Գլուխ 3

   
1․ Այսուհետեւ եղբա՛րք իմ, ուրա՛խ լերուք ի Տէր. զնոյն գրել առ ձեզ՝ ինձ ոչ դանդաղելի է, եւ ձեզ կարի՛ զգուշալի:

2․ Զգո՛յշ եղերուք ի շանց անտի. զգո՛յշ եղերուք ի չար մշակաց անտի. զգոյշ եղերուք ի կրճատութենէ անտի:

3․ Զի թլփատութիւնն մե՛ք եմք, որ հոգւովն Աստուծոյ պաշտեմք, եւ պարծիմք ի Քրիստոս Յիսուս, եւ ո՛չ ի մարմին պանծացեալ եմք:

4․ Թէպէտ եւ ես իսկ զնոյն վստահութիւն ունի՛մ եւ ի մարմնի, եթէ ոք համարիցի ա՛յլազգ վստահ լինել ի մարմին, առաւե՛լ եւս ես.

5․ թլփատութեամբ ութաւրեայ, յազգէ Իսրայէլի, ի ցեղէ՛ Բենիամինի. Եբրայեցի՛ յեբրայեցւոց. ըստ աւրինացն փարիսեցի՛.

6․ ըստ նախանձայոյզ լինելոյ՝ հալածէի՛ զեկեղեցին. ըստ արդարութեան աւրինացն լիեալ անարա՛տ:

7․ Այլ որ ինչ ինձ շա՛հն էր, զայն վնաս համարիմ վասն Քրիստոսի:

8․ Այլ եւ համարիմ իսկ զամենայն վնաս՝ վասն առաւել գիտութեանն Յիսուսի Քրիստոսի Տեառն մերոյ: Վասն որոյ յամենայնէ զրկեցայ՝ եւ համարիմ կղկղանս, զի զՔրիստոս շահեցայց.

9․ եւ գտա՛յց ի նմա. իբրեւ ո՛չ եթէ զի՛մ ինչ արդարութիւն՝ որ յաւրինաց անտի է ունիցիմ, այլ զհաւատո՛ցն Քրիստոսի, որ յԱստուծոյ արդարութիւնն

10․ հաւատովք ճանաչե՛լ զնա, եւ զզաւրութիւն յարութեան նորա, եւ զհաղորդութիւն չարչարանաց նորա, կերպարանակի՛ց լինել մահու նորա.

11․ թէ որպէս հասից ի մեռելոցն յարութիւն:

12․ Իբր ո՛չ եթէ արդէն առեալ իցէ, կամ արդէն կատարեալ իցեմ. զհետ մտեա՛լ եմ թէ հասի՛ց, մանաւանդ թէ ըմբռնեալ իսկ իցեմ ի Քրիստոսէ Յիսուսէ:

13․ Ե՛ղբարք՝ ես ո՛չ համարիմ զանձն իմ թէ հասեալ իցեմ. բայց մի ինչ է, զի զառ ի յետոյսն մոռացեալ է, եւ ի յառաջադէ՛մսն նկրտեալ եմ.

14․ ուշ եդեալ ընթանամ ի կէտ կոչմանն Աստուծոյ, ի Քրիստոս Յիսուս:

15․ Այսուհետե՛ւ որ միանգամ կատարեալքդ էք, զա՛յս խորհեցարո՛ւք. եւ եթէ ա՛յլ ազգ ինչ խորհիցիք, սակայն եւ զա՛յն Աստուած ձեզ յայտնեսցէ:

16․ Բայց յոր ժամանեցա՛քս՝ զսոյն խորհել, եւ սմի՛ն կանոնի միաբան լինել:

17․ Նմանա՛ւղք ինձ եղիջիք ե՛ղբարք, եւ գիտեսջի՛ք զայնպիսիսն որ այնպէ՛սն գնայցեն, որպէս ունի՛քդ զմեզ ձեզ աւրինակ:

18․ Զի բազո՛ւմք գնան, զորոց բազում անգամ ասէի բայց ա՛րդ՝ եւ լալով իսկ ասեմ զթշնամեաց խաչին Քրիստոսի.

19․ որոց կատարածն կորո՛ւստ որոց Աստուած որովայնն իւրեանց է, եւ փա՛ռք ամաւթն իւրեանց, որք զերկրաւո՛րս եւ եթ խորհին:

20․ Այլ մեր առաքինութիւն յերկինս է, ուստի եւ փրկչի՛ն ակն ունիմք՝ Տեառն Յիսուսի Քրիտոսի.
21․ որ նորոգեսցէ զմարմին խոնարհութեան մերոյ, կերպարանակի՛ց լինել մարմնոյ փառաց իւրոց, ըստ զաւրութեանն՝ առ ի կարաւղ լինելոյ հնազանդեցուցանե՛լ ընդ իւրեւ զամենայն: