Գլուխ 1

   
1․ Յամսեանն ութերորդի՝ յամի երկրորդի Դարեհի արքայի եղեւ բան Տեառն առ Զաքարիա մարգարէ որդի Բարաքեայ, որդւոյ Ադդովայ եւ ասէ.

2. Բարկացաւ Տէր ի վերայ հարցն ձերոց բարկութիւն մեծ։

3. Եւ ասասցես ցնոսա. Այսպէս ասէ Տէր ամենակալ՝ Դարձարուք առ իս, ասէ Տէր զաւրութեանց, եւ դարձայց առ ձեզ՝ ասէ Տէր զաւրութեանց։

4․ Մի լինիք իբրեւ զհարս ձեր, զոր պատուհասէին մարգարէքն առաջինք՝ եւ ասէին. Այսպէս ասէ Տէր ամենակալ. Դարձարուք յամենայն ճանապարհաց ձերոց չարաց, եւ ի գնացից ձերոց չարաց. եւ ոչ լուան, եւ ոչ անսացին լսել ինձ, ասէ Տէր։

5. Հարքն ձեր ո՞ւր են՝ եւ մարգարէքն. միթէ յաւիտեա՞ն կեցին։

6. Բայց զբանս իմ եւ զաւրէնս իմ ընկալարուք՝ զոր ես պատուիրեմ հոգւով իմով ծառայից իմոց մարգարէից, որ ժամանեցին հարցն ձերոց։ Պատասխանի ետուն՝ եւ ասեն. Որպէս կարգեաց Տէր ամենակալ առնել ըստ ճանապարհաց մերոց եւ ըստ գնացից մերոց, նոյնպէս եւ արար մեզ։

7․ Ի քսաներորդի եւ չորրորդի մետասաներորդ ամսեանն. որ է ինքն արաց, յերկրորդ ամի Դարեհի, եղեւ բան Տեառն առ Զաքարիայ մարգարէ Բարաքեայ որդւոյ Ադովդայ եւ ասէ.

8. Տեսի ի տեսլեան գիշերոյ՝ եւ ահա այր մի հեծեալ յաշխէտ ձի, եւ կայր ի մէջ երկուց անտառախիտ լերանցն, եւ զկնի նորա ձիք աշխէտք՝ եւ պիսակք՝ եւ սպիտակք։

9․ Եւ ասեմ. Զի՞նչ են դոքա, Տէր։ Եւ ասէ ցիս հրեշտակն՝ որ խաւսէր յիս. Ես ցուցից քեզ զինչ են դոքա։

10. Պատասխանի ետ այրն՝ որ կայր ի մէջ լերանցն՝ եւ ասէ ցիս. Դոքա են զորս առաքեաց Տէր շրջել ընդ երկիր։

11. Պատասխանի ետուն հրեշտակին Տեառն՝ որ կայր ի մէջ լերանցն՝ եւ ասեն. Շրջեցաք ընդ ամենայն երկիր, եւ ահա ամենայն երկիր բնակեալ եւ դադարեալ է։

12. Պատասխանի ետ հրեշտակն եւ ասէ. Տէր ամենակալ, մինչեւ ցե՞րբ ոչ ողորմեսցիս ի վերայ Երուսաղէմի եւ քաղաքացն Յուդայ, զորս անտես արարեր այս եւթանասուներորդ ամ։

13. Եւ պատասխանի ետ Տէր ամենակալ հրեշտակին՝ որ խաւսէր յիս՝ բանս բարեաց եւ բանս մխիթարութեան։

14. Եւ ասէ ցիս հրեշտակն որ խաւսէր յիս. Աղաղակեա եւ ասա. Այսպէս ասէ Տէր ամենակալ՝ Նախանձեցայ վասն Երուսաղէմի եւ վասն Սիոնի նախանձ մեծ.

15. եւ բարկութեամբ մեծաւ բարկացեալ եմ ի վերայ ազգացն՝ որ միանգամայն հարան ի վերայ նոցա. փոխանակ զի ես սակաւիկ ինչ բարկացեալ էի ի վերայ նոցա, եւ նոքա միանգամայն հարան ի վերայ ի չարիս։

16. Վասն այնորիկ այսպէս ասէ Տէր. Դարձայց առ Երուսաղէմ գթութեամբ, եւ տունն իմ վերստին շինեսցի, ասէ Տէր ամենակալ. եւ չափ ձգեսցի միւսանգամ ի վերայ Երուսաղէմի։

17. Եւ ասէ ցիս հրեշտակն որ խաւսէր յիս. Աղաղակեա եւ ասա. Այսպէս ասէ Տէր ամենակալ. Դարձեալ զեղցին քաղաքք բարութեամբ, եւ ողորմեսցի Տէր Սիոնի եւ հաճեսցի միւսանգամ ընդ Երուսաղէմ։

18. Եւ ամբարձի զաչս իմ եւ տեսի, եւ ահա չորք եղջեւրք։

19. Եւ ասեմ ցհրեշտակն որ խաւսէր յիս. Զի՞նչ են այդոքիկ, Տէր։ Եւ ասէ ցիս. Այդ եղջեւրք են որ ցրուեցին զՅուդայ՝ եւ զԻսրայէլ։

20. Եւ եցոյց ինձ Տէր չորս հիւսունս.

21. եւ ասեմ. Իսկ դոքա զի՞նչ գան գործել։ Եւ ասէ ցիս. Այդ եղջեւրք են, որ ցրուեցին զՅուդայ՝ եւ զԻսրայէլ խորտակեցին. եւ ոչ ոք ի նոցանէ ամբարձ զգլուխ իւր. եւ ելին սոքա սրել զնոսա ի ձեռս նոցա. զչորս եղջեւրս զազգս յարուցեալս եղջեւր ի վերայ երկրի Տեառն՝ ցրուել զնա։