1․ Եւ ժողովեաց Յեսու զամենայն ցեղսն Իսրայէղի ի սելով. եւ կոչեաց զամենայն ծերակոյտսն Իսրայէղի, եւ զիշխանս նոցա, եւ զդպիրս նոցա, եւ զդատաւորս նոցա, եւ կացին առաջի Տեառն:
2․ Եւ խաւսեցաւ Յեսու ընդ ամենայն ժողովուրդն` եւ ասէ: Այսպէս ասէ Տէր Աստուած Իսրայէղի. Յայնկոյս գետոյն պանդխտեցան հարք ձեր յառաջագոյն. Թարա` հայր Աբրահամու եւ հայր Նաքովրայ, եւ պաշտեցին զաստուածս աւտարս:
3․ Եւ առի ես զհայր ձեր զԱբրահամ յայնմ կողմանէ գետոյն, եւ առաջնորդեցի նմա յամենայն երկիրդ Քանանացւոց, եւ բազմացուցի զաւակ նորա.
4․ եւ ետու նմա զԻսահակ. եւ ետու Սահակայ զՅակովբ, եւ զԵսաւ: եւ ետու Եսաւայ զլեառնն Սէիր ի ժառանգութիւն: Եւ Յակովբ եւ որդիք նորա իջին յԵգիպտոս. եւ եղեն անդ յազգ մեծ ի բազում եւ ի հզաւր, եւ չարչարեցին զնա Եգիպտացիք:
5․ եւ էհար Տէր զԵգիպտոս նշանաւքն` զոր արար ի նոսա.
6․ եւ ապա էհան զձեզ յԵգիպտոսէ: եւ մտէք ի ծովն, եւ պնդեցան Եգիպտացիքն զհետ հարցն ձերոց կառաւք եւ երիւարաւք ի ծովն Կարմիր:
7․ Եւ աղաղակեցաք առ Տէր. եւ ետ զամբն եւ զմէգ ի մէջ ձեր եւ ի մէջ Եգիպտացւոց. եւ ած ի վերայ նոցա զծովն` եւ ծածկեաց զնոսա: եւ տեսին աչք մեր զոր արար Տէր ընդ երկիրն Եգիպտացւոց: եւ էիք յանապատի անդ աւուրս բազումս:
8․ Եւ ած զձեզ յերկիրն Ամուրհացւոց բնակելոյ յայնկոյս Յորդանանու, եւ ետուն ընդ ձեզ պատերազմ. եւ մատնեաց զնոսա Տէր ի ձեռս ձեր, եւ ժառանգեցէք զերկիր նոցա: եւ սատակեցէք զնոսա յերեսաց ձերոց:
9․ Եւ յարեաւ Բաղակ Սեպփովրայ արքայ Մովաբու եւ ետ պատերազմ ընդ Իսրայէղի: եւ առաքեաց զԲաղաամ որդի Բեորայ նզովել զձեզ:
10․ եւ ոչ կամեցաւ Տէր Աստուած քո կորուսանել, եւ աւրհնելով աւրհնեաց զձեզ, եւ ապրեցոյց զձեզ ի ձեռաց նոցա. եւ մատնեաց զնոսա:
11․ Եւ անցէք ընդ Յորդանան, եւ եկիք յԵրիքով. եւ պատերազմեցան ընդ ձեզ բնակիչք երէքովի. Ամուրհացի եւ Քանանացի, եւ Փերեզացի, եւ Խեւացի, եւ Քետացի, եւ Յեբուսացի, եւ Գերգեսացի: եւ մատնեաց զնոսա ի ձեռս մեր:
12․ Եւ առաքեաց յառաջագոյն քան զմեզ զձիաստանցն, եւ մերժեաց զնոսա յերեսաց ձերոց. զերկոտասան թագաւորսն Ամուրհացւոց, ոչ սրով քով եւ ոչ աղեղամբ քով:
13․ եւ ետ ձեզ Տէր զերկիրս` յորում ոչ վաստակիցէք: եւ քաղաքս զոր ոչ շինեցէք եւ բնակէք ի նոսա, եւ յայգիս ձիթենիս` զոր ոչ տնկեցէք դուք` եւ ուտէք:
14․ Եւ արդ` երկերուք ի Տեառնէ: եւ պաշտեցէք զնա ուղղութեամբ եւ արդարութեամբ. եւ ի բաց արարէք զաստուածս աւտարոտիս` զոր պաշտեցին հարք ձեր յայնկոյս գետոյն, եւ յԵգիպտոս. եւ պաշտեցէք զՏէր:
15․ Ապա էթէ ոչ է հաճոյ ձեզ պաշտել զՏէր, ընդրեցէք ձեզ այսաւր թէ զո՞ պաշտիցէք. զաստուածս հարցն ձերոց որ յայնկոյս գետւոյն էին, էթէ՞ զաստուածս Ամուրհացւոցն, յորոց բնակեալ էք յերկրի նոցա: Այլես` եւ տուն իմ պաշտեմք զՏէր` զի սուրբ է:
16․ Պատասխանի ետ ժողովուրդն` եւ ասէ. քաւ լիցի մեզ թողուլ զՏէր Աստուած մեր` եւ պաշտել զաստուածս աւտարս.
17․ զի Տէր Աստուած մեր, նա էհան զմեզ եւ զհարս մեր յերկրէն Եգիպտացւոց ի տանէ ծառայութեան, եւ արար մեզ զնշանսն մեծամեծս զայնոսիկ: եւ պահեաց զմեզ յամենայն ճանապարհին յորում գնացաք, եւ յամենայն ազգս` ընդ որ անցաք:
18․ եւ մերժեաց Տէր զԱմուրհացին եւ զամենայն ազգս բնակեալս յերկրին` յերեսաց մերոց: Այլ եւ մեք պաշտեսցուք զՏէր. զի նա է Տէր Աստուած մեր:
19․ Եւ ասէ Յեսու ցժողովուրդն. Ոչ կարէք պաշտել զՏէր` զի Աստուած սուրբ է. եւ նախանձեալ ոչ ներիցէ մեղաց եւ անաւրէնութեանց ձերոց.
20․ յորժամ թողուցուք զՏէր, եւ պաշտիցէք զաստուածս աւտարս. եւ հասեալ ի վերայ չարչարիցէ զձեզ, եւ ծախիցէ զձեզ փոխանակ բարեացն` զոր արար քեզ:
21․ Եւ ասէ ժողովուրդն ցՅեսու. Ոչ այդպէս. այլ զՏէր պաշտեսցուք:
22․ Եւ ասէ Յեսու ցժողովուրդն. Ահա դուք ձեզէն իսկ եղերուք վկայք անձանց ձերոց, զի դուք ընդրեցէք զՏէր պաշտել զնա: եւ ասեն` վկայ եմք:
23․ Եւ արդ` ի բաց արարէք ի ձէնջ զաստուածսն աւտարոտիս, եւ ուղղեցէք զսիրտս ձեր առ Տէր Աստուած Իսրայէղի:
24․ Եւ ասէ ժողովուրդն ցՅեսու. զՏէր Աստուած մեր պաշտեսցուք, եւ ձայնի նորա լուիցուք:
25․ Եւ ուխտեաց Յեսու ուխտ ընդ ժողովուրդն յաւուր յայնմիկ. եւ ետ նմա աւրէնս եւ դատաստանս ի սելով առաջի խորանին Աստուծոյ Իսրայէղի:
26․ Եւ գրեաց Յեսու զբանս զայսոսիկ ի գիրս աւրինաց Աստուծոյ. եւ առ վէմ մեծ, եւ կանկնեաց զնա ի ներքոյ բեւեկնոյն առաջի Տեառն:
27․ եւ խաւսեցաւ Յես ցամենայն ժողովուրդն. Ահա վէմս այս եղիցի ձեզ ի վկայութիւն. զի սա լուաւ զամենայն խաւսեցեալսն ի Տեառնէ զոր խաւսեցաւ ընդ ձեզ այսաւր: եւ եղիցի սա ձեզ ի վկայութիւն աւուրց յետնոց` յորժամ ստիցէք Տեառն Աստուծոյ ձերում:
28․ Եւ արձակեաց Յեսու զժողովուրդն, եւ գնացին իւրաքանչիւր ոք ի տեղի իւր:
29․ Եւ պաշտեցին զՏէր զամենայն աւուրս Յեսուայ, եւ զամենայն աւուրս ծերոցն որք ձգեցին զժամանակս ընդ Յեսուայ. եւ որք տեսին զամենայն գործս Տեառն` զոր արար յԻսրայէլ:
30․ Եւ եղեւ յետ այսորիկ եղեւ մեռանել Յեսուայ որդւոյ Նաւեայ ծառայի Տեառն, հարիւր տասն ամաց:
31․ եւ թաղեցին զնա առ սահմանաւք ժառանգութեան իւրոյ ի Թամնասաքար ի լերինն Եփրեմայ ի հիւսւսոյ ի լերինն Գայասու: Եւ անդ եդին ընդ նմա ուր թաղեցին զնա առ ի յիշատակէ զսուրսն քարեղէնս, որով թլփատեաց զորդիսն Իսրայէղի ի Գաղգաղա, յորժամ էհան զնոսա յԵգիպտոսէ` որպէս հրամայեաց Տէր. եւ են անդ մինչչեւ ցայսաւր ժամանակի:
32․ Եւ զոսկերսն Յովսեփայ հանին որդիքն Իսրայէղի յԵգիպտոսէ. եւ թաղեցին զնա ի Սիկիմ, ի բաժնի ագարակին զոր ստացաւ Յակովբ յԱմուրհացւոցն բնակելոց ի Սիկիմ, աւրոջաց հարիւրոց: եւ ետ զայն Յովսեփու ի բաժին:
33․ Եւ եղեւ յետ այնորիկ վախճանել Եղիազարու քահանայի որդւոյ Ահարովնի. եւ թաղեցաւ ի Գաբաադ Փենէէսի որդւոյ իւրոյ, զոր ետ նմա ի լերինն Եփրեմայ: Յաւուր յայնմիկ առեալ որդւոցն Իսրայէղի զտապանակ ուխտին Աստուծոյ շրջեցուցանէին ընդ իւրեանս: Եւ քահանայացաւ Փենէէս փոխանակ Եղիազարու հաւր իւրոյ, մինչչեւ մեռաւ` եւ թաղեցաւ յիւրումն Գաբաաթ: Լ Եւ որդիքն Իսրայէղի գնացին յիւրաքանչիւր տեղիս իւրեանց, եւ յիւրաքանչիւր քաղաքս իւրեանց. եւ պաշտեցին որդիքն Իսրայէղի զԱստարատն եւ զԱստարովթ, եւ զաստուածս ազգացն որ շուրջ զնոքաւք: Եւ մատնեաց զնոսա Տէր ի ձեռս Եգղոմայ արքայի Մովաբու. եւ տիրեաց նոցա ամս ութ եւ տասն:
Հաղորդում կայքում սխալի վերաբերյալ
Տվյալ հատվածում առկա է սխալ: