Գլուխ 22

   
1․ Յայնժամ կոչեաց Յեսու զորդիսն Ռովբենի, եւ զորդիսն Գադայ, եւ զկէս ցեղին Մանասէին,

2․ եւ ասէ ցնոսա. Դուք ձեզէն լուայք զամենայն զոր պատուիրեաց ձեզ Մովսէս ծառայ Տեառն. եւ ունկնդիր լերուք բարբառոյ իմոյ ըստ ամենայնի զոր պատուիրեցի ձեզ,

3․ եւ ոչ թողէք զեղբարս ձեր զայնչափ աւուրս. եւ եւս աւելի մինչչեւ ցայսաւր ժամանակի, պահեցէք զպատուիրանս Աստուծոյ ձերոյ:

4․ Եւ արդ` հանգոյց Տէր Աստուած ձեր զեղբարս ձեր` որպէս եւ ասաց նոցա. բայց արդ` դարձեալ երթայք ի տունս ձեր` եւ յերկիրն կալուածոց ձերոց, զոր ետ ձեզ Մովսէս ծառայ Տեառն յայնկոյս Յորդանանու:

5․ Այլ զգոյշ լինիջիք յոյժ, առնելոյ զպատուիրանս եւ զաւրէնս զոր պատուիրեաց մեզ Մովսէս ծառայ Տեառն. սիրել զՏէր Աստուած ձեր` եւ գնալ յամենայն ճանապարհս նորա, պահել զպատուիրանս նորա, եւ յարել ի նա, եւ պաշտել զնա յամենայն սրտէ ձերմէ` եւ յամենայն անձնէ ձերմէ:

6․ Եւ աւրհնեաց զնոսա Յեսու եւ արձակեաց զնոսա` եւ գնացին ի տունս իւրեանց:

7․ Եւ կիսոյ ցեղին Մանասէի ետ Մովսէս ի Բասանաստանի, եւ կիսոյն ետ Յեսու ընդ եղբարս նոցա առ ծովեզերբն: Եւ յորժամ արձակեաց զնոսա Յեսու ի տունս իւրեանց, եւ աւրհնեաց զնոսա,

8․ խաւսեցաւ ընդ նոսա` եւ ասէ. Ընչիւք բազմաւք երթիցեն ի տունս իւրեանց: եւ անասուն բազում յոյժ, եւ արծաթ եւ ոսկի, եւ պղինձ եւ երկաթ, բազում յոյժ եւ հանդերձ. բաժանեցան աւար ի թշնամեաց ընդ եղբարս իւրեանց:

9․ Եւ դարձան, եւ գնացին որդիքն Ռովբենի, եւ որդիքն Գադայ, եւ կէս ցեղին Մանասէի յորդւոցն Իսրայէլի, ի սելովայ յերկրէն Քանանացւոց, երթան յերկիրն Գաղաադու. յերկիրն կալուածոց իւրեանց զոր ժառանգեցին հրամանաւ Տեառն ի ձեռն Մովսէսի:

10․ Եւ եկին ի Գալիլովթ Յորդանանու, որ է յերկիրն Քանանու, եւ շինեցին որդիքն Ռովբենի, եւ որդիքն Գադայ, եւ կէս ցեղին Մանասէի, սեղան առ եզերբ Յորդանանու. սեղան` մեծ տեսանելով:

11․ Եւ լուան որդիքն Իսրայէղի` եւ ասեն. Եթէ ահա շինեցին որդիքն Ռուբենի, եւ որդիքն Գադայ, եւ կէս ցեղին Մանասէի` սեղան ի սահմանս երկրին Քանանացւոց ի Գալիլովթ Յորդանանու, յայնկոյս յորդւոցն Իսրայէղի:

12․ եւ լուան որդիքն Իսրայէղի: Եւ ժողովեցան որդիքն Իսրայէղի ի սելով, ելանել տալ ընդ նոսա պատերազմ:

13․ Եւ առաքեցին որդիքն Իսրայէղի առ որդիքն Ռովբենի, եւ առ որդիսն Գադայ, եւ առ կէս ցեղին Մանասէի ի Գաղաադ, զՓենէէս որդի Եղիազարու որդւոյ Ահարովնի քահանայի:

14․ եւ տասն այր յիշխանացն ընդ նմա, մի իշխան ի նահապետացն, յամենայն ցեղիցն Իսրայէղի, իշխան տանցն նահապետաց էին հազարապետք Իսրայէղի:

15․ Եւ եկին առ որդիսն Ռովբէնի, եւ առ որդիսն Գադայ, եւ առ կէս ցեղին Մանասէի ի Գաղաադ, խաւսեցան ընդ նոսա` եւ ասեն:

16․ Այսպէս ասէ ամենայն ժողովուրդն Տեառն. զի՞նչ են յանցանքդ այդոքիկ` զոր յանցեայք առաջի Տեառն Աստուծոյ Իսրայէղի, դառնալ այսաւր յետս ի Տեառնէ, շինել ձեզ սեղան. եւ լինել ապստամբս ի Տեառնէ Աստուծոյ մերմէ:

17․ Միթէ փո՞քր իցեն մեզ մեղքն Փոգովրայ` զի ոչ եմք սրբելք ի նմանէ մինչչեւ ցայս վայր, եւ եղեն հերձուածք ի վերայ ժողովրդեանն Տեառն:

18․ եւ դուք դարձայք այսաւր ի Տեառնէ. եւ լինիցի վաղիւ բարկութիւն ի վերայ ամենայն Իսրայէղի:

19․ Եւ արդ` եթէ փոքր իցէ երկիր կալուածոց ձերոց, անցէք յերկիր կալուածոց Տեառն, ուր հարեալ է խորանն Տեառն. եւ ժառանգեցէք ի միջի իւրում. եւ մի լինիք ապստամբք ի Տեառնէ. եւ մի ի մէնջ ապստամբէք. վասն շինելոյ ձեզ սեղան արտաքոյ քան զսեղան Տեառն Աստուծոյ մերոյ:

20․ Ո՞չ ապաքէն Աքար` զարաեանց յանցեաւ յանցանս ինչ ի նզովից անտի, եւ ի վերայ ամենայն ժողովրդեանն Իսրայէղի եղեւ բարկութիւն. եւ նա մի միայն էր, միթէ ինքն միայն մեռաւ յիւր մեղսն:

21․ Պատասխանի ետուն որդիքն Ռովբենի եւ որդիքն Գադայ եւ կէս ցեղին Մանասէի, խաւսեցան ընդ հազարապետսն Իսրայէղի` եւ ասեն:

22․ Աստուած, Աստուած է Տէր. եւ Աստուած Աստուած Տէր ինքնին գիտէ: եւ Իսրայէլ ինքնին գիտասցէ. եթէ վասն ապստամբութեան ինչ յանցեա՞ք առաջի Տեառն, մի ապրեցուսցէ զմեզ յաւուր յայսմիկ.

23․ եւ եթէ շինեցաք մեզ սեղան ապստամբելոյ ի Տեառնէ Աստուծոյ մերմէ, հանել ի վերայ նորա զոհ ողջակիզաց. կամ թէ առնել ի վերայ նորա զոհ փրկութեան, Տէր ինքնին խնդրեսցէ:

24․ Այլ վասն երկիւղի արարաք զայս. ասեմք` գուցէ խաւսիցին որդիքն ձեր ընդ որդիս մեր եւ ասասցեն, թէ զի՞ կայ ձեր եւ Տեառն Աստուծոյ Իսրայէղի:

25․ եւ սահման եդ Տէր` ընդ ձեզ եւ ընդ մեզ որդիք Ռովբենի եւ որդիք Գադայ` զՅորդանան. եւ արդ չիք ձեր բաժին ի Տեառնէ. եւ աւտարացուցանեն որդիք ձեր զորդիս մեր` զի մի պաշտեսցեն զՏէր:

26․ Եւ ասացաք առնել այդպէս: շինել զսեղանս զայս, ոչ վասն ողջակիզաց, եւ ոչ վասն զոհից:

27․ այլ զի իցէ սա վկայութիւն ընդ մեզ եւ ընդ ձեզ. եւ ընդ որդիս մեր յետ մեր. պաշտել զպաշտաւն Տեառն առաջի նորա, ընծայիւք մերովք, եւ պատարագաւք մերովք` եւ զոհիւք փրկութեանց մերոց: եւ ոչ ասիցեն որդիք ձեր յորդիս մեր վաղիւ, թէ ոչ գոյ ձեր բաժին ի Տեառնէ:

28․ Եւ ասացաք թէ շինիցի երբէք` եւ խաւսիցին ընդ մեզ` կամ ընդ ազգս մեր վաղիւ. եւ ասասցեն, թէ տեսէք զնմանութիւն սեղանւոյ Տեառն` զոր արարին հարքն մեր. ոչ վասն ողջակիզաց եւ ոչ վասն զոհից, այլ վկայութիւն է ընդ մեզ եւ ընդ ձեզ, եւ ի մէջ որդւոց մերոց:

29․ Արդ քաւ լիցի մեզ ապստամբ լինել ի Տեառնէ այսաւր, առ ի շինելոյ մեզ սեղանն զոհից կամ ողջակիզաց, կամ զոհից փրկութեանց, արտաքոյ քան զսեղան Տեառն Աստուծոյ մերոյ` որ է առաջի խորանի նորա:

30․ Եւ իբրեւ լուան Փենեհեզ քահանայ, եւ ամենայն իշխանք ժողովրդեանն, եւ հազարապետքն Իսրայէղի որ էին ընդ նմա զբանս, զոր խաւսեցան ընդ նոսա որդիքն Ռովբենի եւ որդիքն Գադայ եւ կէս ցեղին Մանասէի, հաճոյ թուեցաւ նոցա:

31․ Եւ ասէ Փենէհէզ քահանայ որդի Եղիազարու ցորդիսն Ռովբենի եւ ցորդիսն Գադայ եւ ցկէս ցեղին Մանասէի. այսաւր գիտացէք էթէ ընդ մեզ է Տէր. զի ոչ յանցեայք առաջի Տեառն զյանցումնդ զայդ. եւ զի ապրեցուցէք զորդիսն Իսրայէղի ի ձեռաց Տեառն:

32․ Եւ դարձան Փենէհեզ քահանայ որդի Եղիազարու, եւ իշխանք տոհմիցն` որդւոցն Ռովբենի եւ որդւոցն Գադայ եւ կիսոյ ցեղին Մանասէի, յերկրէն Գաղաադու` յերկիրն Քանանու առ որդիսն Իսրայէղի, եւ ետուն նմա զպատգամսն:

33․ Եւ հաճոյ թուեցաւ բանն որդւոցն Իսրայէղի, եւ եւ աւրհնեցին զԱստուած որդւոցն Իսրայէղի. եւ խաւսեցան ընդ որդիսն Իսրայէղի եւ ասեն. մի եւս ելանել ընդ նոսա ի պատերազմ սատակել զերկիր որդւոցն Ռովբենի եւ որդւոցն Գադայ եւ կիսոյ ցեղին Մանասէի. եւ բնակեցան ի նմա:

34․ Եւ անուանեաց Յեսու զսեղանն Ռովբենի եւ զԳադայ եւ զկիսոյ ցեղին Մանասէի` եւ ասէ, զի վկայութիւն է ի մէջ նոցա, թէ Տէր` Աստուած է նոցա: