1. Պաւղոս առաքեալ Յիսուսի Քրիստոսի կամա՛ւքն Աստուծոյ, սրբոց որ են յԵփեսոս, եւ հաւատացելոց ի Քրիստոս:
2. Շնո՛րհք ընդ ձեզ եւ խաղաղութի՛ւն յԱստուծոյ հաւրէ մերմէ եւ ի Տեառնէ Յիսուսէ Քրիստոսէ:
3. Աւրհնեա՛լ է Աստուած եւ հայր Տեառն մերոյ Յիսուսի Քրիստոսի. որ աւրհնեա՛ց զմեզ ամենայն հոգեւոր աւրհնութեամբ յերկնաւորս ի Քրիստոս:
4. Որպէս ընտրեա՛ց զմեզ նովաւ յառա՛ջ քան զլինելն աշխարհի, լինել մեզ սո՛ւրբս եւ անարա՛տս առաջի նորա՝ սիրո՛վ:
5. Յառաջագո՛յն սահմանաեաց զմեզ յորդեգրութիւն ի ձե՛ռն Յիսուսի Քրիստոսի, ի նո՛յն ըստ հաճութեա՛ն կամաց իւրոց,
6. ի գովե՛ստ փառաց շնորհաց իւրոց. որով զուարճացո՛յց զմեզ սիրելեաւն:
7. Որով ունիմք զփրկութի՛ւն ի ձեռն արեան նորա, զթողութիւն մեղաց ըստ մեծութեան շնորհաց իւրոց.
8. որ առաւելա՛ւ ի մեզ ամենայն իմաստութեամբ եւ գիտութեամբ:
9. Եցո՛յց մեզ զխորհուրդս կամաց իւրոց, ըստ հաճութեան իւրում. զոր յառաջագոյն եդ նովաւ,
10. ի տնտեսութիւն լրման ժամանակաց, բովանդակել զամենայն Քրիստոսի՛ւ որ ինչ յերկինս՝ եւ որ ինչ յերկրի, ի նո՛յն:
11. Որով եւ վիճակեցա՛ք յառաջագոյն հրաւիրեալք, ըստ յառաջադրութեանն Աստուծոյ. որ զամենայն յաջողէ ըստ խորհրդոց կամա՛ց իւրոց.
12. լինել մեզ ի գովեստ փառա՛ց նորա՝ յառաջագոյն յուսացելոցս ի Քրիստոս:
13. Որով եւ դուք իբրեւ լուարուք զբանն ճշմարտութեան, զաւետարանն փրկութեան ձերոյ, որով հաւատացեալ կնքեցա՛յք հոգւոյն սրբոյ աւետեաց.
14. որ է առհաւատչեա՛յ ժառանգութեան մերոյ ի փրկութի՛ւն նուաճութեան, ի գովեստս փառաց նորա:
15. Վասն այնորիկ եւ ես իբրեւ լուա՛յ զհաւատսն ձեր որ ի Տէր Յիսուս, եւ զսէրն որ ընդ ամենայն սուրբս,
16. ո՛չ դադարեմ ի գոհանալոյ վասն ձեր՝ յիշել զձեզ յաղաւթս.
17. զի Աստուած Տեառն մերոյ Յիսուսի Քրիստոսի, հայրն փառաց՝ տացէ՛ ձեզ զհոգին իմաստութեան եւ յայտնութեան՝ գիտութեամբն իւրով.
18. Լուսաւո՛ր առնել զաչս սրտից, առ ի գիտելոյ մեզ՝ զի՞նչ է յոյս կոչման նորա, եւ զի՞նչ է մեծութիւն փառաց ժառանգութեանն նորա ի սուրբս.
19. եւ զի՞նչ է առաւելութիւն մեծութեան զաւրութեան նորա ի մեզ հաւատացեալս: Ըստ յաջողութեան կարողութեան զաւրութեանն իւրոյ,
20. զոր յաջողեաց ի Քրիստոս: Զի յարոյց զնա ի մեռելոց. եւ նստո՛յց ընդ աջմէ իւրմէ յերկնաւորս,
21. ի վերայ ամենայն իշխանութեան, եւ պետութեան, եւ զաւրութեան, եւ տէրութեան, եւ ամենայն անուա՛ն անուանելոյ. ո՛չ միայն յաշխարհիս յայսմիկ, այլեւ ի հանդերձելո՛ւմն:
22. Եւ զամենայն ինչ հնազա՛նդ արար ի ներքոյ ոտից նորա: Եւ զնա՛ եդ գլո՛ւխ ի վերայ ամենայն իրիք եկեղեցւոյ,
23. որ է մարմին նորա, լրումն՝ որ զամենայն յամենայնի լնու:
Հաղորդում կայքում սխալի վերաբերյալ
Տվյալ հատվածում առկա է սխալ: