1. Եւ եղեւ բան Տեառն առ Յովնան երկրորդ անգամ եւ ասէ.
2. Արի գնա ի Նինուէ քաղաք մեծ, եւ քարոզեսջիր ի նա ըստ առաջին քարոզութեանն՝ զոր խաւսեցայ առ քեզ։
3. Յարեաւ Յովնան եւ գնաց ի Նինուէ՝ որպէս խաւսեցաւ ընդ նմա Տէր. եւ Նինուէ էր քաղաք մեծ Աստուծոյ, իբրեւ գնաց երից աւուրց ճանապարհի։
4. Եւ սկսաւ Յովնան մտանել ի քաղաքն իբրեւ աւուր միոջ գնաց ճանապարհի. Քարոզեաց եւ ասէ. Այլ եւս երեք աւուրք, եւ Նինուէ կործանեսցի։
5. Եւ հաւատացին արք նինուէացիք յԱստուած, եւ քարոզեցին պահս՝ եւ քուրձ զգեցան ի մեծամեծաց մինչեւ ցփոքունս իւրեանց։
6. Էհաս բանն առ թագաւորն նինուէացւոց. յարեաւ յաթոռոյ իւրմէ, եւ մերկացաւ զպատմուճան իւր. զգեցաւ քուրձ եւ նստաւ ի վերայ մոխրոյ։
7. Եւ քարոզեցաւ եւ պատմեցաւ ի Նինուէ՝ ի թագաւորէն եւ ի մեծամեծաց իւրոց, թէ մարդ եւ անասուն՝ խաշն եւ արջառ մի ինչ ճաշակեսցեն եւ մի ճարակեսցին, եւ մի ջուր արբցեն։
8․ Եւ զգեցան քուրձ մարդ եւ անասուն, եւ աղաղակեցին առ Աստուած սրտի մտաւք. եւ դարձան յիւրաքանչիւր ճանապարհաց իւրեանց չարաց, եւ յանաւրէնութենէ որ ի ձեռս իւրեանց եւ ասեն.
9․ Ո՞ գիտէ՝ ապաշաւեսցէ Աստուած եւ դարձցի ի բարկութենէ սրտմտութեան իւրոյ, եւ մի կորիցուք։
10. Եւ ետես Աստուած զգործս նոցա՝ զի դարձան իւրաքանչիւր ի ճանապարհաց իւրեանց չարաց, եւ զղջացաւ Աստուած ի վերայ չարեացն՝ զոր խաւսեցաւ առնել նոցա, եւ ոչ արար։
Հաղորդում կայքում սխալի վերաբերյալ
Տվյալ հատվածում առկա է սխալ: