Գլուխ 12

   
1. Առած բանի Տեառն ի վերայ Իսրայէլի։ Ասէ Տէր՝ որ ձգեաց զերկինս՝ եւ արկ հիմունս երկրի, եւ հաստատէ զոգի մարդոյ ի նմա.

2. Ահաւասիկ ես դնեմ զԵրուսաղէմ իբրեւ զսեամս շարժունս ամենայն ժողովրդոց՝ որ շուրջ զնովաւ իցեն, եւ ի Հրէաստանի եղիցի պաշարումն Երուսաղէմի։

3. Եւ եղիցի յաւուր յայնմիկ՝ եդից զԵրուսաղէմ իբրեւ զքար մի կոխան ամենայն հեթանոսաց. ամենայն որ կոխիցէ զնա՝ կատակելով կատակեսցէ, եւ ժողովեսցին ի վերայ նորա ամենայն ազգք երկրի։

4․ Յաւուր յայնմիկ ասէ Տէր ամենակալ. Հարից զամենայն երիվարս տագնապաւ, եւ զհեծեալս նորա յիմարութեամբ. եւ ի վերայ տանն Յուդայ բացից զաչս իմ, եւ զամենայն երիվարս ազգաց հարից կուրութեամբ։

5. Եւ ասասցեն հազարապետք Յուդայ ի սիրտս իւրեանց. Գտցուք մեք զբնակիչս Երուսաղէմի ի ձեռն Տեառն ամենակալի Աստուծոյ նոցա։

6. Յաւուր յայնմիկ եդից զհազարապետսն Յուդայ իբրեւ զխանձողս հրոյ ի մէջ փայտից, եւ իբրեւ զլամպարս հրոյ ի մէջ եղեգան, եւ կերիցեն յաջմէ եւ յահեկէ զամենայն ժողովուրդս շուրջանակի. եւ դարձեալ բնակեսցէ Երուսաղէմ առանձինն յԵրուսաղէմ.

7. եւ ապրեցուսցէ Տէր զյարկսն Յուդայ՝ որ ի սկզբանէն, զի մի մեծաբանեսցեն պարծանք տանն Դաւթի, եւ հպարտութիւն բնակչաց Երուսաղէմի ի վերայ տանն Յուդայ։

8. Եւ եղիցի յաւուր յայնմիկ պաշտպանեսցէ Տէր ամենայն բնակչաց Երուսաղէմի։ եւ եղիցի որ տկարն իցէ յաւուր յայնմիկ՝ իբրեւ զԴաւիթ. եւ տունն Դաւթի՝ իբրեւ զտունն Աստուծոյ, իբրեւ զհրեշտակ Տեառն առաջի նոցա։

9. Եւ եղիցի յաւուր յայնմիկ խնդրեցից բառնալ զամենայն ազգս եկեալս ի վերայ Երուսաղէմի.

10. եւ հեղից ի վերայ տանն Դաւթի՝ եւ ի վերայ բնակչաց Երուսաղէմի հոգի շնորհաց եւ գթութեան։ Եւ հայեսցին առ իս փոխանակ կաքաւելոյն. եւ կոծեսցին ի վերայ նորայ կոծ իբրեւ ի վերայ սիրելւոյ. եւ աշխարեսցեն աշխար իբրեւ ի վերայ անդրանկան։

11. Յաւուր յայնմիկ սաստկասցի կոծ յԵրուսաղէմ՝ իբրեւ զկոծ նռնենեաց կոտորելոց ի դաշտի.

12. եւ կոծեսցի երկիր ըստ ազգս ազգաց առանձինն։

13. Ազգ տանն Դաւթի առանձինն, եւ կանայք նոցա առանձինն. ազգ տանն Նաթանայ առանձինն, եւ կանայք նոցա առանձինն. ազգ տանն Ղեւեայ առանձինն, եւ կանայք նոցա առանձինն. ազգ տանն Շմաւոնի առանձինն, եւ կանայք նոցա առանձինն։

14․ Ամենայն ազգք մնացեալք առանձինն, եւ կանայք նոցա առանձինն։