1. Ով երեւելիդ փրկեալ քաղաք, Յովնանու. ոչ լուաւ ձայնի, եւ ոչ ընկալաւ զխրատ,
2. ի Տէր ոչ յուսացաւ. եւ առ Աստուած ոչ մերձեցաւ։
3. Իշխանք նորա իբրեւ առիւծունք գոչեսցեն, եւ դատաւորք նորա իբրեւ զգայլս արաբացւոց, որ ոչ թողուն ինչ ի վաղիւ։
4. Մարգարէք նորա այսակիրք, արհամարհաւղք, քահանայք նորա պղծեն զսրբութիւնս, եւ ամպարշտեն յաւրէնս։
5. Այլ Տէր արդար է ի միջի նորա, եւ ոչ արասցէ անիրաւութիւն. ընդ առաւաւտս կանխաւ տացէ զիրաւունս իմ ի լոյս, եւ ոչ թաքիցէ.
6. եւ ոչ ծանիցէ զանիրաւութիւն ի պահանջել։ եւ ոչ ի սպառ զանաւրէնութիւնս, ապականութեամբ կործանեսցէ զամբարտաւանս։ Ապականեցան անկիւնք նոցա. աւերեցից զճանապարհս նորա, ամենեւին մի եւս գնալ ընդ նոսա. պակասեսցին քաղաքք նոցա առ ի չգոյէ բնակչաց։
7. Ասացի թէ երկերուք յինէն՝ եւ ընկալարուք զխրատ, եւ ոչ սատակեսջիք յերեսաց նորա ըստ ամենայնի որչափ ինչ առից վրէժ ի նմանէ։ Պատրաստեա կանխեաց ընդ առաւաւտս, պակասեցան ամենայն ճիռք նորա։
8. Վասն այդորիկ սպասեա ինձ, ասէ Տէր՝ յաւուր յարութեան իմոյ ի վկայութիւն։ Զի դատաստանք իմ ի վերայ ազգաց յըմբռնել զթագաւորս՝ ի հեղուլ ի վերայ նոցա զբարկութիւն իմ՝ զամենայն բարկութիւն սրտմտութեան իմոյ, զի հրով նախանձու իմոյ մաշեսցի ամենայն երկիր։
9. Զի յայնժամ դարձուցից ի վերայ ժողովրդոց լեզու յազգս նոցա՝ ի կարդալ ամենեցուն զանուն Տեառն, ի ծառայել նոցա նմա ընդ միով լծով։
10. Ի գետոյն եթւովպացւոց ընկալայց զնոսա ընդ ցրուեալսն, մատուցանիցեն ինձ պատարագ։
11. Յաւուր յայնմիկ ոչ ամաչեսցես յամենայն գործոց քոց, որովք ամպարշտեցեր առ իս, զի յայնժամ զերծից ի քէն զչարութիւն ամբարտաւանութեան քոյ, եւ ոչ եւս յաւելցես մեծաբանել ի վերայ լերին սրբութեան իմոյ։
12. Թողից քեզ ժողովուրդ հեզ եւ խոնարհ,
13. եւ երկիցեն յանուանէ Տեառն, մնացորդք Իսրայէլի, եւ ոչ արասցեն անիրաւութիւն, եւ ոչ խաւսիցին սնոտիս, եւ ոչ գտցի ի բերան նոցա լեզու նենգաւոր, զի նոքա արածեսցեն եւ մակաղեսցին. եւ ոչ ոք իցէ որ զարհուրեցուցանիցէ զնոսա։
14. Ուրախ լեր յոյժ, դուստր Սիովնի, եւ քարոզեա Երուսաղէմ. ուրախ լեր՝ եւ զուարճացիր յամենայն սրտէ քումմէ դուստր Երուսաղէմի,
15. զի եհան ի քէն Տէր շուրջ զանիրաւութիւնս. փրկեաց զքեզ Տէր ի ձեռաց թշնամեաց քոց, թագաւոր Իսրայէլի Տէր ի միջի քում, եւ ոչ եւս տեսցես զչարիս։
16. Ի ժամանակին յայնմիկ ասէ Տէր. ցԵրուսաղէմ, քաջալերեաց Սիոն, մի լքցին ձեռք քո։
17. Տէր Աստուած ի քեզ է հզաւրն, եւ փրկեսցէ զքեզ. ածցէ ի վերայ քո ուրախութիւն, եւ նորոգեսցէ զքեզ սիրով իւրով. եւ ուրախ լիցի ի քեզ զուարճութեամբ իբրեւ յաւուր տաւնի. եւ ժողովեցից զմանրեալսն քո։
18. Վայ որ նախատիցէ զնա։
19. Ահաւասիկ ես առնեմ վասն քո ի ժամանակին յայնմիկ. եւ փրկեցից զճնշեալն, եւ զմերժեալն ընկալայց. եւ արարից զնոսա ի պարծանս, եւ անուանիս ընդ ամենայն երկիր։
20. Եւ ամաչեսցեն ի ժամանակին յայնմիկ՝ յորժամ բարի արարից ձեզ, եւ ի ժամանակի յորժամ ընկալայց զձեզ։ Զի տաց զձեզ անուանիս եւ ի պարծանս ընդ ամենայն ազգս երկրի, ի դարձուցանել ինձ զգերութիւն ձեր առաջի ձեր՝ ասէ Տէր։
Հաղորդում կայքում սխալի վերաբերյալ
Տվյալ հատվածում առկա է սխալ: