Գլուխ 12

   
1․ Արդ պարծե՛լ ինչ պարտ իցէ. այլ աւգնէ ինչ ո՛չ: Բայց եկից ի տեսի՛լս եւ յայտնութի՛ւնս Տեառն:

2․ Գիտե՛մ այր մի ի Քրիստոս յառա՛ջ քան զչորեքտասա՛ն ամ. եթէ մարմնով՝ ո՛չ գիտեմ, եւ եթէ առա՛նց մարմնոյ՝ ո՛չ գիտեմ, Աստուած գիտէ. յափշտակեալ զայնպիսին մինչեւ յերրո՛րդ երկնից:

3․ Եւ գիտե՛մ զայնպիսի այր. եթէ մարմնով՝ եւ եթէ առա՛նց մարմնոյ՝ ո՛չ գիտեմ. Աստուած գիտէ,

4․ զի յափշտակեցաւ ի դրա՛խտն. եւ լուաւ բա՛նս անճառս, զոր ո՛չ է պարտ մարդոյ խաւսել:

5․ Վասն այնպիսւո՛յն պարծեցայց. այլ վասն անձին ինչ ո՛չ պարծեցայց. բա՛յց եթէ ի տկարութիւնս:

6․ Զի եթէ եւ կամիցի՛մ պարծել, ո՛չ եղէց անզգամ. քանզի զարդա՛րն ասեմ: Այլ անխայե՛մ, գուցէ՛ ոք համարիցի՛ յիս աւելի, քան զոր տեսանիցէ՛ յիս՝ կամ լսիցէ՛ յինէն:

7․ Եւ զի մի՛ առաւելութեամբ յայտնութեանցն հպարտացայց, տուա՛ւ ինձ խա՛յթ մարմնոյ, հրեշտակ սատա՛ն՝ կռփել զիս. զի մի՛ հպարտացայց:
8․ Եւ վասն այնորիկ երի՛ցս անգամ աղաչեցի զՏէր՝ զի ի բա՛ց արասցէ յինէն.

9․ եւ ասէ ցիս. շա՛տ են քեզ շնորհք իմ, զի զաւրութիւն իմ ի տկարութեա՛ն կատարի: Եւ արդ՝ լա՛ւ եւս լիցի՛ ինձ պարծել ի տկարութիւնս, զի բնակեսցէ՛ յիս զաւրութիւնն Քրիստոսի:

10․ Վասն որոյ հաճեա՛լ եմ ընդ տկարութիւնս, ընդ թշնամա՛նս, ընդ վի՛շտս, ընդ հալածա՛նս, եւ ընդ նեղութի՛ւնս վասն Քրիստոսի. զի յորժամ տկարանամ, յա՛յն ժամ զաւրանամ:

11․ Եղէ անզգամ, քանզի դո՛ւք ստիպեցէք. զի ինձ պարտ էր ի ձէնջ վկայութիւն առնուլ, թէ ոչի՛նչ պակաս գտայ քան զլա՛ւ առաքեալսն. զի թէպէտ եւ ես ոչինչ եմ.

12․ սակայն նշանք առաքելո՛յ գործեցան ի ձեզ, ամենայն համբերութեամբ, նշանաւք եւ արուեստիւք՝ եւ զաւրութեամբք:

13․ Եւ արդ զի՞նչ իցէ, որո՞վ պակաս գտայք քան զայլ եկեղեցիս. բայց եթէ այնու, զի ես զձեզ ո՛չ ձանձրացուցի. շնորհեցէ՛ք ինձ զվնասդ զայդ:

14․ Ահաւասիկ այս երիցս անգամ պատրաստեալ եմ գալ առ եւ ձեզ բեռն ինչ ո՛չ եղէց. զի ո՛չ խնդրեմ ինչ զձեր, այլ զձե՛զ. քանզի ո՛չ պարտին որդիք հարց գանձել, այլ հարք որդւո՛ց:

15․ Բայց ես մտադիւրութեա՛մբ ծախեցից եւ ծախեցայց վասն անձանց ձերոց. զի թէպէտ եւ յառաւել սիրոյն զձեզ սակաւ սիրիցեմ:

16․ Այլ գրեթէ ե՛ս ո՛չինչ ծանրացայ այլ քանզի խորագէ՛տ էի, խելա՞ւք կալայ զձեզ:

17․ Մի թէ որովք առաքեցին առ ձեզ, նոքա՛ւք ինչ ագահեցի՞ ի ձէնջ:

18․ Աղաչեցի զՏիտոս՝ եւ առաքեցի ընդ նմա զեղբայրն: Մի թէ ագահեա՞ց ինչ զձեր Տիտոս: Ոչ նովի՞ն ոգւով գնացաք. ոչ նովի՞ն շաւղաւք շրջեցաք:

19․ Դարձեալ՝ համարիցիք եթէ յողո՛ք անկեալ ինչ ձեզ աղերսիցե՞մք. առաջի Աստուծոյ ի Քրիստոս խաւսիմք, զի ամենայն ինչ սի՛րելիք վասն ձերո՛յ շինութեան է:

20․ Այլ երկնչիմ, գուցէ՛ եկեալ՝ ոչ որպիսիս կամիցիմն գտանիցե՛մ զձեզ, եւ ես՝ գտանիցի՛մ ձեզ՝ որպէս եւ դո՛ւք ո՛չ կամիցիք: Գուցէ դարձեալ՝ հե՛ռ, նախա՛նձ, սրտմտութիւնք, գրգռութի՛ւնք, չարախաւսութի՛ւնք, քսութի՛ւնք, հպարտութի՛ւնք, ամպարտաւանութիւնք, խռովութի՛ւնք:

21․ Գուցէ՛ դարձեալ յորժամ գայցեմ՝ նկո՛ւն ինչ առնիցէ զիս Աստուած իմ առ եւ սո՛ւգ առնուցում վասն բազմաց յառաջագոյն մեղուցելոց եւ ո՛չ ապաշխարելոց՝ ի վերայ պղծութեան, եւ պոռնկութեան, եւ գիջութեան՝ զոր գործեցին: