Գլուխ 6

   
1․ Գործակի՛ց եմք ձեր՝ եւ աղաչեմք. մի՛ ընդունայն զշնորհսն Աստուծոյ ընդունել ձեզ:

2․ Զի ի ժամանակի ընդունելութեան՝ ասէ, լուայ քեզ, եւ յաւուր փրկութեան աւգնեցի՛ քեզ: Ահա՛ւասիկ ժամանակ ընդունելի. ահա ա՛ւր փրկութեան:

3․ Մի՛ եւ մի՛ իւիք տայցէք պատճառս, զի մի՛ արատեսցի պաշտաւնն.

4․ այլ յամենայնի ընծայեցուցէ՛ք զանձինս ձեր իբրեւ զպաշտաւնեա՛յս Աստուծոյ՝ համբերութեամբ բազմաւ, ի նեղութիւնս, ի վի՛շտս, ի չարչարա՛նս,

5․ ի գանս, ի բա՛նտս, ի խռովութիւնս, յաշխատութիւնս, ի հսկմո՛ւնս, ի պահս,

6․ ի սրբութեան, ի գիտութեան, յերկայնմտութեան, ի քաղցրութեան, ի հոգի՛ սուրբ, ի սէ՛ր առանց կեղծաւորութեան,

7․ ի բա՛նս ճշմարտութեան, ի զաւրութեան Աստուծոյ. վասն զինո՛ւն արդարութեան՝ որ ընդ աջմէն եւ ընդ ահեկէն

8․ փառա՛ւք եւ անարգութեամբ, գովութեամբ եւ պարսաւանաւք, իբրեւ մոլարք՝ եւ ճշմարի՛տք, իբրեւ անծանաւթք՝ եւ ծանուցեա՛լք,

9․ իբրեւ մահկանացուք՝ եւ ահա՛ւասիկ կենդանի եմք, իբրեւ խրատեալք՝ եւ ո՛չ մահապարտեալք.

10․ իբրեւ տրտմեալք, եւ հանապազ ուրա՛խ եմք. իբրեւ տնանկք՝ եւ զբազո՛ւմս մեծացուցանեմք. իբրեւ ոչինչ ունիցիմք, եւ զամենայն ինչ ունիմք:

11․ Բերանք մեր բացեալ են առ ձեզ՝ Կո՛րնթացիք. եւ սիրտք մեր ընդարձակեա՛լք:

12․ Ո՛չինչ նեղիք ի մէնջ, բայց եթէ ի գութս ձեր նեղիցիք.

13․ արդ՝ զնոյն հատուցումն իբրեւ ընդ որդեակս ունիմ. ընդարձակեցարո՛ւք եւ դուք.

14․ եւ մի՛ լինիք լծակիցք անհաւատից: Քանզի զի՞նչ հաղորդութիւն է արդարութեան ընդ անաւրէնութեան. եւ կամ զի՞նչ հաւասարութիւն է լուսոյ ընդ խաւարի.

15․ եւ կամ զի՞նչ միաբանութիւն է Քրիստոսի ընդ բելիարայ. կամ զի՞նչ բաժին կայ հաւատացելոյն ընդ անհաւատին.

16․ կամ զի՞նչ նմանութիւն է տաճարի Աստուծոյ՝ մեհենաց: Ապաքէն դուք տաճար Աստուծոյ կենդանւոյ էք. որպէս ասաց Աստուած, թէ բնակեցա՛յց ի նոսա, եւ գնացից ի նոսա. եւ եղէց նոցա Աստուած, եւ նոքա եղիցին իմ ժողովուրդք:

17. Վասն որոյ ելէ՛ք ի միջոյ նոցա եւ մեկնեցարո՛ւք, ասէ Տէր. եւ ի պիղծս մի՛ մերձենայք.

18․ եւ ես ընկալայց զձեզ. եւ ես եղէց ձեզ ի հա՛յր, եւ դուք եղիջիք ինձ յուստերս եւ ի դստերս, ասէ Տէր ամենակալ: