1. Պի՛նդ կացէք այսուհետեւ, եւ մի՛ միւսանգամ ընդ լծով ծառայութեան մտանէք:
2. Ահաւասիկ ես Պաւղոս ասե՛մ զի եթէ թլփատիք, Քրիստոս ինչ ձեզ ո՛չ աւգնէ:
3. Վկայե՛մ ամենայն մարդոյ՝ որ թլփատիցի, թէ պարտակա՛ն է զամենայն աւրէնսն կատարել:
4. Խափանեա՛լ էք ի Քրիստոսէ, որ աւրինաւքն արդարանայք. եւ անկեա՛լ էք ի շնորհա՛ց անտի:
5. Զի մեք հոգւոյն՝ ի հաւատոց՝ յուսո՛յն արդարութեան ակն ունիմք:
6. Զի ի Քրիստոս Յիսուս՝ ո՛չ թլփատութիւն ինչ կարաւղ է, եւ ո՛չ անթլփատութիւն. այլ հաւա՛տք սիրով աջողեալք:
7. Բարւո՛ք ընթանայիք, ո՞ կասեցոյց զձեզ ճշմարտութեանն չհաւանել:
8. Զի ա՛յն հրապոյրք՝ ո՛չ յայնմանէ են որ կոչեացն զձեզ:
9. Փոքր մի խմոր զամենա՛յն զանգուածն խմորէ:
10. Այլ ես յուսացեա՛լ եմ ի ձեզ Տէրամբ՝ թէ ո՛չ այլա՛զգ ինչ խորհիցիք: Եւ որ խռովեցուցանէ զձեզ, կրեսցէ դատաստան՝ ո՛ ոք եւ իցէ:
11. Այլ ես ե՛ղբարք՝ եթէ թլփատութիւն քարոզէի, ընդէ՞ր տակաւին հալածիմ: Ապա ուրեմն խափանեա՛լ իցէ գայթագղութիւն խաչին:
12. Երանի՛ թէ մաւտակտուր իսկ լինէին, որ զձեզն խռովեցուցանեն:
13. Զի դուք յազատութիւն կոչեցեալ էք: Ե՛ղբարք, միայն զի ազատութիւնն ձեր ո՛չ լինիցի ի պատճառս մարմնոյ. այլ սիրո՛վ ծառայեցէ՛ք միմեանց:
14. Զի ամենայն աւրէնք ի մի՛ բան կատարին. ի սիրեսցեսն զընկեր քո իբրեւ զանձն քո:
15. Ապա թէ զմիմեանս խածատիցէք՝ եւ ուտիցէք. զգո՛յշ լերուք՝ գուցէ ի միմեանց սատակիցիք:
16. Բայց զայս ասե՛մ. հոգւո՛վ գնացէք, եւ զցանկութիւն մարմնոյ մի՛ կատարէք:
17. Զի մարմին ցանկայ հակառա՛կ հոգւոյ, եւ հոգի հակառա՛կ մարմնոյ. եւ զի սոքա միմեանց հակառա՛կ են, մի՛ զոր կամիցիքն՝ զայն առնիցէք:
18. Իսկ եթէ հոգւո՛վ վարիք, ապա չէ՛ք ընդ աւրինաւք:
19. Զի յայտնի՛ են գործք մարմնոյ. ա՛յս ինքն են, շնութի՛ւն, պոռնկութի՛ւն, պղծութի՛ւն, գիջութի՛ւն,
20. կռապաշտութի՛ւն, կախարդութի՛ւն, թշնամութի՛ւն, հե՛ռ, նախա՛նձ, բարկութի՛ւն, հակառակութի՛ւնք, երկպառակութի՛ւնք, հերձուա՛ծք,
21. չարակնութի՛ւն, սպանութի՛ւնք, արբեցութի՛ւնք, անառակութի՛ւնք, եւ որ ինչ սոցի՛ն նման են: Զոր յառաջագո՛յն իսկ ասեմ ձեզ, որպէս եւ կանխաւն ասէի, թէ որ զայսպիսի ինչ գործեն, զարքայութիւն Աստուծոյ ո՛չ ժառանգեն:
22. Իսկ պտուղ հոգւոյն ա՛յս սէ՛ր, խնդութիւն, խաղաղութի՛ւն, երկայնմտութի՛ւն,
23. քաղցրութի՛ւն, բարութի՛ւն, հաւա՛տք, հեզութի՛ւն, ժուժկալութի՛ւն: Զայսպիսեաց աստի աւրէնքն չե՛ն հակառակ:
24. Իսկ որ քրիստոսեա՛նքն են, զմարմինս իւրեանց ի խա՛չ հանին կարեաւքն եւ ցանկութեամբք հանդերձ:
25. Եթէ կեամք հոգւով, ընդ հոգւոյն եւ միաբանեսցո՛ւք:
26. Եւ մի՛ լիցուք սնապարծք՝ միմեանց ձայն տալով, եւ ընդ միմեանս նախանձելով:
Հաղորդում կայքում սխալի վերաբերյալ
Տվյալ հատվածում առկա է սխալ: