1. Եւ տեսի ա՛յլ հրեշտակ զի իջանէր յերկնից, եւ ունէր զփականս դժոխոց, եւ շղթայս մե՛ծ ի ձեռին իւրում.
2. եւ ըմբռնեա՛ զվիշապն զառաջին, որ է բանսարկուն եւ սատանայ, եւ կապեաց զնա հազա՛ր ամ.
3. եւ ա՛րկ զնա յանդունդս դժոխոց, եւ փակեաց եւ կնքեա՛ց զնա՝ զի այլ մի՛ եւս մոլորեցուսցէ զազգս, մինչեւ կատարեսցի հազար ամն. եւ յետ այնորիկ պա՛րտ է լուծանե՛լ նմա սակաւ մի ժամանակ:
4. Եւ տեսի աթո՛ռս, եւ նստան ի վերայ նոցա, եւ դատաւորութիւն տուաւ նոցա՝ ընտրել զհոգիս չարչարելոցն վասն վկայութեան Յիսուսի՝ եւ վասն Բանին Աստուծոյ. եւ զորս ո՛չ երկիր պագին գազանին, եւ ո՛չ առին զդրոշմ նորա ի ճակատս իւրեանց՝ եւ ո՛չ ի վերայ աջու ձեռին իւրեանց. եւ կացին՝ եւ թագաւորեցին ընդ Քրիստոսի հազա՛ր ամ:
5. Եւ յետ այսորիկ ի մեռելոց ո՛չ ոք եկաց, մնչեւ ի կատարել հազա՛ր ամին: Ա՛յս է յարութիւն առաջին:
6. Երանի՛ սրբոցն, որք ունին բաժին ի յարութեանն առաջնում. ի վերայ սոցա երկրորդ մահն ո՛չ ունի իշխանութիւն. այլ եղիցին քահանայք Աստուծոյ՝ եւ Տեառն Յիսուսի Քրիստոսի. եւ թագաւորեսցեն ընդ նմա հազա՛ր ամ:
7. Եւ յետ հազար ամին լուծցէ՛ զսատանայ՝ եւ հանցէ՛ ի բանտէ անտի. ելցէ՛ եւ մոլորեցուսցէ զազգս ամենայն ընդ չորս կողմանս երկրի. եւ զԳո՛գ եւ զՄագոգ առցէ ի ձեռս՝ ժողովե՛լ նոքաւք զամենայն զաւրս ի պատերազմ. որոյ թի՛ւ նոցա իբրեւ զաւազ ծովու:
8. Եւ ելցեն ի լայնութիւն երկրի, եւ պատեսցեն շուրջ զբանակս սրբոցն, եւ զքաղաքին սիրելւոյ:
9. Եւիջցէ հուր յերկնից առ ի յԱստուծոյ՝ եւ կերիցէ՛ զնոսա, եւ զզաւրագլուխն նոցա զսատանայ՝ որ մոլորեցոյց զնոսա. եւ արկցէ՛ զնոսա ի ծովն հրոյ եւ ծծմբոյ ուր էր գազանն՝
10. եւ սուտ մարգարէն, եւ չարչարեսցին զտիւ եւ զգիշեր:
11. Եւ տեսի աթոռ սպիտա՛կ մեծ, եւ ի վերայ նորա նստեալ՝ յորոյ երեսացն երկնչէին եւ փախչէին երկինք եւ երկիր, եւ տեղի ո՛չ գտաւ նոցա:
12. Եւ տեսի զմեռեալս մեծամեծս եւ զփոքունս որ կային առաջի աթոռոյն. եւ գրեանք բանային. եւ ա՛յլ գիրք բացաւ կենաց, եւ դատեցան մեռեալք ի գրելոցն՝ ըստ գոծոց իւրեանց:
13. եւ ե՛տ ծով զմեռեալս իւր, եւմահ եւ դժոխք զիւրեանց մեռեալս. եւ դատեցան իւրաքանչիւր ըստ գործոց իւրեանց:
14. Մահ՝ եւ դժոխք մատնեցան ի լիճ հրոյն:
15 Եւ որ ո՛չ ոք գտաւ ի գիրն կենաց գրեալ՝ արկաւ ի լիճ հրոյն:
Հաղորդում կայքում սխալի վերաբերյալ
Տվյալ հատվածում առկա է սխալ: