1. Եւ նշան մեծ երեւեցաւ յերկինս: Կին մի՝ արկեալ զիւրեւ զարեգակն, եւ լուսին ի ներքոյ ոտից նորա. եւ ի վերայ գլխոյ նորա պսա՛կ աստեղեայ յերկոտասանից:
2. Եւ էր յղի՛, եւ ճչէր յերկնելն, եւ բազում վշտաւք մերձ էր ի ծնանել:
3. Եւ երեւեցաւ ա՛յլ նշան յերկինս՝ եւ ահաւասիկ վիշա՛պ մի մեծ հրեղէն, որոյ էին գլուխք եւթն՝ եւ եղջեւրք տա՛սն. եւ ի վերայ գլխոյ նորա եւթն խոյրք:
4. Եւ տուտն նորա քարշէ՛ր զերրորդ մասն աստեղաց երկնից, եւ ա՛րկ զնոսա յերկիր. եւ վիշապն կա՛յր առաջի կնոջն՝ որ հանդերձեալ էր ծնանել, զի յորժամ ծնցի կինն զորդի իւր՝ կլցէ՛ զնա վիշապն:
5. Եւ ծնաւ կինն արու՝ որ հանդերձեալ է հովուել զամենայն հեթանոսս գաւազանաւ երկաթեաւ. եւ յափշտակեցաւ որդի նորա առ Աստուած, եւ առ աթոռ նորա:
6. Եւ կինն փախեաւ յանապատ՝ ուր էր տեղի նմա պատրաստեալ յԱստուծոյ, զի կերակրեսցի՛ անդ աւուրս հազար երկերիւր եւ վաթսուն:
7. Եւ եղեւ պատերա՛զմ յերկինս, Միքայէլ եւ հրեշտակք իւր կռուէի՛ն ընդ վիշապին, եւ վիշապն պատերազմէ՛ր զաւրաւք իւրովք:
8. Եւ ոչ կարացին կալ ընդդէմ, եւ տեղի ո՛չ գտաւ նոցա յերկինս:
9. Եւ անկաւ վիշապն մեծ՝ ա՛ւձն առաջին, որ անուանեալ կոչի Բէեղզեբո՛ւղ եւ Սատանայ, որ մոլորեցոյց զամենայն տիեզերս երկրի, եւ հրեշտակք նորա ընդ նմա անկան:
10. Եւ լուա՛յ ձայն մեծ յերկնից՝ որ ասէր. Արդ եղեւ զաւրութիւն եւ փրկութիւն եւ արքայութիւն Աստուծոյ մերոյ, եւ իշխանութիւն աւծելոյ նորա, զի անկա՛ւ չարախաւսն եղբարց մերոց, որ չարախաւսէ՛ր զնոցանէ առաջի Աստուծոյ՝ զտիւ եւ զգիշեր:
11. Եւ նոքա յաղթեցին նմա արեամբ Գառինն, եւ բանիւ վկայութեան նորա, եւ ո՛չ հաճեցան ընդ վիշապն մինչեւ ի մահ:
12. Վասն այսորիկ ուրա՛խ լիցին երկինք՝ եւ ամենայն որ բնակեա՛լ են ի նմա: Վա՛յ երկրի եւ ծովու, զի անկա՛ւ բանսարկուն առ ձեզ, որ ունի զցասումն բազում. եւ կացցէ՛ առ սակաւ մի ժամանակս:
13. Եւ յորժամ ետես վիշապն թէ անկաւ յերկիր, զհետ եղեւ կնոջն որ ծնաւ զմանուկն արու:
14. Եւ տուա՛ւ կնոջն երկու թեւք արծուոյ մեծի՝ զի թռիցէ յանապատ ի տեղի իւր, ուր կերակրէր անդ՝ ժամանա՛կ եւ ժամանակս եւ կէ՛ս ժամանակի՝ յերեսաց աւձին:
15. Եւ եհե՛ղ աւձն ի բերանոյ իւրմէ զհետ կնոջն ջուր՝ զի ընկղմեսցէ զնա:
16. Եւ աւգնեաց երկիր կնոջն, եւ եբա՛ց երկիր զբերա՛ն իւր եւ եկո՛ւլ զջուրն՝ զոր եհեղ վիշապն ի բերանոյ իւրմէ:
17. Եւ ցասեա՛ւ վիշապն ընդ կնոջն, եւ գնա՛ց պատերազմել ընդ այլ զաւակս նորա՝ որք պահէին զպատուիրանս Աստուծոյ, եւ ունէին զվկայութիւնն Յիսուսի:
18. Եւ կա՛ց ի վերայ աւազոյ ծովու:
Հաղորդում կայքում սխալի վերաբերյալ
Տվյալ հատվածում առկա է սխալ: