1. Պա՛ւղոս եւ Տիմոթէ՛ոս, ծառա՛յք Յիսուսի Քրիստոսի՝ ամենայն սրբոց ի Քրիստոս
Յիսուս, որ են ի կողմանս փիլիպեցւոց, եպիսկոպոսակցա՛ւք եւ սարկաւագաւք:
2. Շնորհք ընդ ձեզ եւ խաղաղութի՛ւն յԱստուծոյ հաւրէ մերմէ, եւ ի Տեառնէ Յիսուսէ Քրիստոսէ:
3. Գոհանամ զԱստուծոյ իմոյ ի վերայ ամենայն յիշատակաց ձերոց:
4. Յամենայն ժամ, յամենայն խնդրուածս իմ՝ վասն ձե՛ր ամենեցուն առնել աղա՛ւթս խնդութեամբ.
5. Վասն հաղորդութեան ձերոյ ընդ աւետարանին, յաւրէ՛ յառաջնմէ մինչեւ ցայժմ:
6. Վստա՛հ եմ յայդ, թէ որ սկսա՛ւն ի ձեզ զգործս բարեաց՝ կատարեսցէ՛ մինչեւ յաւրն Յիսուսի Քրիստոսի.
7. որպէս իրա՛ւ իսկ թուի ինձ խորհել զայս վասն ձե՛ր ամենեցուն. վասն ունելո՛յ ինձ զձեզ ի սրտի ի
կապանս իմում, եւ ի պատասխանատւութեան իմում, եւ ի հաստատութեան աւետարանին.
կցո՛րդս ինձ շնորհաց զձե՛զ ամենեսին լինել:
8. Վկա՛յ է ինձ Աստուած, ո՛րպէս անձկացեալ եմ
առ ձեզ ամենեսին գթո՛վքն Քրիստոսի Յիսուսի:
9. Եւ զայն աղաւթս առնեմ. զի սէրն ձեր ե՛ւս
քան զեւս առաւե՛լ լիցի ի գիտութեան եւ յամենայն իմաստութեան.
10. ընտրել ձեզ զլաւն, զի իցէք հաստատունք եւ առանց գայթագղութեան ի յաւուրն Քրիստոսի.
11. լցեա՛լ պտղո՛վք արդարութեան ի ձեռն Յիսուսի Քրիստոսի, ի փառս եւ ի գովեստ Աստուծոյ:
12. Կամիմ թէ գիտիցէ՛ք եղբարք. զի որ ինչ վասն իմ էր, ե՛ւս քան զե՛ւս ի յառաջադիմութիւն աւետարանին եկն.
13. մինչեւ կապանաց իմոց յայտնի լինել ի Քրիստոս,
յամենայն հրապարակիս, եւ առ ա՛յլս ամենեսեան.
14. եւ առ բազում եղբարս ի Տէր. որ վստա՛հ
են կապանաւքս իմովք, առաւե՛լ եւս համարձակել՝ առանց երկիւղի զբանն Աստուծոյ խաւսել:
15. Ոմանք առ նախանձո՛ւ եւ հակառակութեան, եւ ոմանք մտադիւրութեամբ իսկ զՔրիստոս
քարոզեն.
16. եւ ոմանք ի սիրո՛յ, քանզի գիտեն եթէ ի պատասխանատութիւն աւետարանին
կամ.
17. եւ ոմանք առ հեստութեան զՔրիստոս պատմեն, այլ ո՛չ սրբութեամբ. քանզի համարին նեղութիւնս յարուցանել ի վերայ կապանաց իմոց:
18. Բայց այս զի՞նչ որով աւրինակաւ եւ իցէ՛, եթէ պատճառանաւք՝ եւ եթէ ճշմարտութեամբ, Քրիստոս պատմի՛. եւ ընդ այս խնդա՛մ՝ այլ եւ ուրախ եւս եղէց:
19. Զի գիտեմ եթէ այս պահի՛ ինձ փրկութիւն ի ձերոց
խնդրուածոց, եւ ի պարգեւաց հոգւոյն Յիսուսի Քրիստոսի,
20. ըստ ակնկալութեան եւ յուսոյն
իմոյ. զի մի՛ իւիք յամաւթ եղէց. այլ ամենայն համարձակութեամբ՝ որպէս յամենայն ժամ. եւ
այժմ մեծասցի՛ Քրիստոս ի մարմնի իմում, եթէ կենաւք՝ եւ եթէ մահու:
21. Զի ինձ կեա՛նք Քրիստոս է, եւ մեռանել շա՛հ:
22. Ապա եթէ կեանքս մարմնոյ՝ այս ինձ պտուղ գործոյ եւ զի՛նչ ընտրեցից, զայն ո՛չ գիտեմ:
23. Նեղեա՛լ եմ յերկոցունց՝ զցանկա՛լն, ելանել եւ ընդ Քրիստոսի լինել, առաւե՛լ լաւ համարիմ.
24. եւ կալ մնալ աստէն ի մարմնի, կարեւո՛ր եւս վասն ձեր:
25. Եւ զայս յուսացեալ գիտեմ, եթէ կացից՝ եւ մնացի՛ց ամենեցուն ձեզ, ի ձեր զարգանա՛լ եւ խրա՛խ լինել ի հաւատս:
26. Զի պարծանք ձեր առաւե՛լ լինիցին ի Քրիստոս Յիսուս ինեւ ի միւսանգամ գալստեա՛ն իմում առ ձեզ:
27. Միայն թէ արժանի՛ աւետարանին գնայցէք: Զի եթէ գայցեմ, եւ տեսանիցեմ զձեզ. եւ եթէ հեռի՛ իցեմ, եւ լսիցե՛մ զձէնջ. զի հաստատո՛ւն կայցէք ի մի հոգի, եւ միո՛վ շնչով նահատակիցիք ի հաւա՛տս աւետարանին.
28. եւ մի՛ զանգիտիցէք: Եւ մի՛ իւիք ի հակառակորդաց անտի. որ է նոցա հանդէ՛ս կորստեան, եւ ձերոյ՝ փրկութեան:
29. Եւ այդ՝ յԱստուծոյ է, որ ձեզ շնորհեցաւ վասն Քրիստոսի, ո՛չ միայն ի նա հաւատալ՝ այլ եւ վասն
նորա չարչարե՛լ.
30. զնո՛յն պատերազմ ունել՝ զոր յի՛սն տեսէք, եւ այժմ լսէ՛ք յինէն:
Հաղորդում կայքում սխալի վերաբերյալ
Տվյալ հատվածում առկա է սխալ: