Գլուխ 14

   
1. Եւ նոքա են որ ժառանգեցուցին նոցա յերկրին Քանանացւոց, որոց ժառանգեցուցին: Եղիազար քահանայ, եւ Յեսու Նաւեան, եւ իշխանք նահապետութեանց ցեղից որդւոցն Իսրայէղի:

2. վիճակաւք ժառանգեցուցին. զոր աւրինակ պատուիրեաց Տէր ի ձեռն Յեսուայ, իննեցունց ցեղիցն, եւ կիսոյ ցեղին:

3. Քանզի ետ Մովսէս ժառանգութիւն երկուց ցեղիցն եւ կիսոյ ցեղին յայնկոյս Յորդանանու: Եւ Ղեւտացւոցն ոչ ետ ժառանգութիւն ի մէջ նոցա:

4. Զի էին որդիք Յովսեփու երկու ցեղք, Մանասէ եւ Եփրեմ. եւ ոչ տուաւ բաժին յերկրին Ղեւտացւոցն, այլ քաղաքք բնակելոյ, եւ զատուցեալ ըստ նոցին, խաշանց նոցա.

5. զոր աւրինակ պատուիրեաց Տէր Մովսէսի, նոյնպէս արարին որդիքն Իսրայէղի` եւ բաժանեցին զերկիրն:

6. Եւ մատեան որդիքն Յուդայ առ Յեսու ի Գաղգաղա. եւ ասեն ցնա Քաղէբ Յեփոնեայ Կենեզեան. դու ինքնին գիտես զբանն` զոր խաւսեցաւ Տէր ընդ Մովսէսի առն Աստուծոյ` վասն իմ եւ վասն քո Կադէսբառնեա:

7. զի քառասնամեայ էի ես, յորժամ առաքեաց զիս Մովսէս ծառայ Տեառն ի Կադէսբառնեայ լրտեսել զերկիրն. Եւ բերաք նմա զրոյց ըստ մտաց նորա:

8. Բայց եղբարք իմ որ ելին ընդիս` թիւրեցին զմիտս ժողովրդեանն. բայց ես յաւելայ երթալ զհետ Տեառն Աստուծոյ իմոյ:

9. եւ երդուաւ Մովսէս յաւուր յայնմիկ եւ ասէ. երկիրն յոր հասեր` քեզ լիցի ի ժառանգութիւն եւ որդւոց քոց յաւիտեան. զի յաւելայ երթալ զհետ Տեառն Աստուծոյ իմոյ:

10. Եւ արդ կերակրեաց զիս Տէր որպէս ասաց` այս ամ քառասներրորդ է` յորմէ հետէ խաւսեցաւ Տէր զբանս զայս ընդ Մովսէսի. եւ շրջեցաւ Իսրայէլ յանապատին: Եւ արդ` ահաւասիկ եմ ես այսաւր ամաց ութսուն եւ հնգից.

11. եւ կարող եմ այսաւր` որպէս յորժամ առաքեաց զիս Մովսէս, նոյնպէս արդ կարող եմ մտանել եւ ելանել ի պատերազմ:

12. Եւ այժմ խնդրեմ ի քէն զլեառնն զայն` որպէս եւ ասաց Տէր յաւուր յայնմիկ. զի դու ինքնին լուար զբանս զայս յաւուր յայնմիկ: եւ արդ աւասիկ Ենակիմք են անդ, եւ քաղաքք ամուրք եւ մեծամեծք. արդ եթէ Տէր ընդ իս է` սատակիցէ զնոսա որպէս ասաց ինձ Տէր:

13. Եւ աւրհնեաց զնա Յեսու. եւ ետ զՔեբրովն Քաղեբայ որդւոյ Յեփոնեայ Կենեզացւոյ ի ժառանգութիւն:

14. Վասն այնորիկ եղեւ Քեբրովն Քաղեբայ որդւոյ Յեփոնեայ Կենեզացոյ ի ժառանգութիւն մինչչեւ ցայսաւր. վասն երթալոյ նորա զհետ հրամանի Տեառն Աստուծոյ Իսրայէղի:

15. եւ անուն Քեբրովնի յառաջ էր քաղաք` Արբոկ: նա էր մայր քաղաքացն Ենակիմացն: եւ երկիրն դադարեաց ի պատերազմէ: