Գլուխ 1

   
1. Պաւղոս ծառայ Աստուծոյ, եւ առաքեալ Յիսուսի Քրիստոսի, ըստ հաւատոց ընտրելո՛ցն Աստուծոյ, եւ ի գիտութի՛ւն ճշմարտութեան, որ ընդ աստուածպաշտութեանն

2. յուսով կենա՛ցն յաւիտենից, զոր խոստացաւ անսո՛ւտն Աստուած յառա՛ջ քան զժամանակս յաւիտենից.

3. բայց յայտնեաց իւրո՛վք ժամանակաւք զբանն իւր քարոզութեամբ, որոյ եղէ ես հաւատարիմ, ըստ հրամանի փրկչին մերոյ Աստուծոյ:

4. Տիտոսի որդւոյ սիրելւոյ ըստ հասարակա՛ց հաւատոց, շնորհք, եւ խաղաղութիւն յԱստուծոյ ի հաւրէ՝ եւ ի Քրիստոսէ Յիսուսէ փրկչէ՛ մերմէ:

5. Վասն այնորիկ իսկ թողի զքեզ ի Կրիտէ, զի որ ինչ միանգամ պակաս իցէ՝ ուղղեսցե՛ս, եւ կացուսցես ըստ քաղաքաց երիցո՛ւնս, որպէս եւ ես քեզ պատուիրեցի:

6. Եթէ ոք անարա՛տ իցէ, միո՛յ կնոջ այր, որդեակս ունիցի հաւատացեալս, եւ ոչ յամբաստանութիւն անառակութեան, կամ անհնազանդս:

7. Զի պա՛րտ է եպիսկոպոսին անարա՛տ լինել, որպէս եւ Աստուծոյ տնտեսի. մի՛ յանդուգն, մի՛ բարկացաւղ, մի՛ թշնամանաւղ, մի՛ հարկանաւղ, մի՛ զաւշաքաղ.

8. այլ՝ հիւրասէ՛ր, բարեսէ՛ր, ցա՛ծ, արդա՛ր, սո՛ւրբ, ժուժկա՛լ.

9. վերակացո՛ւ լինել, հաւատարիմ բանին վարդապետութեան. զի կարաւղ իցէ եւ մխիթարել ողջմտութեամբ վարդապետութեանն, եւ զհակառակորդսն կշտամբե՛լ:

10. Քանզի բազումք են անհնազանդք, զրայխա՛ւսք, եւ մտախա՛բք, մանաւանդ որ ի թլփատութենէ անտի են.

11. զորս պա՛րտ է ըմբերանե՛լ. որք զամենայն տունս կործանեն, եւ ուսուցանեն՝ զոր չէ՛ արժան, վասն զաւշաքաղութեան:

12. Ասաց ոմն ի նոցանէ՝ իւրեա՛նց իսկ մարգարէ, Կրէտացիք հանապազասո՛ւտք, չարաճճի՛ք, դատարկապո՛րտք:

13. Եւ ստոյգ է վկայութիւնս այս: Վասն որոյ կշտամբեսցե՛ս զնոսա խստագոյնս, զի առողջասցին ի հաւատս.

14. եւ մի հայեսցին ի հրեական առասպելս, եւ ի պատուէրս մարդկան զառածելոցն ի ճշմարտութենէ:

15. Ամենայն ինչ սո՛ւրբ է սրբոց, այլ պղծոցն եւ անհաւատից ոչի՛նչ է սուրբ. այլ պղծեալ են միտք եւ խորհուրդք նոցա:

16. Խոստանան գիտել զԱստուած, եւ գործովք իւրեանց ուրանա՛ն. պի՛ղծք եւ անհաւատք, եւ յամենայն գործս բարեաց անպիտանք: