1. Եւ տեսի ա՛յլ նշան մե՛ծ եւ սքանչելի. հրեշտակս եւթն՝ որք ունէին եւթն վէրս զկնի. զի նոքա՛ւք կատարէր բարկութիւն Աստուծոյ:
2. Եւ տեսի որպէս ծո՛վ ապակեղէն խառնեալ հրով. եւ որք յաղթեցին գազանին՝ եւ թուոյ անուան նորա՝ եւ պատկերի նորա՝ եւ դրոշմի նորա, նոքա կային ի վերայ ծովուն ապակեղինի. եւ ունէին զքնարս Աստուծոյ.
3. եւ երգէին զերգս Մովսիսի առաջի Աստուծոյ, եւ զերգս Գառինն՝ ասելով. թէ մեծամեծ եւ սքանչելի՛ են գործք քո՝ Տէր Աստուած ամենակալ, արդա՛ր՝ եւ ճշմարիտ են ճանապարհք Քո, թագաւո՛ր ամենայն հեթանոսաց:
4. Եւ ո՞վ ոք ոչ երկիցէ՝ եւ փառաւորեսցէ զՏէր անուն Քո. զի դու միայն սուրբ, եւ արժանի երկրպագելոյ. զի ամենայն հեթանոսք եկեսցեն եւ երկի՛ր պագցեն առաջի Քո Տէր, յորժամ արդարութիւն Քո յայտնեսցի:
5. Եւ յետ այսորիկ տեսի՝ եւ բացա՛ւ տաճարն խորանին վկայութեան՝ որ էր ի յերկինս:
6. Եւ ելանէին եւթն հրեշտակք՝ որ ունէին եւթն հարուածս, եւ զգեցեա՛լ էին ի տաճարին կտաւս մաքուրս՝ եւ պայծառս. եւ գաւտեւորեա՛լք էին առ ստեամբք իւրեանց գաւտիս ոսկեղէնս:
7. Եւ ի չորից կենդանեացն տուաւ եւթն հրեշտակացն՝ եւթն սկաւառակս լի՛ ցասմամբն Աստուծոյ կենդանւոյն յաւիտեանս յաւիտենից:
8. Եւ լցա՛ւ տաճարն ծխով փառացն Աստուծոյ՝ եւ զաւրութեան նորա. եւ ո՛չ ոք կարէ մտանել ի տաճարն՝ մինչեւ կատարեսցին եւթն հարուածքն յեւթն հրեշտակացն:
Հաղորդում կայքում սխալի վերաբերյալ
Տվյալ հատվածում առկա է սխալ: