Գլուխ 20

   
1․ Եւ խաւսեցաւ Տէր ընդ Յեսուայ` եւ ասէ. Խաւսեաց ընդ որդիսդ Իսրայէղի, եւ ասասցես:

2․ Տուք զքաղաքսն ապաստանաց զորոց խաւսեցայ ընդ ձեզ ի ձեռն Մովսէսի:

3․ ապաստան սպանողի` որ սպանանիցէ զանձն ակամայ յանգէտս, եւ եղիցին ձեզ քաղաքք ապաստանի. եւ մի մեռցի սպանող ի մերձաւորէ արեանն, մինչ չեւ կացցէ առաջի ժողովրդեանն յատենի:

4․ եւ փախիցէ ի մի քաղաքացն այնոցիկ. եւ կացցէ ի մուտս դրան քաղաքին, եւ խաւսեսցի յականջս ծերոց քաղաքին այնորիկ զբանս իւր: Եւ ժողովեսցեն զնա ժողովուրդն առ ինքեանս, եւ տացեն նմա տեղի, եւ բնակեսցէ ընդ նոսա:

5․ եւ եթէ երթիցէ մերձաւոր արեանն զկնի նորա, մի մատնեսցեն զսպաննողն ի ձեռս նորա. քանզի յանգէտս էհար զընկեր իւր, եւ ոչ ատեայր զնա յերէկն եւ յեռանդն:

6․ Եւ բնակեսցէ ի քաղաքին յայնմիկ մինչչեւ կացցէ առաջի ժողովրդեանն յատենի, մինչչեւ մեռանիցի քահանայն մեծ` որ իցէ յաւուրսն յայնոսիկ. եւ ապա դարձցի սպանողն ի տեղի իւր եւ եկեսցէ ի տուն իւր, եւ ի քաղաքն ուստի փախեաւ:

7․ Եւ զատուցին զԿադէս ի Գալիլիեա` ի լերինն Նեփթաղիմայ: եւ զՍիւքեմ ի լերինն Եփրեմայ: Եւ քաղաքն Արբոկ` այն է Քեբրովն ի լերանց Յուդայ:

8․ Եւ յայնկոյս Յորդանանու յարեւելից երէքովի. Ետուն զԲոսոր յանապատին ի դաշտին, ցեղէն Ռովբէնի: եւ Զռամովբ ի Գաղաադ, ի ցեղէն Գադայ: եւ զԳովղան ի Բասանաստանի ի ցեղէն Մանասէի:

9․ Այն են քաղաքք հոյակապք ամենայն որդւոցն Իսրայէղի, եւ եկին` յեցելոյ ի նոսա. փախչել անդր ամենայնի որ հարկանիցէ զանձն ակամայ, զի մի մեռանիցի ի ձեռաց մերձաւորի արեանն, մինչչեւ կացցէ առաջի ժողրովրդեանն յատենի: