1. Եւ եղեւ յետ վախճանելոյն Մովսիսի ծառայի Տեառն, խաւսեցաւ Տէր ընդ Յեսուայ որդւոյ Նաւեայ պաշտաւնէի Մովսիսի, եւ ասէ:
2. Մովսէս ծառայ իմ վախճանեցաւ. արդ յարուցեալ անցցես ընդ այդ Յորդանան` դու եւ ամենայն ժողովուրդ քո յերկրին զոր ես տաց որդւոցն Իսրայիլի:
3. Յամենայն տեղիս յոր հասանիցեն գնացք ոտից ձերոց ձեզ տաց զնա, որպէս եւ խաւսեցայ ընդ Մովսիսի.
4. զանապատն, եւ զլիբանաներն, մինչչեւ ցգետն մեծ ցգետն Եփրատ. զամենայն երկիրն Քետացւոց, մինչչեւ ցծովն վերջին, ի մտիցն արեւու` ձեզ լիցին սահմանքն:
5. եւ ոչ ոք կացցէ ընդդէմ ձեր զամենայն աւուրս կենաց քոց: Եւ որպէս էի ընդ Մովսիսի, նոյնպէս եղէց եւ ընդ քեզ. եւ ոչ թողից զքեզ` եւ ոչ անտես արարից զքեզ.
6. զաւրացիր եւ քաջ լեր: զի դու բաժանեսցես ժողովրդեանդ այդմիկ զերկիրն զոր երդուայ հարցն քոց տալ դոցա:
7. Արդ զաւրացիր եւ քաջ լեր յոյժ, պահել եւ առնել ըստ ամենայն պատուիրանացն որպէս պատուիրեաց քեզ Մովսէս ծառայ իմ. եւ մի խոտորիցիս ի նոցանէ յաջ կամ յահեակ, զի խելամուտ լիցիս ամենայնի զինչ եւ գործեսցես:
8. Եւ մի մերժիցես ըզգիր աւրինացս այսոցիկ ի բերանոյ քումմէ, եւ խոկասցես ի դոսա ի տուէ եւ ի գիշերի. զի իմասցիս առնել զամենայն գրեալսդ ի դմա. Եւ ապա աջողեսցիս եւ ուղղեսցես զճանապարհս քո, եւ ապա խելամուտ լինիցիս:
9. Ահա պատուիրեմ քեզ. զաւրացիր եւ քաջ լեր. մի զանգիտիցես. եւ մի երկնչիցիս. զի ընդ քեզ է Տէր Աստուած քո յամենայն տեղիս ուր եւ երթայցես:
10. Եւ պատուիրեաց Յեսու դպրաց ժողովրդեանն` եւ ասէ. մտէք ի մէջ բանակի ժողովրդեանդ, եւ հրաման տուեալ ժողովրդեանդ ասացէք:
11. Պատրաստեցէք ձեզ պաշար. զի այլ եւս երեք աւուրք, եւ անցանէք դուք ընդ այն Յորդանան, մտանել ունել զերկիրն զոր Տէր Աստուած հարցն ձերոց տացէ ձեզ ի ժառանգութիւն:
12. Եւ ընդ Ռուբինի եւ ընդ Գադայ եւ ընդ կիսոյ ցեղին Մանասէի խաւսեցաւ Յեսու եւ ասէ:
13. Յիշեցէք զբանն Տեառն զոր պատուիրեաց ձեզ Մովսէս ծառայ նորա եւ ասէ. Տէր Աստուած ձեր զետեղեցոյց զձեզ, եւ ետ ձեզ զերկիրս զայս.
14. կանայք ձեր եւ մանկունք ձեր եւ անասունք ձեր` բնակեսցեն յերկրիս զոր ետ ձեզ Մովսէս յայսկոյս Յորդանանու: Բայց դուք զինեալք անցանիցէք յառաջագոյն քան զեղբարս ձեր, եւ ամենայն զաւրաւոր զաւրութեամբ, եւ լինիցիք նոցա մարտակիցք.
15. մինչչեւ զետեղեցուսցէ Տէր Աստուած ձեր զեղբարս ձեր որպէս եւ զձեզդ. եւ ժառանգեսցեն եւ նոքա զերկիրն` զոր Տէր Աստուած մեր տացէ նոցա. եւ դառնայցէք յիւրաքանչիւր ժառանգութիւն. եւ ժառանգեցէք զնա` զոր ետ ձեզ Մովսէս ծառայ Տեառն յայսկոյս Յորդանանու յարեւելից:
16. Եւ պատասխանի տուեալ ասեն ցՅեսու. զամենայն զոր միանգամ պատուիրես մեզ արասցուք.
17. եւ յամենայն տեղիս ուր առաքիցես զմեզ` երթիցուք. եւ ըստ ամենայնի որպէս լսէաք Մովսիսի` նոյնպէս լուիցուք եւ քեզ: Բայց միայն Տէր Աստուած մեր եղիցի ընդ քեզ` որպէս էր ընդ Մովսիսի:
18. եւ այր որ անհնազանդ իցէ քեզ` եւ ոչ լսիցէ բանից քոց, որպէս ինչ եւ հրաման տացես նմա` մեռցի. բայց միայն զաւրացիր եւ քաջ լեր:
Հաղորդում կայքում սխալի վերաբերյալ
Տվյալ հատվածում առկա է սխալ: