1. Այլ դու որդեա՛կ իմ զաւրացի՛ր շնորհաւքն՝ որ ի Քրիստոս Յիսուս:
2. Եւ զոր լուար յինէն բազում վկայիւք, զայն աւանդեսցե՛ս հաւատարիմ մարդոց, որք բաւակա՛ն իցեն եւ զա՛յլս ուսուցանել:
3. Վշտակի՛ց լեր իբրեւ զբարւոք զինուոր Քրիստոսի Յիսուսի:
4. Ո՛չ ոք զինուորեալ աստէն ընդ կեանս աշխարհիս պատաղի, եթէ զաւրավարին հաճո՛յ լինիցի:
5. Եւ եթէ մարտիկ ոք իցէ՝ ո՛չ պսակի եթէ ոչ ըստ աւրինին մարտիցէ.
6. եւ հողագործի՛ն աշխատելոյ, պարտ է նախ ի պտղոյն վայելե՛լ:
7. Իմա՛ց զինչ ասեմս. տացէ՛ քեզ Տէր իմաստութի՛ւն յամենայնի:
8. Յիշեա՛ զՔրիստոս Յիսուս յարուցեալ ի մեռելոց՝ ի զաւակէ Դաւթի, ըստ աւետարանիս իմում.
9. յորում չարչարիմ կապանաւք չափ իբրեւ զչարագործ. այլ բանն Աստուծոյ՝ ո՛չ եթէ կապեալ իցէ:
10. Վասն այնորիկ ամենայնի համբերեմ վասն ընտրելոցն, զի եւ նոքա փրկութեանն հասանիցեն՝ որ ի Քրիստոս Յիսուս երկնաւոր փառաւքն հանդերձ:
11. Հաւատարի՛մ է բանս. զի եթէ ընդ նմա մեռաք. ընդ նմին եւ կեցցո՛ւք.
12. եթէ համբերեմք, ընդ նմին եւ թագաւորեսցո՛ւք. եւ եթէ ուրանամք՝ եւ նա՛ ուրանայ զմեզ.
13 . եւ եթէ չհաւատամք, նա հաւատարի՛մ մնայ, ուրանալ զանձն իւր ո՛չ կարէ:
14. Զայս յո՛ւշ արասջիր՝ վկայութիւն եդեալ առաջի Աստուծոյ. մի՛ բանակռի՛ւ լինել յոչինչ պէտս ի կործանումն լսողաց:
15. Փութացի՛ր զանձն քո ընտիր կացուցանել առաջի Աստուծոյ, մշակ առանց ամաւթո՛յ. ուղի՛ղ համառաւտել զբանն ճշմարտութեան:
16. Այլ ի պղծոց եւ ի սնոտի խաւսից մերժեսջիր. զի առաւել յառաջ գայցեն յամպարշտութիւնս.
17. եւ բանք նոցա իբրեւ զքաղցկե՛ղ ճարակ գտանեն. որոց սակի՛ են Հիմենոս՝ եւ Փիլետոս.
18. որք վրիպեցան ի ճշմարտութենէն, եւ ասեն՝ եթէ յարութիւն մեռելոց արդէն իսկ եղեալ եւ կործանե՛ն զհաւատս ոմանց:
19. Այլ հաստատուն հիմն Աստուծոյ կայ եւ ունի՛ զկնիքս զայս, թէ ծանեաւ Տէր զայնոսիկ՝ որ ի՛ւրն են. եւ ի բա՛ց լիցի յանիրաւութենէ՝ ամենայն որ անուանէ զանուն Տեառն:
20. Այլ ի տա՛ն մեծի ո՛չ միայն են անաւթք ոսկեղէնք եւ արծաթեղէնք, այլ եւ փայտեղէնք եւ խեցեղէնք. են որ ի պատուի՛ են, եւ են որ յանարգութեան:
21. Եթէ ոք սրբեսցէ զանձն իւր յայնպիսեա՛ց անտի, եղիցի անաւթ պատուակա՛ն, սրբեա՛լ եւ պիտանի՛ Տեառն իւրում՝ յամենա՛յն գործս բարութեան պատրաստեալ:
22. Այլ յերիտասարդական ցանկութեանցն փախի՛ր. եւ երթ զհետ արդարութեան, զհաւատոց, զսիրո՛յ, զխաղաղութեա՛ն, զսրբութեա՛ն, ընդ այնոսիկ որ կարդան զանուն Տեառն սուրբ սրտիւք:
23. Այլ ի յիմա՛ր եւ յանխրատ խնդրոց հրաժարեա՛. գիտասջի՛ր՝ թէ անտի ծնանին կռիւք:
24. Բայց ծառայի Տեառն ո՛չ է պարտ կռուել, այլ հեզ լինել առ ամենեսեան, ուսուցի՛չ, անոխակա՛լ:
25. Հանդարտութեամբ խրատել զհակառակաւղսն. թերեւս տացէ նոցա Աստուած ապաշխարութիւն՝ ի գիտութիւն ճշմարտութեան.
26. եւ սթափեսցին յորոգայթից սատանայի, որսացեա՛լք ի նմանէ ի նորա կամսն:
Հաղորդում կայքում սխալի վերաբերյալ
Տվյալ հատվածում առկա է սխալ: