1. Եւ իբրեւ լուաւ Ադովնիբեզեկ թագաւոր Երուսաղէմի, եթէ առ Յեսու զգայ, եւ սատակեաց զնա. Զոր աւրինակ արար ընդ Երեքով եւ ընդ թագաւորն նորա, նոյնպէս արար ընդ գայի եւ ընդ թագաւոր նորա. եւ զի անձնատուր եղեն բնակիչքն Գաբաւովնի առ Յեսու եւ առ Իսրայէլ` եւ եղեն ի միջի նոցա.
2. եւ զարհուրեցան յանձինս իւրեանց յոյժ. քանզի գիտէին թէ քաղաք մեծ է Գաբաւովն որպէս զմի ի մայր քաղաքաց թագաւորացն. քանզի նա մեծ էր քան զգայի, եւ ամենայն արք նորա զաւրաւորք:
3. Եւ առաքեաց Ադովնիբեզեկ արքայ Երուսաղէմի առ Եղամ արքայ Քեբրովնի, եւ առ Փերաամ արքայ Երիմութայ, եւ առ Յափիէ արքայ Լաքիսայ, եւ առ Դաբիր արքայ Ոդողոմայ, եւ ասէ:
4. Եկայք ելէք առ իս եւ աւգնեցէք ինձ. եւ տացուք պատերազմ Գաբաւովնի. զի անձնատուրք եղեն առ Յեսու եւ առ որդիսն Իսրայէղի:
5. Եւ գումարեցան եւ ելին հինգ թագաւորքն յԵբուսացւոց. թագաւորն Երուսաղէմի, եւ թագաւորն Քեբրովնի, եւ թագաւորն Յերիմութայ, եւ թագաւորն Լաքիսայ, եւ թագաւորն Ոդողիմայ ինքեանք եւ ամենայն ժողովուրդ նոցա, եւ նստան զԳաբաւովնիւ եւ պաշարեցին զնա:
6. Եւ առաքեցին բնակիչք Գաբաւովնի առ Յեսու ի բանակն Իսրայէլի ի Գաղգաղա` եւ ասեն. Մի թողացուսցես զձեռն քո ի ծառայից քոց, ել վաղվաղակի առ մեզ եւ ապրեցո զմեզ, եւ աւգնեա մեզ. զի ժողովեալ են ի վերայ մեր ամենայն թագաւորք ամուրհացւոց որ բնակեալ են ի լեռնակողմ:
7. Եւ ել Յեսու ի Գաղգաղայ, ինքն եւ ամենայն զաւր պատերազմող էր ընդ նմա. եւ ամենայն որ կարող էր զաւրութեամբ:
8. Եւ ասէ Տէր ցՅեսու. Մի երկնչիցիս ի նոցանէ, զի ի ձեռս քո մատնեցից զնոսա. եւ ոչ ժուժկալեսցէ ի նոցանէ եւ ոչ մի ոք առաջի ձեր:
9. Եւ էհաս Յեսու ի վերայ նոցա յանկարծակի զցայգն ամենայն` եկեալ ի Գաղգաղայ:
10. Եւ զարհուրեցոյց զնոսա Տէր յերեսաց Իսրայէղի. եւ եբեկ զնոսա Տէր բեկումն մեծ ի Գաբաւովն. եւ հալածէին զնոսա ընդ ճանապարհ զառիլերին Բեթորովայ, եւ կոտորեցին զնոսա մինչչեւ յԱզեկայ եւ ցՄակետայ:
11. Եւ փախչել նոցա յերեսաց որդւոցն Իսրայէղի ընդ զառիվայրն Բեթորովնայ, Եւ Տէր արկ ի վերայ նոցա քարինս կարկտի յերկնից մինչ ցՅազեկայ. եւ եղեն բազումք այնոքիկ որ մեռան ի քարանց կարկտի, քան զայնոսիկ որ կոտորեցին որդիքն Իսրայէղի սրով ի պատերազմի:
12. Յայնժամ խաւսեցաւ Յեսու ընդ Տեառն` յաւուր յորում մատնեաց Տէր Աստուած զԱմուրհացին ընդ ձեռամբ որդւոցն Իսրայէղի. ի ժամանակի յորում խորտակեաց զնոսա ի Գաբաւովն, եւ խորտակեցան յերեսաց Իսրայէղի: Եւ ասէ Յեսու. Կացցէ արեգակն ընդդէմ գաբաւովնի եւ լուսին հանդէպ ձորոյն աղովնայ:
13. եւ կացին արեգակն եւ լուսին ի կայի իւրեանց. մինչչեւ առ Աստուած վրէժ ի թշնամեաց նոցա: Ո՞չ ապաքէն այս գրեալ է ի գիրս ուղղութեան. եւ եկաց արեգակն ի մէջ ուղղութեան երկնից, եւ ոչ խաղաց ընդ արեւմուտս, մինչչեւ ցկատարումն աւուր միոյ:
14. Եւ ոչ եղեւ այնպիսի աւր, ոչ յառաջ եւ ոչ յետոյ լսել Աստուծոյ ձայնի մարդոյ. զի Տէր պատերազմեցաւ խառն Իսրայէղի:
15. Եւ դարձաւ Յեսու եւ ամենայն Իսրայէղ ընդ նմա ի բանակն ի Գաղգաղա: Ի
16. Եւ փախեան հնգեքին թագաւորքն այնոքիկ` եւ թագեան յայրին ի Մակեղայ:
17. Եւ ազդ եղեւ Յեսուայ` եւ ասեն. Գտան հինգ թագաւորքն թագուցեալք յայր անդ ի Մակեղայ:
18. եւ ասէ Յեսու. Թաւալեցուցէք վէմս մեծամեծս ի բերան այրին, եւ կացուցէք ի վերայ նորա արս պահել զնոսա.
19. բայց դուք մի դադարէք ի պնդելոյ զհետ թշնամեացն ձերոց. եւ հասէք ի վերջ նոցա, եւ մի տայք նոցա թոյլ մտանել ի քաղաքս իւրեանց. Քանզի մատնեաց զնոսա Տէր Աստուած մեր ի ձեռս մեր:
20. Եւ եղեւ իբրեւ դադարեաց Յեսու եւ որդիքն Իսրայէղի կոտորելոյ զնոսա ի կոտորումն մեծ յոյժ մինչչեւ ի սպառ. եւ ապրեալքն որ ապրեցան ի նոցանէ` մտին ի քաղաքս ամուրս:
21. Եւ դարձաւ ամենայն ժողովուրդն ի բանակն առ Յեսու ի Մակեդայ ողջանդամք, եւ ոչ ոք կռնչեաց յորդւոցն Իսրայէղի լեզուաւ իւրով:
22. Եւ ասէ Յեսու. բացէք ինձ զայրն եւ հանէք առ իս զհնգեսին թագաւորսն յայրէ անդի:
23. եւ արարին այնպէս. եւ հանին առ նա զհնգեսին թագաւորսն յայրէ անտի, զթագաւորն Երուսաղէմի, եւ զթագաւորն Փեբրովնի, եւ զթագաւորն Յերիմութայ, եւ զթագաւորն Լաքիսայ, եւ զթագաւորն Ոդողոմայ:
24. Եւ հանին զնոսա առ Յեսու. եւ կոչեաց Յեսու զամենայն Իսրայէլ եւ զառաջամարտիկսն երթալս ընդ նմա: եւ ասէ ցնոսա. Մատիք յառաջ` եւ դիք զոտս ձեր ի վերայ պարանոցաց նոցա. եւ մատուցեալ եդին զոտս իւրեանց ի վերայ պարանոցաց նոցա:
25. Եւ ասէ Յեսու ցնոսա. Մի երկնչիք ի նոցանէ` եւ մի զանգիտիցէք, քաջալերեցարուք եւ զաւրացարուք, զի այդպէս արասցէ Տէր ընդ ամենայն թշնամիս ձեր` ընդ որս դուք մարտնչիջիք:
26. Եւ կոտորեաց զնոսա Յեսու, եւ կախեաց զնոսա զհնգեսին զփայտից. եւ կա կախեալ զփայտիցն մինչչեւ ցերեկոյ:
27. Եւ եղեւ ընդ արեւմուտսն, եւ իջուցին զնոսա ի փայտիցն. եւ ընկեցին յայրն յոր փախուցեալ անկեալ էին. եւ թաւալեցին քարինս մեծամեծս ի վերայ նորա մինչչեւ ցյայսաւր ժամանակի:
28. Եւ զՄակեդա առին յաւուր յայնմիկ, եւ կոտորեցին զնոցա սրով սուսերի. եւ զթագաւոր նորա, եւ սատակեցին զնոսա` եւ զամենայն որ էր ի նմա շնչաւոր. եւ ոչ ոք մնաց ի նոցանէ ապրել եւ փախուցեալ: եւ արարին ընդ թագաւորն Մակեդայ, զորաւրինակ արարին ընդ թագաւորն երէքովի:
29. Եւ գնաց Յեսու եւ ամենայն Իսրայէլ ընդ նմա ի Մակեդայէ ի Ղեբնա: եւ պաշարեաց զՂեբնա,
30. եւ մատնեաց զնա Տէր ի ձեռս Իսրայէլի. եւ առ զնա, եւ զթագաւոր նորա, եւ կոտորեաց զնա սրով սուսերի, եւ զամենայն շնչաւոր ի նմա. եւ ոչ մնաց ի նմա եւ ոչ մի ապրեալ եւ փախստական. եւ արար ընդ թագաւորն նորա զոր արար ընդ թագաւորն երէքովի:
31. Եւ գնաց Յեսու եւ ամենայն Իսրայէլ ընդ նմա ի Ղեբնա ի Լաքիս, եւ նստաւ ընդ նովաւ եւ պաշարեաց զնա.
32. եւ մատնեաց Տէր զՂաքիս ի ձեռս Իսրայէղի, եւ առ զնա յաւուրն երորդի, եւ կոտորեաց զնա բերանով սրով, եւ սատակեաց զնա զորաւրինակ արար ընդ Ղեբնա:
33. Յայնժամ ել Եղամ արքայ Գազերայ աւգնել Ղաքիսայ. եւ էհար զնա Յեսու սրով սուսերի եւ զաւար նորա մինչչեւ չմնալոյ ի նոցանէ ապրեալ եւ փախստական:
34. Եւ չուեաց Յեսու եւ ամենայն Իսրայէլ ընդ նմա ի Ղաքիսայ յոդողամ, եւ նստաւ զնովաւ եւ պաշարեաց զնա. եւ մատնեաց զնա Տէր ի ձեռս Իսրայէղի,
35. եւ առ զնա յաւուր յայնմիկ, եւ կոտորեաց զնա սրով սուսերի, եւ զամենայն շնչաւոր ի նմա յաւուր յայնմիկ կոտորեցին, զորաւրինակ արարին ընդ Ղաքիսա:
36. Եւ չուեաց Յեսու եւ ամենայն Իսրայէլ ընդ նմա Եդդովնա ի Քեբրովն, եւ նստան զնովաւ,
37. եւ առին զնա, եւ հարին զնա բերանով սուսերի. եւ զթագաւոր նորա, եւ զամենայն շնչաւոր որ ի նմա, եւ ոչ ոք էր ապրեալ. Եւ արարին ընդ նա որպէս արարին ընդ Ոդողաամ. եւ սատակեցին զնա եւ զամենայն շնչաւոր, եւ զամենայն ինչ որ ի նմա:
38. Եւ դարձաւ Յեսու եւ ամենայն Իսրայէլ ի Գաբիր, եւ նստան զնովաւ,
39. եւ առին զնա եւ զթագաւոր նորա, եւ զամենայն աւարս նորա. եւ հարին զնա բերանով սրոյ, եւ սատակեցին զնա եւ զամենայն շնչաւոր ի նմա. եւ ոչ թողին ի նմա եւ ոչ մի ապրեալ. զոր աւրինակ արարին ընդ Քեբրովն նոյնպէս արարին ընդ Գաբիր եւ ընդ թագաւոր նորա. եւ որպէս արարին ընդ Ղեբնա եւ ընդ թագաւորն նորա:
40. Եւ էհար Յեսու զամենայն երկիրն լեռնական եւ զՆադեբ, եւ զդաշտականսն, եւ զԱսեդովթ եւ զամենայն թագաւորս նորա. եւ ոչ եթող ի նմանէ ապրեալ, եւ զամենայն շնչաւոր սատակեցին ի նմանէ. զոր աւրինակ պատուիրեաց Տէր Աստուած Իսրայէղի:
41. Եւ կոտորեաց զնոսա Յեսու, ի Կադէսբառնեայ մինչչեւ ցԳազա. զամենայն երկիրն Գոսոմայ մինչչեւ ցԳաբաւովն.
42. եւ զամենայն թագաւորս նոցա. եւ զերկիրս նոցա առ Յեսու միանգամայն. զի Տէր Աստուած Իսրայէղի համագունդ կռուէր ընդ Իսրայէղի:
43. Դարձաւ Յեսու եւ ամենայն Իսրայէլ ընդ նմա ի բանակն ի Գաղգաղայ:
Հաղորդում կայքում սխալի վերաբերյալ
Տվյալ հատվածում առկա է սխալ: