1. Եւ յորժամ դադարեցին ի խաւսելոյ իւրեանց, որ շուրջ էին զխորանաւն իւրեանց. եւ ասէ Հողոփեռնէս զաւրագլուխ զաւրացն Ասուր` ցԱքիովր, առաջի ամենայն զաւրացն այլացգեաց. Ո՞վ ես դու Աքիովր, որ դիմակաց ես ժողովրդեանն այլազգեաց ամենեցուն` եւ առ որդիս Մովաբայ, եւ որ վարձկանքս են յԵփրեմայ.
2. զի մարգարէացար մեզ որպէս եւ աւրս այս, եւ ասես եթէ մի տացուք պատերազմ ընդ որդիսն Իսրայէլի. զի աստուածն նոցա պաշտպանէ նոցա. եւ ո՞վ է աստուած բաց ի Նաբուքոդոնոսորայ: նա առաքէ զզաւրութիւն իւր, եւ սատակէ զնոսա յերկրէ. եւ ոչ փրկէ զնոսա աստուածն նոցա:
3. Այլ մեք ծառայք նորա վանեմք զնոսա իբրեւ զայր մի. եւ ոչ կարասցեն կալ ընդդէմ հեծելազաւր երիվարաց մերոց, եւ ջնջեսցուք զնոսա նոքաւք. եւ զլերինս նոցա արբուցանեմք յարենէ նոցա. եւ դաշտք նոցա լցցին դիակամբք նոցա. եւ ոչ եւս կարասցեն կալ առաջի մեր, այլ կորնչելով կորնչիցին.
4. ասէ արքայ Նաբուքոդոնոսոր տէր ամենայն երկրի. քանզի ասաց` եւ ոչ ընդունայնացան բանք բերանոյ նորա:
5. Այլ դու Աքիովր վարձկան Ամոնայ` եւ խաւսեցար զբանս զայս յանիրաւութեան քում. եւ ոչ եւս յաւելցես տեսանել զերեսս իմ յաւրէս յայսմանէ մինչչեւ խնդրեցից վրէժ յազգէն որ յԵգիպտոսէն ելին. եւ ապա անցցէ սուր զաւրաց իմոց ընդ կողս քո.
6. եւ կործանեսցիս ընդ վիրաւորս բազումս յորժամ դարձայց: այլ այժմ դարձուսցեն զքեզ ծառայք իմ ի լեռնակողմն` եւ պահեսցեն զքեզ յանցս քաղաքի միոյ որ յանցս ճանապարհացն է, եւ մի կորնչիցիս մինչչեւ սատակեսցիս նոքաւք հանդերձ. եւ եթէ յուսաս սրտիւ քով եթէ ոչ մտանին` յայդ ինչ մի վստահ լինիցիս. զի խաւսեցայ` եւ ոչ անցանէ բան մի ի բանից իմոց:
7. Եւ ետ հրաման Հողոփեռնէս ծառայից իւրոց որ կային առաջի նորա, կապել զԱքիովր, եւ տանել զնա ի Բետիուղա, եւ մատնել զնա ի ձեռս որդւոցն Իսրայէլի:
8. եւ կալան զնա ծառայք նորա, եւ ածին զնա արտաքոյ բանակին ի դաշտ անդր, եւ գնացին նոքա ի դաշտէ անտի, եւ եկին ի լեռնակողմն աղբերցն ի ներքոյ Բետիուղայ, որ է Շամրին: Եւ իբրեւ տեսին զնոսա արք քաղաքին ի վերայ գլխոյ լերինն, առին նոքա զզէնս իւրեանց եւ յարձակեցան ի վերայ նոցա ի գլուխ լերինն. եւ ամենայն այր պարսաւոր կալան զելս նոցա եւ քարաձիգ արարին ի վերայ նոցա:
9. եւ մտին նոքա ընդ լեռնոտամբն, եւ կապեցին զԱքիովր, եւ ընկեցին զնա առ լեռնոտինն. եւ նոքա գնացին դարձան առ տէրն իւրեանց:
10. Եւ իջին որդիքն Իսրայէլի ի քաղաքէ անտի եւ հասին ի վերայ նորա` եւ լուծին զնա, եւ տարան ի Բետուղա. եւ կացուցին զնա ընդ իշխանս քաղաքին իւրեանց
11. որք էին յաւուրսն յայնոսիկ` Ոզիա որդի Միքեայ յազգէ Շմաւոնի, եւ Քարմի որդի Եղքիէլի:
12. Եւ ժողովեցին զամենայն զծերս քաղաքին` եւ զամենայն երիտասարդս, եւ զամենայն կանայս յեկեղեցին. եւ կոչեցին զԱքիովր ի մէջ ամենայն ժողովրդեանն. եւ հարցանէր զնա Ոզիա. Եթէ վասն է՞ր եղեւ ընդ քեզ այդ անցք. եւ նա տայր պատասխանի, եւ պատմէր զբանս խորհրդոյն Հողոփեռնեայ. եւ զամենայն բանսն զոր խաւսեցաւ ինքն ի մէջ իշխանացն որդւոցն Ասուր.
13. զոր ինչ միանգամ մեծաբանեալ խաւսեցաւ Հողոփեռնէս վասն տանն Իսրայէլի:
14. Եւ ի գուճս իջեալ ամենայն ժողովուրդն երկրին երկիր պագանէին Աստուծոյ, աղաղակէին եւ ասէին.
15. Տէր Աստուած երկնից` տես զամբարտաւանութիւն նոցա, եւ ողորմեաց խոնարհութեան ազգիս մերում, եւ նայեաց ի սրբութիւն քո Տէր յաւուրս յայսմիկ.
16. եւ աղաչեցին: Եւ մխիթարեցին զԱքիովր, եւ գովեցին յոյժ զնա:
19. եւ առ զնա Ոզիա յեկեղեցւոյ անտի եւ տարաւ ի տուն իւր.
20. եւ արար նմա կոչունս ծերոցն եւ քահանայիցն: եւ կարդացին զգիշերն զայն ամենայն առ տէր Աստուած Իսրայէլի:
Հաղորդում կայքում սխալի վերաբերյալ
Տվյալ հատվածում առկա է սխալ: