1. Եւ յորժամ եբաց զկնիքն եւթներրորդ՝ եղեւ լռութիւն յերկինս՝ որպէս կէ՛ս ժամու:
2. Եւ տեսի հրեշտակս եւթն, որ առաջի Աստուծոյ կային. եւ տուաւ նոցա եւթն փողս:
3. Եւ ա՛յլ հրեշտակ եկն եկա՛ց առ սեղանն, եւ ունէր խնկանո՛ց ոսկի. եւ տուաւ նմա խունկ բազում, զի մատուսցէ զաղաւթս ամենայն սրբոց ի վերայ ոսկեղէն սեղանոյ առաջի աթոռոյն:
4. Եւ ել ծուխ խնկոցն՝ աղաւթք սրբոցն ի ձեռաց հրեշտակացն առաջի Աստուծոյ:
5. Եւ ելից հրեշտակն զխնկանոցն ի հրոյ սեղանոյն, եւ արկ զնա յերկիր. եւ եղեւ որոտո՛ւմն եւ ձայնք, եւ փայլատակումն եւ շարժումն մեծ:
6. Եւ եւթն հրեշտակքն որ ունէին եւթն փողս՝ պատրաստեցին զինքեանս առ ի հարկանել:
7. Եւ առաջին հրեշտակն եհա՛ր զփողն, եւ եղեւ կարկո՛ւտ եւ հո՛ւր, եւ արի՛ւն խառնեալ՝ եւ անկա՛ւ յերկիր, եւ զերրորդ մասն երկրի այրեա՛ց, եւ զերրորդ մասն ծառոց այրեա՛ց, եւ զամենայն դալար խոտոյ այրեա՛ց:
8. Եւ երկրորդ հրեշտակն փողեաց, եւ իբրեւ զլեառն մի մեծ հրդեհեալ անկա՛ւ ի ծով, եւ եղեւ երրորդ մասն ծովուն արիւն.
9. եւ սատակեցա՛ւ երրորդ մասն լաւղակաց, եւ որ ունէր շունչ կենդանի՝ ապականեցաւ:
10. Եւ երրո՛րդ հրեշտակն փողեաց, եւ անկաւ յերկնից աստղ մի մեծ՝ բորբոքեա՛լ իբրեւ զլամբար, եւ անկա՛ւ յերրորդ մասն գետոց եւ աղբերաց.
11. եւ էր անուն աստեղն դառնութի՛ւն, եւ բազո՛ւմք մեռան ի դառնութենէ ջուրցն:
12. Եւ չորրորդ հրեշտակն փողեաց, եւ վիրաւորէ՛ր երրորդ մասն արեգական՝ եւ երրորդ մասն լուսնի՝ եւ երրորդ մասն աստեղաց. եւ խաւարէր երրորդ մասն նոցա, եւ երրորդ մասն գիշերւոյ նո՛յնպէս:
13. Եւ տեսի՝ եւ լուայ ձա՛յն հրեշտակի թռուցելոյ ի մէջ երկնից՝ զի ասէր ի ձայն մեծ. Վա՛յ, վա՛յ, վա՛յ՝ որ բնակեալ են յերկրի, յորժամ լինիցի ձայն երի՛ցն եւս փողոց, զոր կամիցին հրեշտակքն հարկանել:
Հաղորդում կայքում սխալի վերաբերյալ
Տվյալ հատվածում առկա է սխալ: