1. Եւ ի վաղիւ անդր պատուիրեաց Հողոփեռն զաւրաց իւրոց, եւ ժողովեցան որ եկեալն էին նմա յաւգնականութիւն, չուել գնալ ի Բետիղուա, եւ ի վերայ ելից լեռնակողմանն, եւ հասանել տալ պատերազմ ընդ որդիսն Իսրայէլի:
2. Եւ կազմեցան պատրաստեցան` գնացին յաւուրն յայնմիկ, ամենայն այր պատերազմի, եւ ամենայն հետեւակազաւր պատերազմողացն հարիւր եւթանասուն հազար, եւ հեծելազաւրքն վառեալք երկոտասան հազար. թող զայլ ռամիկն ամենայն, եւ զկահ եւ զկարասի բազում սաստիկ յոյժ:
3. Եւ բանակեցան նոքա ի հովիտն որ մերձ էր ի Բետիուղա ի վերայ աղբերն. եւ հանին զառաջս բանակացն ընդ հարաւակողմն ի լայնութիւն մինչչեւ ի Դովթայիմ, մինչչեւ ի Բեղբեմ. եւ յերկայնութիւն ի Բետիղուայ մինչչեւ ի Կիամ, որ է ընդդէմ յԵզրայելովմայ, այս ինքն է Յեզրայէլ:
4. Եւ որդիքն Իսրայէլի իբրեւ տեսին զայնչափ բազմութիւնն խռովեցան յոյժ, եւ ասեն այր ցընկեր իւր. Այժմ լիզուն նոքա զամենայն երեսս երկրի, եւ ոչ լերինք բարձունք, եւ ոչ ձորք եւ բլուրք կարասցեն կալ առաջի զաւրութեան դոցա:
5 Եւ առին որդիքն Իսրայէլի այր իւրաքանչիւր զզէն իւր, եւ լուցանէին ջահս ի վերայ աշտարակացն քաղաքին, եւ կային պահէին զամենայն գիշերն զայն:
6. Եւ յաւուրն երկրորդի եհան Հողոփեռնէս զամենայն զհեծելազաւրն դէմ յանդիման որդւոցն Իսրայէլի որ էին ի Բետիղուա, եւ հաս նա ի վերայ ելից քաղաքին նոցա, եւ զաղբերս ջրոցն քննեաց, եւ աճապարէր պաշարել զնոսա. եւ հարկանէր ի վերայ նոցա բանակս բանակս յարանց պատերազմողաց. եւ ինքն չուէր գնայր անդրէն ի բանակն իւր:
8. Եւ մատեան առ նա ամենայն որդիքն Ամովնայ, եւ ամենայն ժողովք եւ առաջնորդք որդւոցն Մովաբու, եւ զաւրագլուխք ծովեզերեայցն` եւ ասեն.
9. Լուիցէ բանից ծառայից իւրոց Տէր մեր, զի մի լիցին հարուածք զաւրաց քոց. զի ժողովուրդ որդւոցս Իսրայէլի ոչ են յուսացեալ ի նիզակս իւրեանց, եւ ոչ ի զէնս, այլ ի վերայ լերանց բարձանց իւրեանց յորում բնակեալ են ի նոսա. ոչ իսկ հնար է հասանել ի նոսա: Եւ արդ Տէր` մի տար դու ընդ նոսա մարտ պատերազմի` որպէս եւ լինի պատերազմ. եւ ոչ անկցի մի այր ի զաւրաց քոց. այլ հանդարտեա եւ մնա դու ի բանակիս քում, եւ ապրեցուսցես դու զզաւրս քո. այլ կալցին ծառայք քո զաղբերս ջուրցն որ ելանէ ի լեռնոտանէ անտի. քանզի անտի ըմպեն ամենայն բնակիչք քաղաքիդ. եւ սատակին նոքա ի ծարաւոյ, եւ ապա ինքեանք իսկ մատնեսցեն զքաղաքն ի ձեռս քո. եւ ամենայն զաւրավարաւք մերովք ելանեմք ի վերայ լերանց բարձանց որ մերձաւորքս իցեն, եւ բանակեսցուք ի վերայ նոցա իբրեւ զայր մի. քանզի սպառեսցին նոքա ի սովոյ եւ ի ծարաւոյ, ինքեանք եւ կանայք իւրեանց եւ որդիք իւրեանց մինչչեւ եկեալ իցէ ի վերայ նոցա սուր. տապաստ անկցին ի հրապարակս քաղաքին իւրեանց, եւ հատուսցես նոցա զհատուցումն չարութեան նոցա. փոխանակ զի ի կռիւ կացին եւ ոչ հնազանդեցան քեզ խաղաղութեամբ:
10 Եւ հաճոյ թուեցաւ խորհուրդն` Հողոփեռնեայ եւ ամենայն ծառայից նորա, եւ հրաման ետ առնել որպէս եւ խաւսեցանն: եւ գնաց բանակ որդւոցն Ամոնայ, եւ ընդ նոսա հազարք հինգ յորդւոցն Ասուր, եւ բանակեցան նոքա ի ձոր հովտին, եւ հասին կալան նոքա զաղբերս ջուրցն զորդւոցն Իսրայէլի: Եւ ելին որդիքն Եսաւայ, եւ որդիքն Ամոնայ, եւ բանակեցան ընդ կողմն լերինն ընդդէմ Դովթայիմայ. եւ առաքեցին ի նոցանէն ի հարաւակողմն կոյս` եւ ընդ հիւսւսի ընդդէմ Եգրեբիղայ` որ է մերձ ընդ Քուշ, որ է ի վերայ ձորոյն Քումուրայ: եւ այլ զաւրք Ասորեստանեայցն բանակեցան ի դաշտին` եւ ծածկեցին զամենայն երեսս երկրին: եւ այլ ռամիկքն` կահիւ եւ կարասով եւ խորանաւք հանդերձ բանակեցան անդէն բազում մեծութեամբ: Եւ որդիքն Իսրայէլի գոչեցին առ տէր Աստուած իւրեանց, զի զահի հարեալ սպառեալ էին ոգիք նոցա. քանզի պատեալ պաշարեալ էր զնոսա թշնամեաց նոցա. եւ ոչ ինչ էր հնար նոցա ելանել ի միջոյ նոցա. եւ կացին պաշարեցին զնոսա զաւրքն Ասուրայ զինու կառաւք եւ երիվարաւք իւրեանց զաւուրս երեսուն եւ չորս:
11. Եւ լքան պարտասեցան ամենայն բնակիչք Բետիղուայ. եւ ամենայն ամանք նոցա սպառեալ էին ի ջրոյ, եւ գուբք սպառեալ թափեալ էին. եւ ոչ գոյր ըմպելի միում աւուր, եւ զոր ըմպէին չափով եւ կշռով ըմպէին:
12. եւ ի վարանի եւ ի տարակուսի կային կանայք եւ մանկունք նոցա. եւ երիտասարդք նոցա լքեալ էին ի ծարաւոյ, եւ գլորեալք կային ընդ հրապարակս քաղաքին, եւ ընդ անցս դրանցն. եւ ոչ ուստեք էր նոցա մխիթարութիւն: Եւ ժողովեցան ամենայն ժողովուրդն ի վերայ Ոզիայ` եւ ի վերայ իշխանաց քաղաքին, երիտասարդք եւ կանայք եւ մանկտին, եւ լացին նոքա ձայնիւ մեծաւ, եւ ասեն առաջի ամենայն ծերոց ժողովրդեանն.
13. Դատ արասցէ Աստուած ի մէջ մեր եւ ի մէջ ձեր, զի արարէք առ մեզ իրս անիրաւութեան, առ ի չխաւսելոյ ձեր ի խաղաղութիւն ընդ որդիսն Ասուր:
14. եւ արդ` ոչ ոք է որ աւգնէ մեզ, այլ մատնեաց զմեզ Աստուած ի ձեռս նոցա, զի տապաստ անկցուք մեք առաջի նոցա, եւ ի կորուստ մեծի ծարաւոյ:
15. Արդ այժմ աղաչեցէք դուք զնոսա, եւ տուք յաւար նոցա զքաղաքս ամենայն:
16. զի լաւ է մեզ լինել ի յափշտակութիւն նոցա եւ ի ծառայութիւն` եւ կեցցեն անձինք մեր. քանզի ոչ կարեմք տեսանել զմահ տղայոց եւ զկանանց աչաւք մերովք, զի պակասեալ սպառեալ են ոգիք նոցա:
17. արդ վկայեմք ձեզ առաջի երկնից եւ երկրի, եւ Աստուծոյ հարցն մերոց որ խնդրէ զվրէժ անձանց մերոց, եւ ըստ մեղաց հարցն մերոց. զի մի արասցէ ըստ բանիցս այսոցիկ յաւուրս յայսոսիկ:
18. Եւ եղեւ լալումն եւ ողբումն մեծ ի վերայ եկեղեցւոյն ամենեցուն ի միասին, եւ գոչեցին նոքա առ տէր Աստուած ձայնիւ մեծաւ:
23. Եւ ասէ ցնոսա Ոզիա. Քաջալերեցարուք եղբարք, եւ համբերեցէք աւուրս եւս հինգ, յորում աւուր առաքէ Տէր զողորմութիւն իւր ի վերայ մեր.
24. զի ոչ թողու նա զմեզ ի սպառ.
25. եւ յորժամ անցանիցեն այս աւուրք, եւ ոչ եկեսցէ ի վերայ մեր աւգնութիւն` արարից ձեզ ըստ բանիցս այսոցիկ: եւ արձակեաց զժողովուրդս ի տունս իւրեանց. եւ յաշտարակս եւ ի պարիսպս քաղաքին զգուշանալ ի թշնամեացն: եւ էին ի վարանս եւ ի մեծ տարակուսանս:
Հաղորդում կայքում սխալի վերաբերյալ
Տվյալ հատվածում առկա է սխալ: