Երեմիայի Մարգարեության մեկնություն 34:1

Ա. Լոպուխին

1-17. «Այն խոսքը, որը հասավ Երեմիային Տիրոջ կողմից, երբ Նաբուգոդոնոսորը՝ Բաբելոնի թագավորը, և նրա բոլոր զորքերն ու երկրի բոլոր թագավորությունները, որոնք գտնվում էին նրա իշխանության տակ, և բոլոր ժողովուրդները պատերազմում էին Երուսաղեմի դեմ և նրա բոլոր քաղաքների դեմ»: [1] «Այսպես է ասում Տերը՝ Իսրայելի Աստվածը. «Գնա՛ և խոսի՛ր Սեդեկիայի՝ Հուդայի թագավորի հետ և ասա՛ նրան. «Այսպես է ասում Տերը. «Ահա, Ես այս քաղաքը տալիս եմ Բաբելոնի թագավորի ձեռքը, և նա պիտի այրի այն կրակով»»։ «Եվ դու չես փախչի նրա ձեռքից, այլ անպայման պիտի բռնվես ու նրա ձեռքը մատնվես, և քո աչքերը պիտի տեսնեն Բաբելոնի թագավորի աչքերը, և նրա բերանը պիտի խոսի քո բերանի հետ, և պիտի գնաս Բաբելոն»։ «Այնուհանդերձ լսի՛ր Տիրոջ խոսքը, Սեդե՛կիա, Հուդայի՛ թագավոր. այսպես է ասում Տերը քո մասին. «Դու չես մեռնելու սրով»»։ ««Դու մեռնելու ես խաղաղությամբ, և ինչպես քո հայրերի՝ քեզ նախորդող թագավորների համար թաղման ժամանակ խունկ ծխեցին, նույնպես և քեզ համար են ծխելու և սուգ են անելու քեզ վրա՝ «վա՜յ, տիրակա՛լ», որովհետև Ես ասացի այս խոսքը, - ասում է Տերը»։ «Երեմիա մարգարեն այս բոլոր խոսքերն ասաց Սեդեկիային՝ Հուդայի թագավորին, Երուսաղեմում»: «Մինչ այդ Բաբելոնի թագավորի զորքը պատերազմում էր Երուսաղեմի դեմ և Հուդայի մնացած բոլոր քաղաքների դեմ, Լաքիսի և Ազեկայի դեմ. որովհետև Հուդայի քաղաքներից միայն սրանք էին մնացել որպես ամրացված քաղաքներ»։ «Այն խոսքը, որը հասավ Երեմիային Տիրոջ կողմից այն բանից հետո, երբ Սեդեկիա թագավորն ուխտ կապեց ամբողջ ժողովրդի հետ, որը գտնվում էր Երուսաղեմում, որպեսզի ազատություն հռչակեր»: «Որպեսզի յուրաքանչյուրն ազատ արձակի իր աղախնուն և իր ծառային՝ եբրայեցուն և եբրայեցուհուն, որպեսզի նրանցից ոչ մեկը ստրկության մեջ չպահի հրեային՝ իր եղբորը»։ «Եվ բոլոր իշխանավորները և ամբողջ ժողովուրդը, որոնք ուխտի մեջ էին մտել, հնազանդվեցին, որ յուրաքանչյուրն ազատ արձակի իր աղախնուն, և յուրաքանչյուրը՝ իր ծառային, որպեսզի նրանց այլևս չստրկացնեն, և հնազանդվեցին ու արձակեցին»։ «Բայց դրանից հետո, մտափոխվելով, սկսեցին հետ վերցնել ծառաներին և աղախիններին, որոնց ազատ էին արձակել, և նրանց ստիպեցին լինել ծառաներ ու աղախիններ»։ «Եվ Տիրոջ խոսքը Տիրոջից հասավ Երեմիային»: «Այսպես է ասում Տերը՝ Իսրայելի Աստվածը. «Ես ուխտ կնքեցի ձեր հայրերի հետ, երբ նրանց դուրս բերեցի Եգիպտոսի երկրից՝ ստրկության տնից, և ասացի»»: ««Յոթերորդ տարվա վերջում յուրաքանչյուրը թող ազատ արձակի իր եղբորը՝ հրեային, որն իրեն վաճառել է ձեզ. թող նա վեց տարի աշխատի քեզ համար, իսկ հետո քեզնից ազա՛տ արձակիր նրան». բայց ձեր հայրերը չհնազանդվեցին Ինձ և ականջ չդրեցին»։ «Դուք այժմ դարձի եկաք և արդար վարվեցիք Իմ աչքի առաջ՝ յուրաքանչյուրդ ազատություն հռչակելով իր մերձավորի համար, և Իմ առաջ ուխտ կապեցիք այն տանը, որը կոչվում է Իմ անունով»։ «Բայց հետո նորից մտափոխվեցիք ու անարգեցիք Իմ անունը, և յուրաքանչյուրդ ձեզ մոտ վերադարձրիք ձեր ծառային և յուրաքանչյուրդ՝ ձեր աղախնուն, որոնց ազատ էիք արձակել՝ շարժվելու իրենց հոգու կամեցածով, և նրանց ստիպում եք լինել ձեզ համար ծառաներ և աղախիններ»։ «Ուստի այսպես է ասում Տերը. «Դուք չհնազանդվեցիք Ինձ այն հարցում, որ յուրաքանչյուրդ ազատություն հռչակեիք ձեր եղբորը և ձեր մերձավորին. դրա համար, ահա, Ես, - ասում է Տերը, - ձեզ «ազատություն» եմ տալիս (թույլ եմ տալիս), որ ենթարկվեք սրի, ժանտախտի և սովի, և ձեզ մատնելու եմ երկրի բոլոր թագավորությունների չարությանը»»։  (Սինոդական թարգմ.)
    
    Թե ո՞ր ժամանակաշրջանում է այս մարգարեությունն արվել, դժվար է որոշել: Համենայն դեպս, այդ ժամանակ Երեմիան ազատության մեջ էր  (համար 2): Սա կարող է եղած լինել Նաբուգոդոնոսորի կողմից Երուսաղեմի առաջին պաշարման ժամանակ:
    Սեդեկիայի ճակատագիրը
Մարգարեն հայտնում է, որ Սեդեկիան Բաբելոնի թագավորի կողմից գերեվարվելու է, սակայն մահանալու է իր բնական մահով և պատվավոր հուղարկավորության է արժանանալու:

-------------------------

[1](Էջմիածին թարգմ.) Երբ բաբելացիների Նաբուքոդոնոսոր արքան իր բոլոր զօրքերով, իր իշխանութեանը ենթակայ բոլոր թագաւորութիւններով ու բոլոր ժողովուրդներով պատերազմի ելաւ Երուսաղէմի եւ Յուդայի երկրի բոլոր քաղաքների դէմ, Տէրը խօսքն ուղղեց Երեմիային՝ ասելով.
(Արարատ թարգմ.) Խոսքը, որ Տիրոջից հասավ Երեմիային, երբ Բաբելոնի Նաբուգոդոնոսոր թագավորը և նրա բոլոր զորքերը, իր իշխանության տակ գտնվող երկրի բոլոր թագավորությունները և բոլոր ժողովուրդները պատերազմում էին Երուսաղեմի դեմ և նրա բոլոր քաղաքների դեմ.
(Գրաբար) Բանն որ եղեւ առ Երեմիա ի Տեառնէ։ ել Նաբուքոդոնոսոր արքայ բաբելացւոց. եւ ամենայն զաւրականն, եւ ամենայն երկիր որ ընդ իշխանութեամբ ձեռին նորա, եւ ամենայն ազգք, մարտնչէին ընդ Երուսաղէմի, եւ ընդ ամենայն քաղաքսն Յուդայ։ Եւ ասէ.