Գլուխ 8

   
1. Եւ եղեւ բան Տեառն ամենակալի առ իս, եւ ասէ. Այսպէս

2․ ասէ Տէր ամենակալ. Նախանձեցայ վասն Երուսաղէմի, եւ վասն Սիոնի նախանձ մեծ. եւ բարկութեամբ մեծաւ նախանձեցայ վասն նորա։

3․ Այսպէս ասէ Տէր. Դարձայց ի Սիոն՝ եւ բնակեցայց ի մէջ Երուսաղէմի. եւ կոչեսցի Երուսաղէմ քաղաք ճշմարիտ, եւ լեառն Տեառն ամենակալի՝ լեառն սուրբ։

4. Այսպէս ասէ Տէր ամենակալ. Դարձեալ նստցին ծերք եւ պառաւունք ի հրապարակս Երուսաղէմի, իւրաքանչիւր ցուպ ի ձեռին իւրում ի բազմութենէ աւուրց.

5. եւ հրապարակք քաղաքին լցցին պատանեկաւք եւ աղջկամբք՝ որ խաղայցեն ի հրապարակս նորա։

6․ Այսպէս ասէ Տէր ամենակալ. Եթէ տկարանայցէ ինչ առաջի մնացորդաց ժողովրդեանդ այդորիկ յաւուրս յայսոսիկ. միթէ եւ առաջի՞ իմ տկարանայցէ, ասէ Տէր ամենակալ։

7․ Այսպէս ասէ Տէր ամենակալ. Ահաւասիկ ես փրկեմ զժողովուրդ իմ յերկրէ արեւելից՝ եւ յերկրէ արեւմտից.

8․ եւ ածից զնոսա՝ եւ բնակեցուցից ի մէջ Երուսաղէմի. եւ եղիցին ինձ ժողովուրդ, եւ ես եղէց նոցա Աստուած ճշմարտութեամբ եւ արդարութեամբ։

9. Այսպէս ասէ Տէր ամենակալ. Զաւրասցին ձեռք ձեր որ լսէքդ յաւուրս յայսոսիկ զբանս զայս ի բերանոց մարգարէիցն, յաւրէ յորմէ արկէք հիմն տան Տեառն ամենակալի. եւ տաճարս յորմէ հետէ շինեցաւ։

10․ Զի յառաջ քան զաւուրսն զայնոսիկ՝ վարձք մարդկան՝ ոչ էին յաւգուտ, եւ վարձք անասնոց ոչ էին յարգի, եւ ելողի եւ մտողի ոչ էր խաղաղութիւն ի նեղութենէ. եւ առաքեցից զամենայն մարդիկ իւրաքանչիւր առ ընկեր իւր։

11․ Եւ արդ՝ ոչ ըստ աւուրցն առաջնոց առնեմ ես մնացորդաց ժողովրդեանդ այդորիկ՝ ասէ Տէր ամենակալ. այլ ցուցից խաղաղութիւն.

12․ այգի՝ տացէ զպտուղ իւր, եւ երկիր՝ տացէ զարմտիս իւր, եւ երկինք տացեն զցաւղ իւրեանց, եւ ժառանգեցուցից մնացորդաց ժողովրդեան իմոյ զայն ամենայն։

13․ Եւ եղիցի որպէս էիքն յանէծս ի մէջ ազգաց տունդ Յուդայ՝ եւ տունդ Իսրայէլի. նոյնպէս ապրեցուցից զձեզ՝ եւ եղիջիք յաւրհնութիւն։ Քաջալերեցարուք՝ եւ զաւրասցին ձեռք ձեր.

14. զի այսպէս ասէ Տէր ամենակալ. Որպէս խորհեցայ չարչարել զձեզ, ի բարկացուցանել զիս հարցն ձերոց, ասէ Տէր ամենակալ. եւ ոչ զղջացայ.

15․ նոյնպէս պատրաստեալ եւ խորհեալ եմ յաւուրս յայսոսիկ՝ բարի առնել Երուսաղէմի՝ եւ տանդ Յուդայ։ Քաջալերեցարուք.

16․ այս բանք են զոր առնիցէք։ Խաւսեցարուք զճշմարտութիւն իւրաքանչիւր ընկերի իւրում. եւ դատաստան՝ խաղաղութեան եւ արդար դատեցարուք ի դրունս ձեր։

17․ Եւ իւրաքանչիւր չար ընկերի իւրում մի խորհիք ի սիրտս ձեր. եւ զերդումն սուտ՝ մի սիրէք, զի զայն ամենայն ատեցի, ասէ Տէր ամենակալ։

18․ Եւ եղեւ բան Տեառն ամենակալի առ իս՝ եւ ասէ.

19. Այսպէս ասէ Տէր ամենակալ. Պահքն չորրորդք՝ եւ պահքն հինգերորդք պահքն եւթներորդք՝ եւ պահքն տասներորդք, եղիցին տանդ Յուդայ ի խնդութիւն եւ յուրախութիւն եւ ի տաւնս բարութեանց. եւ ուրախ լիջիք, եւ զճշմարտութիւն եւ զխաղաղութիւն սիրեցէք։

20. Այսպէս ասէ Տէր ամենակալ. Դարձեալ եկեսցեն ժողովուրդք բազումք, եւ բնակիչք քաղաքաց բազմաց.

21․ եւ ժողովեսցին բնակիչք միոյ ի միւս քաղաք, եւ ասասցեն. Երթիցուք աղաչել զերեսս Տեառն, եւ խնդրել զերեսս Աստուծոյ ամենակալի. երթայց եւ ես։

22․ եւ եկեսցեն ժողովուրդք բազումք՝ խնդրել զերեսս Տեառն ամենակալի յԵրուսաղէմ. եւ հաշտեցուցանել զերեսս Տեառն։

23. Այսպէս ասէ Տէր ամենակալ. Յաւուրսն յայնոսիկ, եթէ բուռն հարկանիցեն արք տասն յամենայն լեզուաց ազգաց, բուռն հարկանիցեն զդրաւշակէ առն հրէի եւ ասասցեն, Երթիցուք մեք ընդ քեզ, զի լուաք թէ Աստուած ընդ քեզ է։