Տեսիլ երկրորդ։
1․ Յամին երրորդի թագաւորութեանն Յովակիմայ արքայի Յուդայ. ե՛կն Նաբուքոդոնոսոր արքայ Բաբելացւոց յԵրուսաղէմ, և պաշարեաց զնա։
2․ Եւ ետ Տէր’ի ձեռս նորա զՅովակիմ արքայ Յուդայ, և’ի մասնէ սպասուց տանն Աստուծոյ. և տարա՛ւ զայն յերկիրն Սենայար’ի տուն աստուծոյ իւրոյ. և զսպասն եմո՛յծ’ի տուն գանձի աստուծոյ իւրոյ։
3 Եւ ասէ թագաւորն ցԱզփանէս ներքինապետ իւր, ածել յորդւոց գերութեանն Իսրայէլի, և’ի զաւակէ թագաւորութեանն, և’ի Պարթևաց ,
4․ մանկունս անարատս՝ գեղեցիկս երեսօ՛ք, և խելամուտս ամենայն իմաստութեան՝ և հմուտս գիտութեան, մտավարժս հանճարով՝ և զօրաւորս, կա՛լ’ի տաճարին առաջի թագաւորին. և ուսուցանել նոցա դպրութիւն, և զլեզու Քաղդէացւոց։
5․ Եւ կարգեաց նոցա թագաւորն ռոճիկս օր ըստ օրէ’ի սեղանո՛յ արքայի, և’ի գինւոյ զոր ինքն ըմպէր. սնուցանել զնոսա ամս երիս. և ապա՛ կացուցանել առաջի թագաւորին։
6․ Եւ էին’ի նոսա յորդւոցն Յուդայ՝ Դանիէլ, և Անանիա, և Միսայէլ, և Ազարիա։
7․ Եւ եդ նոցա ներքինապետն անուանս. Դանիելի՝ Բաղտասար. և Անանիայի՝ Սեդրաք, և Միսայելի՝ Միսաք, և Ազարիայ՝ Աբեդնագով։
8․ Եւ ե՛դ Դանիէլ’ի մտի իւրում չճաշակել’ի սեղանոյ թագաւորին, և ո՛չ’ի գինւոյ ըմպելւոյ նորա. և աղաչեաց զներքինապետն զի մի՛ ճաշակեսցէ։
9․ Եւ ետ Աստուած զԴանիէլ’ի շնո՛րհս և յողորմութիւն առաջի ներքինապետին։
10․ Եւ ասէ ներքինապետն ցԴանիէլ. Երկնչի՛մ ես’ի տեառնէ իմմէ արքայէ, որ կարգեաց ձեզ զկերակուրդ ձեր և զըմպելի. գուցէ՛ տեսանիցէ զերեսս ձեր տրտմագոյնս քան զայլոց մանկանց հասակակցաց ձերոց. և առնիցէք զիս գլխապա՛րտ թագաւորին։
11․ Եւ ասէ Դանիէլ ցԱմեղասադ, զոր կացուցեալն էր ներքինապետն’ի վերայ Դանիելի՝ և Անանիայ՝ և Միսայելի՝ և Ազարիայ։
12․ Աղէ փորձեա՛ զծառայս քո աւուրս տա՛սն, և տացեն մեզ ունտս՝ և կերիցուք, և ջո՛ւր արբցուք.
13․ և երևեսցին առաջի քո գոյնք մեր, և գոյն մանկանցդ՝ որ ուտեն զսեղան թագաւորին. և որպէս տեսանիցես արասջի՛ր ընդ ծառայս քո։
14․ Եւ անսա՛ց նոցա՝ և փորձեաց զնոսա աւուրս տասն։
15․ Եւ յետ կատարելոյ աւուրցն տասանց, երևեցան երեսք նոցա նմա՝ բարիք, և հզօրք մարմնով քան զամենայն մանկունսն որ ուտէին զսեղան թագաւորին։
16․ Եւ առնոյր Ամեղասադ զընթրիս նոցա, և զգինի ըմպելւոյ նոցա, և տայր ունտս չորեցունց մանկանցն ։
17 Եւ ետ նոցա Աստուած իմաստութիւն և հանճար յամենայն դպրութեան՝ և իմաստութեան. և Դանիէլ խելամո՛ւտ էր ամենայն տեսլեան երազոց։
18․ Եւ յետ կատարածի աւուրցն՝ հրամա՛ն ետ թագաւորն ածել զնոսա. և ա՛ծ զնոսա ներքինապետն առաջի Նաբուքոդոնոսորայ.
19 և խօսեցաւ ընդ նոսա արքայն։ Եւ ո՛չ գտան յամենայնի նման Դանիելի՝ և Անանիայ՝ և Միսայելի՝ և Ազարիայ. և կային առաջի թագաւորին։
20․ Եւ յամենայն բանս իմաստութեան և գիտութեան զոր խնդրէր’ի նոցանէ թագաւորն՝ գտանէր զնոսա տասնպատիկ առաւե՛լ քան զամենայն գէտս և զմոգս որ էին’ի թագաւորութեան նորա։
Տեսիլ Երրորդ։
21․ Եւ եղև Դանիէլ մինչև յամս Կիւրոսի արքայի։
Հաղորդում կայքում սխալի վերաբերյալ
Տվյալ հատվածում առկա է սխալ: