1. Լուարո՛ւք զայս զոր ասաց Տէր. Արի՛ և դատեա՛ց ընդ լերինս, և բլուրք լուիցեն ձայնի քում։
2․ Լուարո՛ւք բլուրք զդատաստան Տեառն, և ձորք և հո՛ւնք երկրի. զի դատաստա՛ն է Տեառն ընդ ժողովրդեան իւրում, և ընդ Իսրայէլի յանդիմանեսցի։
3. Ժողովուրդ իմ զի՞ արարի քեզ, կամ ի՞ւ տրտմեցուցի զքեզ, կամ ի՞ւ նեղեցի զքեզ. տո՛ւր ինձ պատասխանի։
4. Փոխանակ զի հանի զքեզ յերկրէն Եգիպտացւոց, և ի տանէ ծառայութեան փրկեցի՛ զքեզ. և առաքեցի առաջի քո զՄովսէ՛ս և զԱհարոն և զՄարիամ։
5. Ժողովուրդ իմ յիշեա՛ զինչ խորհեցաւ վասն քո Բաղա՛կ թագաւոր Մովաբացւոց. և զի՞նչ ետ նմա պատասխանի Բաղաամ որդի Բէովրայ, ի վիճակացն մինչև ցԳաղգաղ. Զի ծանիցի արդարութիւն Տեառն։
6. Ի՞ւ կանխեցից առ Տէր. ապաւինեցա՛յց յԱստուած իմ բարձրեալ, եթէ կանխեցից առ նա ողջակիզօք, և որթովք տարևորօք.
7. եթէ իցէ՝ ընկալցի՞ Տէր ընդ հազարաւորս խոյոց, կամ ընդ բիւրաւորս նոխազաց պարարտաց. եթէ տա՛ց զանդրանիկս իմ վասն ամպարշտութեանց, և զպտուղ միջոյ իմոյ վասն մեղաց անձին իմոյ։
8. Պատմեցա՛ւ քեզ ո՛վ մարդ՝ զի՞նչ է բարի, կամ զի՞նչ խնդրէ ի քէն Տէր. բայց առնե՛լ զիրաւունս, և սիրել զողորմութիւն. և պատրա՛ստ լինել երթալոյ զկնի Տեառն Աստուծոյ քոյ։
9. Ձայն Տեառն ի վերայ քաղաքի կոչեսցի, և ապրեցուսցէ զերկիւղածս անուան նորա։ Լո՛ւր ազգ, ո՛ հանդերձեսցէ զքաղաք,
10. եթէ ո՛չ հուր, և տուն անօրինի որ գանձէ զգանձս անօրէնս, և հպարտութեամբ անիրաւութեան։
11. Եւ իցէ՞ թէ արդարասցի կաշառովք անօրէնն, և պայուսակա՛ւ կշռոց նենգութեան.
12. ուստի զտունս իւրեանց լցին ամպարշտութեամբք. և բնակիչք նորա խօսեցան անիրաւութիւն. և լեզուք նոցա մեծաբանեցին ի բերանս իւրեանց։
13. Եւ ես հարի զքեզ ապականութեամբ վասն մեղաց քոց։
14. Դու կերիցես և մի՛ յագեսջիր. և մերժեցի՛ զքեզ. և ըմբռնեսցիս՝ և մի՛ ապրեսցիս. և որ միանգամ ապրեսցին ի սո՛ւր մատնեսցին։
15. Դու սերմանեսցես՝ և ո՛չ հնձեսցես. դու կթեսցես ձէթ՝ և մի՛ օծցիս իւղով. և գինի՝ և մի՛ արբցես գինի։
16. Եւ ապականեսցին անօրէնք ժողովրդեան իմոյ, և ամենայն գործք տանն Աքաաբու. և գնացէք ըստ խորհրդոց նորա. զի մատնեցից զձեզ յապականութիւն, և զբնակիչս քո ի շչիւն, և զնախատինս ժողովրդոց ընկալջիք։
Հաղորդում կայքում սխալի վերաբերյալ
Տվյալ հատվածում առկա է սխալ: