1. Եւ տեսի ի ձեռս աջոյ՝ որ նստէր ի վերայ աթոռոյն գիրք՝ գրեա՛լ ներքոյ եւ արտաքոյ, եւ կնքեալ եւթն կնքով:< 2. Եւ տեսի հրեշտակ մի զաւրաւոր՝ զի քարոզէր ի ձայն մեծ. Ո՛ է արժանի բանալ զգիրքս՝ եւ լուծանել զկնիք նորա: 3. Եւ ո՛չոք կարէր՝ ո՛չ ի յերկինս եւ ո՛չ յերկիր, եւ ո՛չ ի ներքոյ երկրի՝ բանալ զգիրքն, զի ո՛չ տեսին զնա: 4. Եւ ես լայի՛ ուժգին՝ զի ո՛չոք գտաւ արժանի բանալ զգիրքն եւ հայե՛լ ի նա: 5. Եւ մի յերիցանցն ասէ ցիս. Մի՛ լար, ահաւասիկ յաղթեա՛ց առեւծն յազգէն Յուդայ յարմատոյն Դաւթի՝ բանա՛լ զգիրքն՝ եւ լուծանե՛լ զեւթն կնիքսն նորա: 6. Եւ տեսի ի մէջ աթոռոյն եւ ի մէջ չորից կենդանեացն, եւ ի մէջ երիցանցն՝ գառն կայր զենեալ, որ ունէր եւթն եղջեւրս, եւ աչս եւթն՝ որ են եւթն Հոգիք Աստուծոյ, որ են առաքեալ ընդ ամենայն երկիր: 7. Եւ եկն ընկալաւ յաջոյ ձեռանէ նորա՝ որ նստէր ի վերայ աթոռոյն: 8. Եւ յորժամ առ զգիրն, չորք կենդանիքն եւ քսան եւ չորք երիցունքն անկանէին առաջի գառինն, եւ ունէին իւրաքանչիւր քնա՛ր՝ եւ բուրվա՛ռ ոսկի լի՛ խնկով, որ է աղաւթք սրբոցն. 9. եւ աւրհնէ՛ին ե՛րգս նորս եւ ասէին. Արժանի՛ ես առնուլ զգիրդ՝ եւ բանալ զկնիք դորա, զի զենա՛ր՝ եւ գնեցե՛ր զմեզ Աստուծոյ արեամբդ քով՝ յամենայն ազգաց եւ ի լեզուաց, եւ ի ժողովոց հեթանոսաց. 10. եւ արարե՛ր զսոսա Աստուծոյ մերոյ թագաւորս եւ քահանա՛յս՝ թագաւորել ի վերայ երկրի: 11. Եւ տեսի եւ լուայ զձայն հրեշտակաց բազմաց՝ որք կային շուրջ զաթոռովն եւ զչորիւք կենդանեաւքն եւ զքահանայիւքն. եւ է՛ր թիւն նոցա՝ բեւրք բիւրուց՝ եւ հազարք հազարաց. 12. ասէին ձայնիւ մեծաւ. Արժան է Գառնդ զենեալ առնուլ զմեծութիւն եւ զիմաստութիւն, եւ զզաւրութիւն, եւ զպատիւ, եւ զփառս, եւ զաւրհնութիւն. 13. Եւ ամենայն արարածք՝ որ են յերկինս եւ երկրի, եւ ի ծովու եւ որ ի նոսա՝ լուայ զի ասէին. որ նստի յաթոռն՝ եւ Գառնն՝ աւրհնեա՛լ բարձրացեալ եւ փառաւորեալ յաւիտեանս յաւիտենից. 14. եւ չորք կենդանիքն ասէին. Ամէ՛ն: Եւ երիցունքն անկանէին առաջի նորա եւ երկի՛ր պագանէին:
Հաղորդում կայքում սխալի վերաբերյալ
Տվյալ հատվածում առկա է սխալ: