1. Եւ եկն մի ոմն յեւթն հրեշտակացն՝ որք ունէին զեւթն սկաւառակսն. Խաւսեցա՛ւ ընդ իս՝ եւ ասէ. Ե՛կ այսր եւ ցուցից քեզ զդատաստանս մեծ պոռնկին՝ որ նստի ի վերայ ջուրց բազմաց,
2. ընդ որում պոռնկեցան թագաւորք երկրի, եւ արբեցան բնակիչք երկրի ի գինւոյ արբեցութեան պոռնկութեան նորա:
3. Եւ առ տարա՛ւ զիս յանապատ Հոգւովն, եւ տեսի կին մի՝ զի նստէր ի վերայ կարմիր գազանի, եւ լի՛ էր անուամբ հայհոյութեան, եւ գազանն զոր տեսի՝ ունէր գլուխս եւթն եւ եղջեւրս տասն:
4. Եւ կինն զգեցեալ էր ծիրանիս եւ կարմիրս, եւ զարդարեալ ոսկւով եւ մարգարտով եւ ակամբք պատուականաւք, ունելով բաժակ ոսկի ի ձեռին իւրում, եւ լի՛ էր գարշելի եւ անմաքուր պոռնկութեամբ:
5. Եւ ի ճակատն նորա գրեալ անուն՝ Խորհրդով, մեծն Բաբելովն՝ մա՛յր պոռնկաց եւ գարշելեաց երկրի:
6. Եւ տեսի զկինն արբեցեա՛լ յարենէ սրբոց՝ եւ յարենէ ամենայն վկայիցն. եւ զարմացա՛յ՝ տեսեալ զնա՝ զարմացումն մեծ:
7. Եւ ասէ ցիս հրեշտակն. Ընդէ՞ր զարմացար, ե՛ս ասացից քեզ զխորհուրդս կնոջն, եւ գազանին որ բարձեալ ունի զնա, որ ունի զեւթն գլուխն՝ եւ տասն եղջեւր:
8. Եւ գազանդ զոր տեսեր՝ որ է՛ր եւ չէ՛ր, եւ հանդերձեա՛լ է ելանե՛լ ի դժոխոց՝ եւ ի կորուստ երթալ: Եւ զարմացա՛ն ամենեքեան որ բնակեալ են ի վերայ երկրի, որոց ո՛չ էր գրեալ անուանք նոցա ի գի՛ր կենաց իսկզբանէ աշխարհի. զոր տեսանէիր զգազանն, զի է՛ր՝ եւ չէ՛, եւ մերձ է:
9. Ա՛ստ է իմաստութիւն՝ որ ունի միտս: Եւ եւթն գլուխն՝ եւթն լերինք են, ուր կինն նստեալ էր ի վերայ նոցա, եւ նոքին թագաւորք են եւթն. եւ թագաւորք եւթն գոլով,
10. հինգն անկա՛ն, եւ մին եկաց, եւ մինն ո՛չ է եկեալ. եւ յորժամ գայ՝ սակաւիկ մի ժամանակ ունի:
11. Եւ գազանն՝ որ է՛ր՝ եւ չէ, եւ նա ութերո՛րդ եւ է յեւթանց անտի, եւ ի կորուստ երթալո՛ց է:
12. Եւ տասն եղջեւրն զոր տեսեր՝ տասն թագաւորք են, որոց չե՛ւ եւս է առեալ զթագաւորութիւն, այլ առնուն՝ եւ կա՛ն իշխանք ի մի ժամ, եւ առնուն նոքա զիշխանութիւն ընդ գազանին:
13. Սոքա մի կամս ունին, եւ զզաւրութիւն եւ զիշխանութիւն գազանին տան:
14. Եւ ընդ Գառինն պատերազմին, եւ Գառն յաղթէ՛ նոցա, զի Տէ՛ր է նոցա, եւ թագաւոր թագաւորաց, եւ որք ընդ նմա՝ կոչեցեալք են, ընտրեա՛լք եւ հաւատացեալք:
15. Եւ ասա՛ց ցիս. Եւ զջուրն զոր տեսեր՝ ուր նստէր պոռնիկն, ժողովուրդք են, եւ բազմութիւնք, եւ ա՛զգք եւ լեզուք:
16. Եւ տասն եղջեւրքն՝ զոր տեսեր գազանին, նոքա տեսցեն զպոռնիկն՝ եւ ատեսցեն զնա, եւ զմարմին նորա կերիցե՛ն՝ եւ այրեսցեն զնա հրով:
17. Քանզի Աստուած եդ ի սիրտս նոցա առ ի լինե՛լ նոցա մի՛ կամս, եւ տա՛լ զթագաւորութիւն գազանին՝ մինչեւ կատարեսցի՛ բանն Աստուծոյ:
18. Եւ կինն զոր տեսեր՝ է՛ քաղաքն մեծ, որ ունի զթագաւորութիւն ի վերայ թագաւորութեանց երկրի:
Հաղորդում կայքում սխալի վերաբերյալ
Տվյալ հատվածում առկա է սխալ: