1. Ի քսան եւ ի չորս ամսոյն վեցերորդի։ Յամին երկրորդի Դարեհի արքայի, յամսեանն եւթներորդի, որ աւր քսան եւ մի էր ամսոյն
2. խաւսեցաւ Տէր ի ձեռն Անգէի մարգարէի՝ եւ ասէ.
3. Ասա ցԶորաբաբէլ որդի Սաղաթիելի յազգէ Յուդայ, եւ ցՅեսու Յովսեդեկեայ քահանայ մեծ, եւ ցամենայն մնացորդս ժողովրդեանն.
4. Ո՞յր ի ձէնջ տեսեալ իցէ զտունս զայս ի փառաւորութեան իւրում զառաջինն. եւ ո՞րպէս արդ տեսանէք զդա որպէս զոչինչ առաջի ձեր։
5. Եւ արդ, զաւրացիր դու, Զորաբաբէլ, ասէ Տէր, եւ զաւրացիր, Յեսու Յովսեդեկեայ քահանայ մեծ, եւ զաւրասցի ամենայն ժողովուրդ երկրիդ ասէ Տէր, եւ գործեցէք զի ես ընդ ձեզ եմ, ասէ Տէր ամենակալ։
6. Եւ բանն զոր ուխտեցի ընդ ձեզ՝ յելանելն յերկրէն Եգիպտացւոց, եւ հոգին իմ որ կայ ի միջի ձերում. քաջալերեցարուք,
7. զի այսպէս ասէ Տէր ամենակալ. Դարձեալ միւսանգամ շարժեցից զերկինս եւ զերկիր եւ զծով եւ զցամաք.
8. եւ միանգամայն շարժեցից զամենայն ազգս. եւ եկեսցէ ընտիր ընտիր ընչից ամենայն ազգաց, եւ լցուցից զտունդ զայդ փառաւք, ասէ Տէր ամենակալ։
9. Իմ է արծաթ, եւ իմ է ոսկի, ասէ Տէր ամենակալ.
10. զի մեծ եղիցին փառք տանդ այդորիկ վերջինդ քան զառաջինն, ասէ Տէր ամենակալ։ Եւ ի տեղւոջդ յայդմիկ տաց խաղաղութիւն՝ ասէ Տէր ամենակալ. եւ խաղաղութիւն ոգւոց փրկութիւն ամենայնի, որ գործիցէ յարուցանել զտաճարդ զայդ։
11. Ի քսաներորդի եւ չորրորդի, իններորդի ամսեանն, յամի երկրորդի Դարեհի. եղեւ բան Տեառն առ Անգէ մարգարէ եւ ասէ.
12. Այսպէս ասէ Տէր ամենակալ. Հարց աւրէնս ի քահանայիցդ եւ ասասցես.
13. Եթէ առնուցու մարդ միս սուրբ ի դրաւշակ հանդերձի իւրոյ, եւ մերձեսցի ձորձք իւր ի հաց կամ ի թան, կամ ի գինի, կամ յեւղ, կամ յամենայն կերակուրս՝ իցէ՞ թէ սրբեսցի։ Պատասխանի ետուն քահանայքն եւ ասեն. Ոչ։
14. Եւ ասէ Անգէաս. թէ մերձենայցէ պիղծն կամ անսուրբն ոգւով յամենայն ինչ յայնպիսեաց, իցէ՞ թէ պղծեսցի։ Պատասխանի ետուն քահանայքն եւ ասեն. Պղծի։
15. Պատասխանի ետ Անգէոս եւ ասէ. Նոյնպէս եւ ժողովուրդս այս, նոյնպէս եւ ազգս այս առաջի իմ, ասէ Տէր, նոյնպէս եւ ամենայն գործք ձեռաց նոցա, որ ինչ մերձենայցէ անդր՝ պղծեսցի։ Վասն առիցն իւրեանց առաւաւտնոց, եւ մորմոքեսցին յերեսաց չարեացն իւրեանց, եւ ատեցիք ի դրունս զյանդիմանչս։
16. Եւ արդ՝ դիք ի սիրտ ձեր յաւրէ յայսմ հետէ եւ յառաջ՝ մինչ չեւ եդեալ քար ի քարի վերայ տաճարին Տեառն։
17. Ո՞վ էիք յորժամ արկանէիք յամանս ձեր քսան քոռ գարւոյ, եւ լինէր տասն քոռ գարւոյ. եւ մուծանէիք ի հնծանս ձեր հանել յիսուն մար, եւ լինէր քսան։
18. Հարի զձեզ անպտղութեամբ եւ խորշակաւ՝ եւ կարկտիւ, եւ զամենայն գործս ձեռաց ձերոց. եւ ոչ դարձարուք առ իս՝ ասէ Տէր։
19. Կարգեցէք զսիրտս ձեր յաւրէ յայսմանէ՝ եւ անդր. ի քսաներորդէ եւ չորրորդէ իններորդի ամսեանդ, եւ յաւրէ յայդմանէ յորում անկաւ հիմն տաճարիդ Տեառն։ Դիք ի սիրտս ձեր։
20. Ի՞ցէ թէ յայտնեսցի ինչ ի վերայ կալոյ, եւ յորթ եւ ի թզենի՝ եւ ի նռնենի, եւ ի փայտ իւղոյ՝ որ պտուղ ոչ տային՝ յաւրէ յայսմանէ աւրհնեցից։
21. Եւ եղեւ բան Տեառն կրկին անգամ առ Անգէ մարգարէ ի քսան եւ ի չորս ամսոյն՝ եւ ասէ.
22. Ասա ցԶաւրաբաբէլ Սաղաթիէլի յազգէ Յուդայ. Դարձեալ միւսանգամ շարժեմ զերկինս եւ զերկիր, զծով եւ զցամաք.
23. եւ կործանեցից զաթոռս թագաւորաց, եւ սատակեցից զզաւրութիւնս թագաւորաց, եւ կործանեցից զկառս եւ զհեծեալս, եւ իջցեն երիվարք եւ հեծեալք նոցա իւրաքանչիւր սրով առ եղբայր իւր։
24. Յաւուր յայնմիկ ասէ Տէր ամենակալ. Առից զքեզ Զորաբաբէլ Սաղաթիելի զծառայ իմ, եւ եդից զքեզ իբրեւ զկնիք, զի ընդ քեզ հաճեցայ, ասէ Տէր ամենակալ։
Հաղորդում կայքում սխալի վերաբերյալ
Տվյալ հատվածում առկա է սխալ: