Ա․ Լոպուխին
4-5. Տիրոջը գինի չեն լցնի,և նրանց զոհերը Նրա համար ընդունելի չեն լինի, դրանք նրանց համար կլինեն ինչպես հուղարկավորության հացը․ բոլորը, ովքեր կուտեն այդ, կպղծվեն, քանզի նրանց հացը նրանց հոգու համար է, իսկ Տիրոջ տուն նա չի մտնի։[4] Ի՞նչ պետք է անեք տոնի օրը, և Տիրոջ տոնակատարության օրը։ (Սինոդական թարգ․)
Մարգարեն խոսում է օրինական զոհաբերությունների դադարելու ժամանակ լինելիք գերության դժվարությունների մասին։
«Դրանք նրանց համար կլինեն ինչպես հուղարկավորության հացը»․եբրայերենից՝ «կէլէհեմ օնիմ լահեմ»։ «Հուղարկավորության հացը» (սլավոներեն՝ «սգո հաց») անմաքուր հաց էր, որը պղծվում էր մահացածի տանը գտնվելու պատճառով (Ղևտ․ 21։1, 22։4, Թվեր․ 19։14, Բ Օր․ 27։14)։ Ռուսերենի թարգմանիչները այդ համեմատությունը զոհերի վերաբերյալ են հասկացել և այդ պատճառով էլ ավելացրել են «նրանք կլինեն» (այսինքն՝ զոհերը) արտահայտությունը։ Սակայն համարի հաջորդ բառերից պետք է եզրակացնել, որ մարգարեն խոսում է սովորական հացի, այլ ոչ թե զոհերի մասին, և այդ պատճառով էլ, շատ մեկնաբանների հետ միասին, այս արտահատությանը հետևյալ ձևը պետք է տալ․ «նրանց համար իրենց հացը հուղարկավորության հացի պես կլինի»։ Մարգարեն այն միտքն է ցանկանում արտահայտել, որ գերության մեջ Իսրայելը պղծվելու է անգամ հացից, որովհետև բոլոր զոհաբերությունների դադարելուց հետո Տիրոջը մատուցվելու միջոցով այդ հացը չի սրբանա․ «այդ հացը նրանց հոգու համար է» (այլ ոչ թե «նրանց համար»), «իսկ Տիրոջ տուն նա չի մտնի»։
--------------------------------
[4](Էջմիածին թարգ․) Տիրոջը գինի չնուիրեցին եւ նրա սիրտը չքաղցրացրին իրենց վրայ, նրանց զոհերը սգոյ հոգեճաշ կը դառնան նրանց, բոլոր նրանք, ովքեր կ՚ուտեն նրանից, կը պղծուեն, քանի որ իրենց հացը միայն իրենց կը մնայ եւ չի մտնի Տիրոջ Տան մէջ:
(Արարատ թարգ․) Նրանք Տիրոջը գինու նվեր չեն մատուցելու, և նրան հաճելի չեն լինելու նրանց զոհերը. սգավորների հացի պես պիտի լինի նրանց հացը. բոլոր ուտողները պիտի պղծվեն, որովհետև նրանց հացը նրանց անձերի համար է և չի մտնելու Տիրոջ տունը։
(Գրաբար) Ո՛չ նուիրեցին Տեառն գինի, և ո՛չ քաղցրացուցին նմա. զոհք նոցա իբրև զհա՛ց սգոյ եղիցի նոցա. ամենեքեան որ ուտիցեն ի նմանէ պղծեսցին. զի հա՛ցն իւրեանց անձանց իւրեանց լիցի, և մի՛ մտցէ ի տուն Տեառն։
Հաղորդում կայքում սխալի վերաբերյալ
Տվյալ հատվածում առկա է սխալ: