1. Եւ տեսի այլ հրեշտակս զաւրաւոր՝ զի իջանէր յերկնից՝ եւ զգեցեալ էր ա՛մպ, եւ ծիածա՛ն ի գլուխ նորա. եւ երեսք նորա իբրեւ զարեգակն, եւ ոտք նորա որպէս սիւն հրոյ:
2. Եւ ունէր ի ձեռին իւրում գրկոյք մի բացեալ. եւ ե՛դ զոտն իւր զա՛ջ ի վերայ ծովու, եւ զձախն ի վերայ երկրի:
3 Եւ աղաղակեաց ի ձա՛յն մեծ՝ գոչեա՛ց իբրեւ զառեւծ. եւ յորժամ աղաղակեաց՝ խաւսեցա՛ն եւթն որոտմունք յիւրեանց ձայնս:
4. Եւ յորժամ խաւսեցան եւթն որոտմունքն՝ կամէի գրե՛լ. եւ լուայ ձա՛յն յերկնից՝ զի ասէր. Կնքեա՛ զոր խաւսեցան եւթն որոտմունք՝ եւ մի՛ գրեր:
5. Եւ հրեշտակն զոր տեսի՝ որ ե՛դ զոտն իւր ի վերայ ծովու եւ զմիւս ի ցամաքի, համբա՛րձ զձեռն իւր զաջ յերկինս.
6. եւ երդուա՛ւ ի կենդանին յաւիտենից, որ հաստատեաց զերկինս՝ եւ որ ի նմա, եւ զերկիր եւ որ ի նմա. զի ո՛չ եւս կայ այլ ժամանակ:
7. Այլ յաւուրս ձայնի եւթներորդ հրեշտակին՝ յորժամ հարցէ՛ զփողն, կատարեսցի՛ խորհուրդն Աստուծոյ՝ որ աւետարանեցաւ ի ծառայից իւրոց մարգարէիցն:
8. Եւ ձայնն զոր լուայ յերկնից՝ դարձեալ խաւսեցա՛ւ ընդիս՝ եւ ասէ. Ե՛րթ ա՛ռ զգրկոյսն՝ զոր ունի հրեշտակն բացեալ ի ձեռին իւրում, եւ կայ ի վերայ ծովու եւ ցամաքի:
9. Եւ ես երթեալ առ հրեշտակն՝ խնդրեցի ի նմանէ. եւ ասէ ցիս. Ա՛ռ զսա՝ եւ կե՛ր զդոյն, եւ դառնասցի՛ յորովայն քո. այլ ի բերան քո է՛ քա՛ղցր իբրեւ զմեղր:
10. Եւ առի զգրկոյսն բացեալ ի հրեշտակէն՝ եւ կլա՛յ զնա. եւ էր ի բերան իմ որպէս մեղր. եւ յորժամ կերայ, դառնացա՛ւ յորովայն իմ:
11. Եւ ասէ ցիս. Հասանէ՛ քեզ դարձեալ մագարէանալ ի ժողովուրդս՝ եւ ի լեզուս եւ ի թագաւորս երկրի
Հաղորդում կայքում սխալի վերաբերյալ
Տվյալ հատվածում առկա է սխալ: