Գլուխ 1

   
1. Առած Նինուէի։ Գիրք տեսլեան Նաւումայ Եղկեսացւոյ։

2. Աստուած նախանձոտ եւ վրէժխնդիր Տէր, վրէժխնդիր է Տէր բարկութեամբ, եւ խնդրէ Տէր վրէժ ի հակառակորդաց իւրոց. եւ բառնայ ինքն զթշնամիս իւր։

3. Տէր երկայնամիտ՝ եւ մեծ է զաւրութիւն նորա. Եւ արդարացուցանելով ոչ արդարացուցանէ Տէր. վախճանաւ եւ շարժմամբ է ճանապարհ նորա հողմ երիվար նորա, եւ ամպք փոշի ոտից նորա։

4. Սաստէ ծովու՝ եւ ցամաքեցուցանէ զնա. եւ զամենայն գետս աւերէ։ Նուազեաց Բասանացին եւ Կարմելոս. եւ ամենայն ծաղիկք Լիբանանու պակասեցին։

5. Լերինք շարժեցան ի նմանէ, եւ բլուրք սասանեցան. խախտեցաւ երկիր յերեսաց նորա, եւ համաւրէն ամենայն բնակիչք նորա։

6. Առաջի բարկութեան նորա ո հանդարտեսցէ, եւ ո՞ կայցէ ընդդէմ բարկութեան սրտմտութեան նորա։ Սրտմտութիւն նորա հալէ զիշխանութիւնս. եւ վէմք խորտակեցան ի նմանէ։

7. Քաղցր է Տէր որոց սպասեն նմա յաւուր նեղութեան. եւ ճանաչէ զերկիւղածս իւր։

8. Եւ հեղեղաւ ճանապարհաց արասցէ վախճան յարուցելոց ի վերայ, եւ զթշնամիս նորա խաւար հալածեսցէ։

9. Զինչ խորհիք զՏեառնէ, կատարած ինքն արասցէ. եւ ոչ խնդրեսցէ կրկին զնոյն վրէժխնդրութիւն ի նեղութեան։

10. Զի մինչեւ ի հիմն իւրեանց խոպանասցին. իբրեւ զգեղձ պատեալ կերիցի. եւ իբրեւ զեղէգն լի երաշտութեամբ։

11. Ի քէն ելցէ խորհուրդ զՏեառնէ, չարիս խորհել հակառակութեամբ։

12. Այսպէս ասէ Տէր ի վերայ իշխանաց ջուրց բազմաց, այնպէս զատուսցին, եւ լուր քո ոչ եւս լուիցի։

13. Եւ արդ, խորտակեցից զգաւազան նորա ի քէն, եւ զկապանս քո խզեցից։

14. Եւ պատուիրեսցէ վասն քո Տէր. եւ ոչ եւս սերմանեսցի յանուանէ քումմէ։ Ի տանէ Աստուծոյ քումմէ ջնջեցից զդրաւշեալս, եւ զձուլածոյսն արարից ի գերեզման քեզ։

15. Զի ահա երագ են ի վերայ լերանց ոտք աւետարանչին, եւ որ պատմէ զխաղաղութիւն։ Տաւնեա զտաւնս քո Յուդա, հատո զուխտս քո, զի ոչ եւս յաւելցին անցանել ի հնանալ. վախճանեցաւ՝ մաշեցաւ եւ բարձաւ։