1. Զայս ասեմ. ցորքան ժամանակս ժառանգն աղայ է, չէ՛ ինչ առաւել քան զծառայն. թէպէտ եւ տէ՛ր իցէ ամենեցուն.
2. այլ ընդ հազարապետա՛ւք է՝ եւ ընդ գաւառապետաւք՝ մինչեւ ի ժամանակակէ՛տ հաւրն:
3. Նոյնպէս եւ մե՛ք մինչ աղայքն էաք, ընդ տարե՛րբք աշխարհիս ի ծառայութեա՛ն կայաք:
4. Այլ իբրեւ եկն լրումն ժամանակին, առաքեաց Աստուած զորդին իւր՝ որ եղեւ ի կնոջէ, եւ եմուտ ընդ աւրինաւք.
5. զի զնոսա որ ընդ աւրինաւքն իցեն, գնեսցէ՛. զի մեք զորդէգրութի՛ւն ընկալցուք:
6. Եւ զի է՛ք դուք որդիք, առաքեաց Աստուած զհոգի որդւոյն իւրոյ ի սիրտս մեր, որ աղաղակէ՝ աբբա՛՝ հա՛յր:
7. Այսուհետեւ չե՛ս ծառայ, այլ որդի՛. եթէ որդի, եւ ժառա՛նգ Աստուծոյ:
8. Այլ յայնժամ մինչ ո՛չ գիտէիք զԱստուած, ծառայէի՛ք այնոցիկ՝ որ ո՛չն էին ի բնէ՛ աստուածք:
9. Այլ այժմիկ ծաներո՛ւք զԱստուած, մանաւանդ թէ ծանուցա՛յք իսկ յԱստուծոյ, զիա՞րդ դառնայք միւսանգամ ի տարե՛րս տկարս եւ յաղքատս, որոց միւսանգամ զանձինս ծառայեցուցանել կամիք:
10. Զաւո՛ւրս խտրէ՛ք, եւ զամի՛սս, եւ զժամանակս՝ եւ զտարիս:
11. Երկնչի՛մ ի ձէնջ, գուցէ՛ թէ ի զո՛ւր ինչ վաստակեցի ի ձեզ:
12. Եղերո՛ւք իբրեւ զիս, քանզի եւ ես իբրեւ զձե՛զդ էի: Ե՛ղբարք՝ աղաչեմ զձեզ, չի՛ք ինչ ձեր մեղուցեալ առ իս:
13. Գիտէ՛ք դուք՝ զի տկարութեամբ մարմնոյ աւետարանեցի ձեզ զառաջինն. եւ զփորձանսն որ ի մարմնի իմում էին,
14. ոչ անարգեցէք՝ եւ ո՛չ անգոսնեցէք. այլ իբրեւ զհրեշտա՛կ Աստուծոյ ընկալարուք զիս, իբրեւ զՔրիստոս Յիսուս:
15. Իսկ արդ՝ ո՞ւր է երանութիւնն ձեր: Վկա՛յ եմ ձեզ, եթէ հնա՛ր ինչ էր՝ զա՛չս ձեր հանէիք եւ տայիք ինձ:
16. Արդ՝ զի՞ թշնամի իմն եղէ ձեզ, զի զստո՛յգն խաւսեցայ:
17. Այլ նախանձեցուցանեն զձեզ ո՛չ ի բարի. եւ արգելուլ կամին զձեզ, զի նոցա նախանձաւո՛րք լինիցիք:
18. Բայց լա՛ւ է նախանձաւո՛ր լինել ի բարիս յամենայն ժամ, եւ ո՛չ միայն յորժամ ի ձերում միջի իցեմ:
19. Որդեա՛կք իմ, զորս դարձեալ վերստի՛ն երկնեմ, մինչեւ նկարեսցի՛ Քրիստոս ի ձեզ:
20. Կամէի այժմ գալ առ ձեզ, եւ փոխել զբարբա՛ռ իմ. զի տարակուսեա՛լ եմ ես վասն ձեր:
21. Ասէ՞ք ինչ ինձ՝ որ ընդ աւրինաւքն կամիք լինել, չիցէ՞ ընթերցեալ ձեր զաւրէնս:
22. Զի գրեալ է՝ թէ Աբրահամու երկո՛ւ որդիք էին, մի՝ յաղախնո՛յ անտի, եւ մի՝ յազատէն:
23. Այլ որ յաղախնոյն էր՝ ըստ մարմնո՛յ ծնեալ էր, եւ որ յազատէն՝ ըստ աւետեա՛ցն.
24. որ է առակ աւրինակի: Զի ա՛յս ինքն են՝ երկո՛ւ կտակարանք, մի՝ ի լեռնէ Սինեայ ի ծառայութի՛ւն ծնեալ, որ էր Հագա՛ր:
25. Քանզի Հագար՝ լեա՛ռն Սինայ է յԱրաբիա. հաւասա՛ր է այսմ Երուսաղէմի. զի ծառա՛յ է որդւովքն իւրովք հանդերձ:
26. Այլ վերինն Երուսաղէմ ազա՛տ է, որ է մայր մեր ամենեցուն:
27. Զի գրեա՛լ Ուրա՛խ լեր ամուլ որ ոչ ծնանէիր, գոչեա՛ եւ աղաղակեա՛ որ ոչդ երկնէիր. զի բազո՛ւմ են որդիք սկնդկի՛դ առաւել քան զարամբւոյն:
28. Այլ մեք ե՛ղբարք՝ ըստ Սահակա՛յ աւետեացն որդիք եմք:
29. Այլ որպէս յայնժամ որ ըստ մարմնոյն ծնեալ էր, հալածէր զայն որ ըստ հոգւոյն, նո՛յնպէս եւ այժմ:
30. Այլ զի՞նչ ասէ գիր. Ի բա՛ց հան զաղախինդ եւ զորդի նորա. զի մի՛ ժառանգեսցէ որդի աղախնոյն՝ ընդ որդւոյն ազատի:
31. Վասն որոյ ե՛ղբարք՝ չե՛մք որդիք աղախնոյն, այլ ազատին. ազատութեամբն որով Քրիստոս զմեզ ազատեցոյց:
Հաղորդում կայքում սխալի վերաբերյալ
Տվյալ հատվածում առկա է սխալ: