Գլուխ 2

   
1. Ժողովեցարուք եւ խնդրեցէք, ազգք անխրատք,

2. մինչ չեւ եղեալ իցէք իբրեւ զծաղիկ անցաւոր, մինչ չեւ եկեալ իցէ աւր բարկութեան սրտմտութեան Տեառն։

3. Խնդրեցէք զՏէր, ամենայն խոնարհք երկրի, իրաւունս արարէք եւ զարդարութիւն խնդրեցէք, եւ տուք պատասխանի նոցա, զի ծածկեսջիք յաւուր բարկութեան Տեառն։

4. Զի Գազա յափշտակեալ լիցի, եւ Ասկաղոն յապականութիւն. եւ Ազովտոս ի միջաւրէի կործանեսցի, եւ Ակկարոն յարմատոյ խլեսցի։

5. Վայ որ բնակեալդ էք ի վիճակս ծովու, բնակիչք կրետացւոց։ Պատգամ Տեառն ի վերայ ձեր, Քանան՝ երկիրդ այլազգեաց. եւ կորուսից զձեզ ի բնակութենէ։

6․ Եւ եղիցի Կրետ ճարակք հաւտից եւ գոմք խաշանց։

7․ Եւ եղիցի վիճակ ծովուն մնացորդաց տանն Յուդայ. եւ ի նոսա ճարակեսցին, եւ ի տունս Ասկաղոնայ առ աւթ դադարեսցեն յերեսաց որդւոցն Յուդայ, զի ելեալ է նոցա յայց Տէր Աստուած իւրեանց. եւ դարձոյց զգերութիւն նոցա։

8․ Լուայ զնախատինս Մովաբու, եւ զկռփանս որդւոցն Ամոնայ, որովք նախատէին զժողովուրդ իմ, եւ մեծաբանէին ի վերայ սահմանաց իմոց։

9․ Վասն այնորիկ կենդանի եմ ես՝ ասէ Տէր Աստուած զաւրութեանց՝ Աստուած Իսրայէլի, զի Մովաբ՝ իբրեւ զՍոդոմ եղիցի, եւ որդիքն Ամոնայ իբրեւ զԳոմոր. եւ Դամասկոս լքեալ իբրեւ զշեղջ կալոյ՝ եւ ապականեալ յաւիտեան։ Մնացորդք ժողովրդեան իմոյ յափշտակեսցեն զնոսա, եւ մնացորդք ազգի իմոյ ժառանգեսցեն զնոսա։

10. Եւ այն նոցա փոխանակ հպարտութեան նոցա, զի նախատեցին եւ մեծաբանեցին ի վերայ Տեառն ամենակալի։

11. Երեւեսցի Տէր ի վերայ նոցա, եւ սատակեսցէ զամենայն աստուածս ազգաց. եւ երկիր պագցեն նմա իւրաքանչիւր ի տեղւոջէ իւրեանց՝ ամենայն կղզիք ազգաց։

12․ Եւ դուք, եթւովպացիք, հարեալք սուսերի իմոյ էք։

13. Եւ ձգեցից զձեռն իմ ի վերայ հիւսւսոյ եւ սատակեցից զԱսորեստանեայն, եւ եդից զՆինուէ յապականութիւն՝ անջրդի իբրեւ զանապատ.

14. եւ արածեսցին ի միջի նորա հաւտք եւ ամենայն գազանք երկրի, եւ գետնառեւծք՝ եւ ոզնիք ի յարկս նորա բնակեսցեն. եւ գազանք գոչեսցեն ի նկուղս նորա. եւ սակռուք ի դրունս նորա, քանզի իբրեւ զմայր է բարձրութիւն նորա։

15. Այս քաղաք վրիժագործ բնակեալ յուսով, որ ասէր ի սրտի իւրում. Ես եմ, եւ ոչ եւս ոք իցէ յետ իմ. զիա՞րդ եղեւ յապականութիւն ճարակ գազանաց. ամենայն որ անցանիցէ ընդ նա, շչեսցէ եւ շարժեսցէ զգլուխ իւր։