 
1․ Արդ պաշարեսցի դուստրն ցանգով. զի նեղութիւն կարգեաց ի վերայ ձեր. գաւազանաւ հարցեն զծնօտս ազգաց Իսրայէլի։
2. Եւ դո՛ւ Բեդղահէմ տուն Եփրաթայ սակաւաւոր՝ իցե՛ս լինել ի հազարաւո՛րս Յուդայ. ի քէ՛ն ելցէ ինձ լինել իշխան Իսրայէլի. և ելք նորա իսկզբանէ աւուրց աշխարհի։
3. Վասն այնորիկ տացէ զնոսա մինչև ի ժամանա՛կ ծննդականին. ծնցի՝ և մնացորդք եղբարց նորա դարձցին առ որդիսն Իսրայէլի։
4․ Եւ կացցէ՛, և տեսցէ՛ և հովուեսցէ՛ հօտի իւրոյ զօրութեամբ Տեառն, և ի փառս անուան Տեառն Աստուծոյ իւրեանց հաստատեսցին։ Զի այժմ մեծասցին մինչև ի ծա՛գս երկրի.
5. և եղիցի նմա խաղաղութիւն. յորժամ եկեսցէ Ասորեստանեայն յերկիր ձեր՝ և յորժամ հասցէ յաշխարհ ձեր. յարուսցէ ի վերայ նորա եւթն հովիւ՝ և ո՛ւթ վարիչ մարդկան։
6. Եւ հովուեսցեն զԱսորեստանեայն սրով. և զերկիրն Նեբրովթայ ի պատնիշի իւրում. և փրկեսցէ զքեզ յԱսորեստանւոյն՝ յորժամ եկեսցէ յերկիր ձեր. և յորժամ հասցէ ի վերայ սահմանաց ձերոց։
7․ Եւ եղիցի մնացորդքն Յակոբայ ի հեթանոսս ի մէջ ազգաց բազմաց՝ իբրև զցօղ անկեալ ի Տեառնէ, և իբրև զգառինս ի վերայ սիզոյ, որպէս զի ժողովեսցէ և մի՛ մի. և մի՛ մնասցէ ի մէջ որդւոց մարդկան։
8․ Եւ եղիցին մնացորդքն Յակոբայ ի հեթանո՛սս ի մէջ ազգաց բազմաց իբրև զառեւծ ի մէջ խաշին յանտառի, և իբրև զկորիւն առիւծու՝ ի մէջ հօտից խաշանց. զոր օրինակ յորժամ անցեալ զատուցանիցէ՛ և յափշտակիցէ՝ և ո՛չ ոք իցէ որ թափիցէ։
9. Բարձրասցի՛ ձեռն քո ի վերայ նեղչաց քոց, և ամենայն թշնամիք քո սատակեսցին։
10․ Եւ եղիցի յաւուր յայնմիկ՝ ասէ Տէր. Սատակեցից զերիվարս քո ի միջոյ քումմէ, և կորուսից զկառս քո.
11. և սատակեցից զքաղաքս երկրի քոյ, և բարձից զամենայն ամուրս քո. և բարձից զամենայն կախարդութիւնս քո ի ձեռաց քոց. և հարցուկք ո՛չ եղիցին ի քեզ։
12. Ջնջեցից զդրօշեալս քո, և զարձանս քո ի միջոյ քումմէ. և ո՛չ ևս երկիրպագցես գործոց ձեռաց քոց։
13. Եւ կոտորեցից զանտառսդ ի միջոյ քումմէ, և ապականեցից զքաղաքս քո,
14. և արարից բարկութեամբ և սրտմտութեամբ վրէժխնդրութիւն ի մէջ ազգաց. փոխանակ զի ո՛չ լուան։
Հաղորդում կայքում սխալի վերաբերյալ
Տվյալ հատվածում առկա է սխալ: