջի ոտից մերոց:
11. Գիտասցեն հեթանոսք եթէ գոյ Աստուած որ փրկէ զԻսրայէլ:
12. Եւ ամբարձին զաչս իւրեանց յայլազգիքն, եւ տեսին զի յարձակեալ գային ընդդէմ նոցա,
13. եւ ելին յառաջ քան զգունդն ի պատերազմ: Փող հարին ի կողմանցն Յուդայի.
14. ի մի վայր ժողովեցան, ի վերայ յարձակէին. ձեռն ի գործ առնէին, ի փախուստ դարձուցանէին:
15. զբազումս առ ետեղ սատակէին. զբազումս փախստականս առնէին ընդ երեսս դաշտին, ի սուր սուսերի իւրեանց անկանէին` մինչ ի սահմանս Գազիրոնայ, ի կողմանս Եդոմայեցւոց, եւ յԱզովտայ, եւ Յամենայ: Եւ անկանէին յաւուր յայնմիկ վիրաւորք իբրեւ երեք հազարք այր:
16. Եւ դառնայր Յուդա զաւրաւքն հանդերձ. իբրեւ գայր հասանէր ի տեղի պատերազմին,
17. խաւսել սկսաւ ընդ զաւրսն` եւ ասէ. Մի ինչ աչս արձակէք դուք յաւար ի կապուտ դիականցն անկելոց.
18. զի դեռ աւանիկ Գորգիոս վառեալ պատրաստեալ` ընդդէմ կայ մեր զաւրաւք իւրովք. այլ կացէք կալարուք զտեղի, զդէմ կալարուք թշնամեաց ձերոց. ապա յետ մարտին յաղթութեան դարձջիք համարձակութեամբ:
19. Մինչդեռ նա զայն ընդ նոսա խաւսէր` տեսին զի գունդ մի երեւեցաւ ի լեռնէ անտի:
20. Եւ գիտացին եթէ ի պարտութիւն մատնեալ հուր արկանել սկսան ի բանակի անդ. եւ ծուխն որ դիզանէր` նշան լինէր գործոյն եղելոց:
21. Նոքա իբրեւ զայն տեսանէին` կասէին. մանաւանդ իբրեւ հայէին ի գունդն յուդայեան, որպէս ճակատեալ կայր պատրաստութեամբ ի մարտ պատերազմի:
22. Զոտս արձակէին, փախստեայ գնային յերկիրն Փղշտացւոց:
23. Եւ Յուդա դառնայր ի տեղին պատերազմի, ի կապուտ կողոպուտ յաւար դիականցն անկելոց. եւ առնոյր ի բանակէ անտի նոցա զոսկի եւ զարծաթ`զհանդերձս պատուականս, զկարմիր, զկապուտակ, զծովու ծիրանիս, մեծութիւն բազում:
24. Եւ իբրեւ դարձան անտի, սկսան գոհանալով աւրհնել զՏէր յերկինս, եւ ասել. Զի բարի է` զի յաւիտեան է ողորմ նորա:
25. Եւ եղեւ ի փրկութիւն մեծ ի վերայ Իսրայէլի յաւուր յայսմիկ:
26. Եւ որք միանգամ յայլազգեաց անտի ապրեցան, եկեալ պատմէին Լիւսւայ զամենայն գործն որ գործեցաւ:
27. Իբրեւ զայն լսէր Լիւսիայ` տրտմէր, խոնարհէր անկանէր ի վերայ երեսաց իւրոց. զի ոչ այնպէս կամք կատարեցան որպէս նա խորհէր ի վերայ իսրայէլացւոցն, եւ որպէս նմա ետ պատուէր թագաւորն, այն` ոչ կատարեցաւ:
28. Ի գալուստ ամին միւսոյ, զաւր հատանէր, այրեւձի առնէր` իբրեւ վեց հազար հետեւակ, հինգ հազար հեծեալ սպառազէն. գալ հասանել` աւար առնուլ զերկիրն Հրէաստանի:
29. Եկին հասին` ճակատեցան ի կողմանս Բեթսովրայ: Ել նոցա ընդ յառաջ Յուդա մետասան հազար արամբ:
30. Եւ իբրեւ տեսին զգունդն ստուար եւ հզաւր. սկսան կալ յաղաւթս, աւրհնել զԱստուած` եւ ասեն. Տէր Աստուած` դու այն ես որ խորտակեցեր զզաւրութիւն յարձակելոյ հզաւրին ի ձեռն ծառայի քոյ Դաւթի, եւ մատնեցեր զբանակս այլազգեաց ի ձեռս Յովնաթանու որդւոյ Շաւուղի:
31. Արդ` խորտակեա դու զզաւրութիւն զաւրացս այսոցիկ ի ձեռս Իսրայէլի: Շիջցի զաւրութիւն նոցա երիվարաւք եւ զաւրաւքն հանդերձ:
32. Արկ զնոքաւք զվատութիւն, եւ հալածեա զզաւրութիւն հպարտութեան նոցա. շարժեսցին նոքա ի բեկումն իւրեանց:
33. Կործանեսցես արկցես զնոսա ի սուր սիրելեաց քոց. եւ աւրհնեսցեն զքեզ յաւրհնութիւնս որ ճանաչեն զանուն քո:
34. Եւ հարան միմեանց ի դիմի. եւ անկան ի ժամանակին յայնմիկ ի գնդէ անտի Լիւսիայ` հինգ հազար հեծեալ առաջի նոցա:
35. Եւ իբրեւ ետես Լիւսիա զպարտութիւն գնդին իւրոյ, եւ զյաղթութիւն քաջութեան գնդին Յուդայ, եւ որպէս զի պատրաստ էին ի կեալ եւ ի մեռանել ի վերայ անուան քաջի յաղթութեան. չուեաց խաղաց գնաց ի կողմանս Անտիոքացւոց: Դարձեալ զաւրաժողով լինէր, կազմել պատրաստել անդէն. անդրէն արշաւել ի կողմանս Հրէաստանի:
36. Խաւսել սկսաւ Յուդա եղբարբքն հանդերձ ընդ ժողովուրդսն` եւ ասէ. Ահաւասիկ խորտակեցան թշնամիք մեր ի ներքոյ ոտից մերոց. եկայք երթիցուք մաքրեսցուք զսրբութիւնսն, մաքրեսցուք զտաճարն առնել նաւակատիս ի նմա:
37. Ժողովեցան ժողովքն ամենայն, եկին հասին ի լեառն Սիոն.
38. տեսին զսրբութիւնսն աւերեալ, եւ զսեղանն աղտեղեալ, զդրունսն այրեցեալ, թուփ առ թուփ բուսեալ ի սրահսն իբրեւ յանտառի, կամ իբրեւ միոյ միոյ լերանց. զկոնքս աւերեալս, եւ զվարագոյրաձիգսն խաթարեալս:
39. Ձեռս զաւձեաւք արկանէին, զպատմուճանս պատառէին, հող ի գլուխ լինէին,
40. ընդ երկիր թաւալէին. փողանշանս հարկանէին, յերկինս աղաղակէին:
41. Յայնմ ժամանակի հրաման տայր Յուդա` զաւրահատոյց առնէր ի վերայ միջնաբերդին պաշարել զնա, զի մաքրեսցէ զսրբութիւնսն:
42. Եւ ընտրեաց նա քահանայս անարատս, կամարարս աւրինացն:
43. Եւ սրբեաց զսրբութիւնն. եւ ի բաց առին զվէմսն` որ պղծեալ էին, եդին մեկուսի ի տեղի մի.
44. Եւ խորհուրդ կալան ի վերայ սեղանոյ ողջակիզացն, որ պղծեալ էր ի թշնամեաց անտի, եթէ զի՞նչ արասցեն զնա:
45. Հաստատեցաւ բանս այս ի խորհրդի անդ, քակել զսեղանն զի պղծեալ էր ի թշնամեաց. զի մի լիցի նոցա այն ի խիղճ մտաց, եւ ի նախատինս յաւիտենից: Եւ քակեցին զսեղանն.
46. եւ տարան եդին զքարինսն ի դիպան տեղւոջ, մինչչեւ եկեսցէ մարգարէ եւ խաւսեսցի վասն նոցա:
47. Եւ առին վէմս անկոփս ըստ աւրինացն, եւ շինեցին զսրբութիւնսն:
48. Եւ ոչինչ էր ի ներքս ի տաճարի անդ: Եւ զսրահսն սրբեցին:
49. Եւ սպաս սրբութեան նոր գործեցին. եւ տարան ի ներքս զաշտանակն լուսոյ, եւ զսեղանն խնկոց, եւ զսեղանն տաճարին:
50. Եւ արկանէին խունկս ի վերայ սեղանոյն. ճրագս լուցանէին, եւ լոյս տային տաճարին:
51. Դնէին ի վերայ սեղանոյն զհացն հանապազորդ. եւ ձգէին զվարագոյրսն, եւ կատարէին զգործսն զամենայն սպասուն զոր առնէին:
52 Կանխէին ընդ առաւաւտն յաւուրն քսաներորդի հինգերորդի` յամսեանն իններորդի. յամին հարիւրորդի քառասներորդի.
53 մատուցանէին պատարագ ըստ աւրինացն ի վերայ սեղանոյ ողջակիզացն, որոյ նոր արարին ըստ ժամանակին:
54 Յաւուրսն յայնոսիկ յորս պղծեցին հեթանոսքն, ի նմին ժամանակի եւ նորոգեցաւ յերգս աւրհնութեան, ի փող եւ ի քնար եւ ի սրինգ:
55. Եւ անկանէին ամենայն ժողովուրդքն ի վերայ երեսաց իւրեանց, անկանէին ի խոնարհ, երկիր պագանէին. աւրհնէին զԱստուած յերկինս որ յաջողեաց նոցա:
56. Եւ արարին զնաւակատիս սեղանոյն աւուրս ութ. եւ մատուցին զողջակէզսն ուրախութեամբ եւ մատուցին պատարագս փրկութեան եւ աւրհնութեան:
57. Զարդարեցին զկոնքսն` եւ զվարագոյրաձիգսն` յանդիման տաճարին, ոսկի պսակաւք` եւ ոսկւովք տապակաւք. եւ նորոգեցին զդրունսն, եւ կանգնեցին զդրունսն:
58. Եւ եղեւ ուրախութիւն մեծ ի վերայ ժողովրդեանն յոյժ. եւ ջնջեցան նախատանք հեթանոսաց ի նոցանէ:
59. Եւ հաստատեաց Յուդա եղբարբքն հանդերձ, եւ ամենայն ժողովքն իսրայէլացւոց, հանապազ կացցեն աւուրքս այս նաւակատեաց սեղանոյն ի ժամանակի իւրեանց տարոջէ ի տարի, ի գլուխ տարեկանի աւուրս ութ ի հինգերորդ քսաներորդ` իններորդի ամսոյն` ուրախութեամբ եւ ցնծութեամբ:
60. Եւ շինեցին նոքա ի ժամանակին յայնմիկ զլեառն Սիոն շուրջանակի, ի պարիսպս բարձրացեալս, եւ յաշտարակս ամրացեալս, գուցէ գայցեն հեթանոսք, եւ կոխան առնիցեն զդոսա. որպէս արարին զառաջինն:
61. Եւ զաւր թողոյր ի վերայ` պահապան նմա. եւ ամրացոյց զնա: Պաշարել զԲեթսուրա. զի լիցի ամրութիւն զաւրացն ի կողմանցն Եդոմայեցւոց:
Հաղորդում կայքում սխալի վերաբերյալ
Տվյալ հատվածում առկա է սխալ: