Գլուխ 2

1. Եւ եղեւ ի վերացուցանել Տեառն զԵղիայ շարժմամբն յերկինս. եւ գնացին Եղիա եւ Եղիսեէ ի Գաղգաղա:

2. եւ ասէ Եղիա ցԵղիսեէ. Նիստ դու աստ` զի Տէր առաքեաց զիս ի Բեթէլ: Եւ ասէ Եղիսեէ. Կենդանի է Տէր, եւ կենդանի է անձն քո` թէ թողից զքեզ: եւ եկին ի Բեթէլ:

3. Եւ ելին որդիք մարգարէիցն որ ի Բեթէլ` առ Եղիսեէ, եւ ասեն ցնա. թէ Գիտիցե՞ս զի այսաւր առնու Տէր զտէրդ ի գլխոյ քումմէ: եւ ասէ. Գիտեմ եւ ես, լուռ լերուք:

4. Եւ ասէ Եղիա ցԵղիսեէ. Նիստ դու աստ` զի Տէր առաքեաց զիս յԵրեքով: եւ ասէ. Կենդանի է Տէր, եւ կենդանի է անձն քո` թէ թողից զքեզ: եւ եկին յԵրեքով:

5. Եւ մատեան որդիք մարգարէիցն որ յԵրեքով` առ Եղիսեէ, եւ ասեն ցնա. Եթէ գիտիցե՞ս զի այսաւր առնու Տէր զտէրդ ի գլխոյ քումմէ: եւ ասէ. Գիտեմ եւ ես` լուռ լերուք:

6. Եւ ասէ  ցնա Եղիա. Նիստ դու աստ, զի Տէր առաքեաց զիս ի Յորդանան: եւ ասէ Եղիսեէ. Կենդանի է Տէր, եւ կենդանի է անձն քո` թէ թողից զքեզ: եւ գնացին երկոքեան.

7. եւ յիսուն այր յորդւոց մարգարէիցն, եւ կացին ի հանդիպոջ ի բացեայ. եւ երկոքեան կացին յեզերն Յորդանանու:

8. Եւ առ Եղիա զմաշկեակն իւր, ծալեաց եւ եհար զջուրն. եւ բաժանեցաւ ջուրն յայսկոյս եւ յայնկոյս, եւ անցին երկոքեան ընդ ցամաք:

9. Եւ եղեւ ընդ անցանելն նոցա, ասէ Եղիա ցԵղիսեէ. Խնդրեա զինչ արարից քեզ, մինչչեւ վերացեալ իցեմ ի քէն: եւ ասէ Եղիսեէ. Եղիցի կրկին ոգիդ քո ի վերայ իմ:

10. Եւ ասէ Եղիա. Դժուարինս խնդրեցեր, բայց եթէ տեսանիցես զիս յամբառնալն իմում ի քէն` եղիցի այնպէս, ապա թէ ոչ` մի եղիցի:

11. Եւ եղեւ մինչդեռ գնային նոքա, եւ խաւսէին երթային: Եւ ահա կառք հրեղէնք եւ երիվարք հրեղէնք, եւ անջրպետեցին ի մէջ երկոցունց. եւ վերացաւ Եղիա շարժմամբ յերկինս:

12. Եւ Եղիսեէ հայէր եւ աղաղակէր. Հայր, հայր, կառքդ Իսրայէլի եւ հեծեալքդ նորա. եւ այլ ոչ եւս ետես զնա: եւ բուռն եհար զհանդերձից իւրոց, եւ պատառեաց յերկուս ծուէնս:

13. եւ առ Եղիսեէ զմաշկեակն Եղիայի զոր ընկէց ի վերայ նորա: Եւ դարձաւ Եղիսեէ, եւ եկաց առ եզերն Յորդանանու.

14. եւ առ զմաշկեակն Եղիայի զոր ընկէց ի վերայ նորա, եւ եհար զջուրսն` եւ ասէ. Ո՞ւր ես տէր Աստուած Եղիայի ափփով. եւ եհար զջուրսն, եւ բաժանեցան յայսկոյս եւ յայնկոյս, եւ անց Եղիսեէ:

15. Իբրեւ տեսին որդիք մարգարէիցն որ յԵրեքով ի հանդիպոյն, եւ ասեն. Հանգեաւ ոգին Եղիայի ի վերայ Եղիսէի. եւ եկին ընդ առաջ նորա, եւ երկիր պագին նմա ի վերայ երկրի:

16. Եւ ասեն. Ահաւասիկ են ընդ ծառայս քո որդիք զաւրութեան արք յիսուն. երթիցեն եւ խնդրեսցեն զտէրն քո, գուցէ առ զնա հոգի Տեառն, եւ ընկէց զնա առ Յորդանանու, կամ ի վերայ միոյ ուրուք ի լերանց, կամ ի վերայ միոյ ուրուք ի բլրոց: Եւ ասէ Եղիսեէ. Մի առաքէք:

17. եւ բռնադատեցին զնա մինչչեւ ամաչէր: եւ ասէ. Առաքեցէք: եւ առաքեցին յիսուն այր. եւ խնդրեցին զերիս աւուրս` եւ ոչ գտին զնա.

18. եւ դարձան առ նա, եւ նա նստէր յԵրեքով: եւ ասէ ցնոսա Եղիսեէ. Ո՞չ ասացի ձեզ թէ մի երթայք:

19. Եւ ասեն արք քաղաքին ցԵղիսեէ. Ահաւասիկ բնակութիւն քաղաքիս բարի է, որպէս եւ տէրդ իսկ տեսանէ. եւ ջուրքս չար, եւ երկիրս անզաւակ:

20. Եւ ասէ Եղիսեէ. Առէք առ իս կուժ մի նոր, եւ դիք այդր: եւ բերին առ նա:

21. եւ ել Եղիսեէ յականս ջուրցն, եւ արկ անդր աղ եւ ասէ. Այսպէս ասէ Տէր. բժշկեմ զջուրսդ զայդոսիկ, եւ մի եւս լիցի այտի մահ եւ յանզաւակութիւն:

22. եւ բժշկեցան ջուրքն մինչչեւ ցայսաւր ըստ բանին Եղիսէի զոր խաւսեցաւ:

23. Եւ ել անտի ի Բեթէլ. եւ մինչդեռ ելանէր ընդ ճանապարհն, մանկտի մանրիկ ելին ի քաղաքէն, աղաղակէին ի նա եւ ասէին. Ել կնդակ, ել կնդակ:

24. Դարձաւ ի թիկունս իւր եւ ետես զնոսա. եւ անէծ զնոսա յանուն Տեառն` եւ ասէ. Որդիք յանցանաց եւ դատարկութեան: եւ ելին երկու արջք յանտառէն եւ պատառեցին ի նոցանէ քառասուն եւ երկուս մանկունս:

25. Եւ գնաց անտի ի լեառն ի Կարմեղոս, եւ անտի դարձաւ ի Սամարիա: