Գլուխ 5

   
1․ Եւ մարգարէանային Անգեաս եւ Զաքարիաս Ադդովայ, մարգարէանային ի վերայ Հրէաստանի եւ Երուսաղէմի յանուն տեառն Աստուծոյ Իսրայէլի:

2․ Յայնժամ յարեան Զորաբաբէլ Սաղաթիելեանց, եւ Յեսու Յովսեդեկեանց` եւ սկսան շինել զտուն տեառն Աստուծոյ Իսրայէլի, եւ միաբանեալ ընդ նոսա մարգարէքն Աստուծոյ աւգնէին նոցա:

3․ Յայնմ ժամանակի եկն առ նոսա Թաթանա իշխան կողմանց գետոյն Եփրատու, եւ Սաթրաբուզան, եւ ծառայակիցք նոցա, եւ ասեն ցնոսա. Ո՞ հրամայեաց ձեզ շինել զտունս զայս, եւ կամ ո՞յր բանիւ կանգնեցէք զաշտարակս դորա

4․ եւ կամ զի՞նչ անուանք են արանցն այնոցիկ որք են առաջնորդք շինելոյ զքաղաքս զայս:

5․ Եւ էին աչք տեառն Աստուծոյ ի վերայ հրէիցն դարձելոցն ի գերութենէն. եւ ոչ խափանեցին զնոսա մինչչեւ տացեն գիտել Դարեհի արքայի: եւ յայնժամ առաքեցին զհարկահանս վասն իրացս այսոցիկ` զի տեղեկասցին գրով:

6․ Եւ այս է գրեալն: Թաթանա իշխան կողմանց գետոյն, եւ Սաթրաբուզան` եւ ծառայակիցք նորա, Փարսաքեէ եւ Ռեսիմ.

7․ Դարեհի թագաւորի խաղաղութիւն բազում.

8․ գիտութիւն լիցի թագաւորիդ, զի երթեալ մեր յերկիրն Հրէաստանի ի քաղաքն Երուսաղէմ, տեսաք զտաճարն տեառն Աստուծոյ մեծի, զի շինէին ընտիր քարամբք, եւ փայտս պահանկս դնէին յորմսն. եւ գործն էր յաջողակ, եւ յառաջէր ի ձեռն նոցա:

9․ Յայնժամ հարցաք ցծերս նոցա եւ ասեմք. Ո՞ հրամայեաց ձեզ շինել զտունս զայս, եւ կամ ո՞յր բանիւ հաստատէք զդա:

10․ եւ խնդրեալ զանուանս առաջնորդացն, զի տացուք տեղեկութիւն ձեզ. եւ զի գրեսցուք զանուանս արանց իշխանաց նոցա:

11․ Եւ զայս պատասխանի արարեալ հրէիցն ասեն ցմեզ. Մեք եմք ծառայք տեառն Աստուծոյ երկնի եւ երկրի, եւ շինեմք զտունս զայս որպէս եւ էր շինեալ յառաջ քան զբազում ամս, զոր շինեաց թագաւորն Իսրայէլի մեծն Սողոմոն. ըստ այնմ աւրինակի եւ մեք հաստատեմք զսա:

12․ վասն զի հարքն մեր բարկացուցին զԱստուած երկնի եւ երկրի. եւ ետ զնոսա ի ձեռս Նաբուքոդոնոսորայ արքային բաբելացւոց եւ քաղդէացւոց. եւ զտունս զայս քակեաց, եւ զժողովուրդն պանդխտեցոյց ի Բաբելոն:

13․ Եւ յառաջնում ամի Կիւրոսի թագաւորի բաբելացւոց, Կիւրոս թագաւոր հրամայեաց շինել զտունս զայս տեառն Աստուծոյ:

14․ եւ զկահ տանս այսորիկ զարծաթեղէնս եւ զոսկեղէնս` զորս Նաբուքոդոնոսոր առ յԵրուսաղեմէ, եւ եկն եբեր ի տուն աստուածոց իւրոց. առեալ զայն Կիւրոսի թագաւորի ի տանէ թագաւորին, եւ ետ ցՍամանասար գանձաւոր.

15․ եւ ասէ ցնա. Զամենայն սպասդ եւ զկահ առ եւ երթ յԵրուսաղէմ ի տուն Տեառն որ է անդ: եւ տար դիր զկահդ ի տեղւոջ իւրում:

16․ յայնժամ Սամանասար եկն` եւ արկ զհիմն տաճարիս տեառն Աստուծոյ յԵրուսաղէմ. եւ յայնմ հետէ շինեմք, եւ ոչ եւս է կատարեալ:

17․ Արդ եթէ բարւոք թուի քեզ թագաւոր, այց արա եւ տես ի տունս պահպանութեան գրոց յիշատակարանաց թագաւորաց բաբելացւոց. զի գիտասցես թէ արդարեւ Կիւրոս թագաւորն հրամայեաց շինել զտունս Տեառն ի Հրէաստանի յԵրուսաղէմ. եւ տեղեկացեալ քո թագաւոր վասն իրացս այսոցիկ` առաքեսջիր առ մեզ: