1․ Իբրեւ լուաւ Յուդա զանուն հռովմայեցւոց, եթէ են նոքա հզաւրք զաւրութեամբ իւրեանց. եւ նոցա բարւոք թուի թէ ոք թիկունս առնէ զնոսա, եւ դաշնաւոր լինի նոցա. եւ զի զաւրացեալ են զաւրութեամբ ի վերայ երկրի:
2․ Եւ վասն մարտից պատերազմի, զի հարկանէին քաջութեամբ իւրեանց զկողմանս Գաղատացւոց, զի զաւրացան ի վերայ նոցա, եւ կացուցին զնոսա ի հարկի:
3․ Եւ որ ինչ միանգամ արարին նոքա ընդ կողմանս Սպանիացւոց. եւ թափեցին ի նոցանէ զբովսն ուստի ոսկին եւ արծաթն հատանի. եւ ըմբռնեցին նոքա զտեղիսն զայն ամենայն խորհրդովք իւրեանց, եւ երկայնմտութեամբ իւրեանց. զի էր տեղին կարի բացարձակ ի նոցանէ.
4․ Եւ ի թագաւորաց անտի որ եկեալ էին ի վերայ նոցա ի ծագաց երկրի մինչչեւ հարին զնոսա: Եւ հարին զնոսա ի հարուածս մեծամեծս, եւ ջնջեցին զնոսա, եւ զմնացորդսն ի հարկի կացուցին տալ նոցա հարկ ամ յամէ:
5․ Եւ զՓիլիպպոս, եւ զարքայն կինէացւոց որ յարուցեալ էին ի վերայ նոցա, սատակեցին զնոսա ի պատերազմի եւ յաղթեցին նոցա:
6․ Եւ զԱնտիոքոս մեծ արքայն ասիացւոց, որ եկեալ էր ի վերայ նոցա մեծաւ պատերազմաւ, ընդ իւր ունէր հարիւր քսան փիղ, եւ կառս եւ երիվարս բազում յոյժ, եւ պարտեցաւ ի նոցանէ.
7․ զի ձերբակալ արարին զնա կենդանւոյն, եւ կացուցին զնա ի տեղի մի հարկ հարկանել:
8․ Եւ զթագաւորս որ ըստ նմանէ էին տալ պատանդս եւ գրաւականս: Եւ զաշխարհն Հնդկաց, եւ Պարթեւաց եւ Լիդացւոց, զընտիր ընտիր գաւառաց նոցա. եւ առին զայնս եւ ի ձեռս ետուն Եւմենեայ արքայի:
9․ Իբրեւ զայն եւս լուան եթէ յոյնք խորհեցան գալ սատակել զնոսա. եւ իբրեւ ազդ եղեւ բանն նոցա.
10․ արձակեցին մի ի զաւրավարաց անտի, եւ եկն եհար սատակեաց զնոսա մեծաւ պատերազմաւ, եւ արկին ի նոցանէ ի սուր իւրեանց վիրաւորս բազումս. ի գերութեան վարեցին զկանայս եւ զորդիս նոցա. յաւարի առին զինչս եւ զստացուածս նոցա: Կալան զերկիրն ի ծառայութեան. զամուրսն քակեցին, զաշխարհն ի հարկի ծառայութեան կացուցին մինչչեւ յաւրս յայս:
11․ Եւ զայլ թագաւորութիւնսն եւ զկղզիսն` որ խլրտէին` սատակեցին եւ ի ծառայութեան կացուցին:
12․ Բայց ընդ բարեկամս իւրեանց` եւ որ թիկունս առնէ զնոսա, հաստատութեամբ սէր առնէր ընդ նոսա: Եւ հզաւրացան նոքա ի վերայ ամենայն թագաւորութեանց` որ մերձ էին եւ որ հեռի էին: Եւ որ միանգամ լսէին զանուն նոցա` երկնչէին ի նոցանէ:
13․ Ում կամէին տային զթագաւորութիւն, զո կամէին` հանէին ի տէրութենէ: Եւ բարձրացան յոյժ:
14․ Եւ ի վերայ այսր ամենայնի ոչ ոք ի նոցանէ յանձն առ թագ առնուլ` եւ ծիրանիս արկանել` զի հաստատեսցի տէրութիւնն:
15․ Այլ տուն խորհրդոց շինեցին, եւ հանապազ աւր երեք հարիւր եւ քսան այր ի խորհուրդ մտանէին վասն զաւրաց` զի զաշխարհն շէն կալցին:
16․ Եւ մի մի այր ի նոցանէն որ հաւատարիմ էր իշխան, գլուխ կացուցանէին տարւոյն, զի տիրեսցէ ի վերայ ամենայն երկրի նոցա, եւ ամենեքեան հնազանդութեամբ լսէին միում. եւ ոչինչ գոյր հեռ եւ նախանձ ի մէջ նոցա:
17․ Ապա կարգեաց արս ընտիրս Յուդա յիւրաքանչիւր գնդէ անտի. զԱպողեմոս զԱկկոսեան զորդի Յովնաթանու, եւ զՅասոն զորդի Եղիազարու. եւ առաքեաց զնոսա ի Հռոմ քաղաք, խնդրել ի նոցանէ զհաշտութիւն եւ թիկունս:
18․ Եւ զի բարձցեն զլուծն ի պարանոցէ նոցա. քանզի ծանրացուցեալ էր յունաց զլուծ ծառայութեան ի վերայ պարանոցին իսրայէլացւոց:
19․ Եւ գնացին ի կողմանս Հռոմայեցւոց: Եւ էր ճանապարհն մեծ. եկին հասին հրեշտակքն, եւ յանդիման եղեն նոցա ի տաճարին խորհրդոց: Կացին ի մէջ, եւ սկսան տալ զպատգամն:
20․ Յուդա Մակաբէ եւ եղբարք իւր, եւ ամենայն սպայ հրէաստանեայց. խաւսել ընդ ձեզ ի հաշտութիւն. առնել զձեզ թիկունս, եւ խնդրել ի ձէնջ խաղաղութիւն. զի եւ ձեզ եւս կամ լիցի, գրել ձեզ զմեզ նիզակակիցս եւ բարեկամս:
21․ Եւ հաճոյ թուեցաւ բանն առաջի նոցա:
22․ Եւ այս այն պատճէն է հրովարտակի նոցա զոր գրեցին նոքա առ նոսա ի տախտակս պղնձիս եւ առաքեցին յԵրուսաղէմ. եւ առ իւրեանս թողին յիշատակ թիկանց եւ խաղաղութեան:
23․ Խաղաղութիւն եւ բարիք լիցին ընդ Հրէաստան, եւ ընդ Հռոմայեցւոց` ընդ ամենայն ընդ ծով եւ ընդ ցամաք. սուր եւ թշնամի հեռի լիցի ի նոցանէ:
24․ Ապա եթէ հասցէ պատերազմ նախ ի վերայ հռոմայեցւոց, կամ ուրեք բարեկամաց նոցա` ընդ ամենայն տեղիս տէրութեան նոցա,
25․ ի թիկունս վաղվաղակի հասցէ գունդն Հրէաստանեայց, որպէս ժամանակն ցուցանէ նոցա` մտադեւր սրտի մտաւք:
26․ Եւ ի թշնամի ինչ մի տացեն, եւ մի ձեռնտու լիցին արծաթով կամ ոսկւով` կամ զինու` կամ նաւաւք: Այսպէս հաճոյ թուեցաւ հռոմայեցւոց. զի պահեսցեն զպատուիրանդ զայդ առանց կաշառոյ:
27․ Սոյնպէս եթէ ի վերայ ազգին հրէից հասանիցէ պատերազմ, ի թիկունս վաղվաղակի հասցեն հռոմայեցիք` միամտութեամբ սրտի մտաւք. որպէս ժամանակն նոցա ցուցանիցէ:
28․ Եւ ի թշնամի ինչ ոչ տացեն, ոսկի կամ արծաթ կամ զէն կամ նաւս. որպէս հաճոյ թուեցաւ հռոմայեցւոց: Պահեսցեն զպատուիրանս զայս առանց նենգութեան:
29․ Եւ ըստ բանիցս այսոցիկ այսպէս հաստատեցին հռոմայեցիք ընդ գնդին հրէից:
30․ Ապա եթէ յետ այդց բանից խորհուրդ ինչ ի մէջ մտցէ սոցա կամ նոցա` հանել կամ յաւելուլ, որ ինչ դէպն տացէ` կարգեսցեն հասարակ հաւանութեամբ, եւ հաստատուն կացցեն:
31․ Եւ վասն չարեաց արքային Դեմետրեայ որ հասուցանէ նոցա, գրեսցուք առ նա. գոգցուք, ընդէ՞ր ծանրացուցանէք զլուծ ի վերայ պարանոցի նիզակակից բարեկամաց մերոց:
32․ Զայս գիտասջիք` եթէ զքէն ամբաստան լիցին դոքա. դատաստան յիրաւի կալցուք, մարտ պատերազմի տացուք ընդ քեզ, եթէ ընդ ծով իցէ` եթէ ընդ ցամաք:
Հաղորդում կայքում սխալի վերաբերյալ
Տվյալ հատվածում առկա է սխալ: