1. Եւ եղեւ յամին չորրորդի Դարեհի արքայի, եղեւ բան Տեառն առ Զաքարիա, որ աւր չորք էին ամսոյն իններրորդի, որ է քասղեւ։
2. Եւ առաքեաց ի Բեթէլայ Սարասար, եւ Աբուսադ թագաւորք, եւ արք իւրեանց աղաչել զՏէր.
3 .եւ ասել ցքահանայսն որ էին ի տան Տեառն ամենակալի եւ ցմարգարէսն՝ եթէ մո՞ւտ այդր, յամսեանն հինգերորդի սրբութիւն, քանզի առնէին զայն զամս բազումս։
4. Եւ եղեւ բան Տեառն զաւրութեանց առ իս՝ եւ ասէ.
5. Խաւսեաց ընդ ժողովրդեան երկրիդ՝ եւ ընդ քահանայս՝ եւ ասասցես՝ եթէ պահիցէք եւ կոծիցէք ի հինգերորդս կամ յեւթներորդս ամսոց. ահա եւթանասուն ամ. միթէ պա՞հս պահիցէք ինձ.
6. եւ եթէ ուտէք եւ ըմպէք, ո՞չ ապաքէն դուք ուտէք եւ ըմպէք։
7 .Ո՞չ այս բանք են զոր խաւսեցաւ Տէր ի ձեռս մարգարէիցն իւրոց առաջնոց՝ մինչդեռ շէն էր Երուսաղէմ եւ ի բարութեան, եւ քաղաքք նոցա շուրջանակի. եւ լեռնայինքն եւ դաշտայինքն բնակեալ էին։
8 .Եւ եղեւ բան Տեառն առ Զաքարիա՝ եւ ասէ.
9. Այսպէս ասէ Տէր ամենակալ. Դատաստան արդար դատեցարուք, եւ ողորմութիւն եւ գթութիւն արարէք իւրաքանչիւր եղբաւր իւրոյ։
10. Զայրին եւ զորբն եւ զպանդուխտն՝ եւ զտնանկն մի յաղթահարէք. եւ ոխս չարեաց ընկերի իւրում մի ոք կալցի ի սիրտս ձեր։
11. Եւ ոչ հաւանեցան անսալ, այլ ետուն զթիկունս իւրեանց ի յիմարութիւն, եւ ծանրացուցին զականջս իւրեանց առ ի չլսել.
12. եւ զսիրտս իւրեանց կարգեցին անհնազանդս, առ ի չլսելոյ աւրինաց իմոց եւ բանից զոր առաքեաց Տէր ամենակալ հոգւով իւրով ի ձեռն մարգարէիցն առաջնոց. եղեւ բարկութիւն մեծ ի Տեառնէ ամենակալէ։
13. Եւ եղիցի զոր աւրինակ խաւսեցաւն՝ եւ ոչ լուան նմա. նոյնպէս աղաղակեսցեն՝ եւ ոչ լուիցէ նոցա, ասէ Տէր ամենակալ։
14. Եւ հանից զնոսա ընդ ամենայն ազգս՝ զորս ոչ գիտիցեն. եւ երկիրդ ապականեսցի զկնի նոցա, զի ոչ ոք իցէ որ ելանիցէ՝ եւ դառնայցէ. եւ եդին զերկիրն ընտիր յապականութիւն։
Հաղորդում կայքում սխալի վերաբերյալ
Տվյալ հատվածում առկա է սխալ: